Wataalamu Muhimbili Wawasili Musoma Kutoa Huduma za Afya

Mganga Mfawidhi wa Hospitali ya Rufaa Musoma mkoani Mara, Dkt. Joachim Eyembe akiwakaribisha wataalamu wa afya kutoka Hospitali ya Taifa Muhimbili (MNH) baada ya kuwasili leo Musoma kwa ajili ya kutoa huduma za afya kwa kushirikiana na wataalamu wenzao wa hospitali hiyo.

Wataalamu wa afya wa Muhimbili na wa Hospitali ya Rufaa Musoma wakimsikiliza Mganga Mfawidhi, Dkt. Eyembe leo wakati akiwakaribisha wataalamu wa MNH.

Wataalamu wa Muhimbili na wa Hospitali ya Rufaa ya Musoma wakijadiliana jambo baada ya kuwasili kwenye hospitali hiyo leo.

Baadhi ya wataalamu wa Muhimbili wakiwa safarini kuelekea Musoma mapema leo asubuhi.


Na John Stephen

Wataalamu wa afya kutoka Hospitali ya Taifa Muhimbili (MNH) wamewasili leo Musoma, mkoani Mara kwa ajili ya kutoa huduma mbalimbali kwa wakazi wa mkoa huo kwa njia ya mkoba pamoja na kujenga uwezo kwa wataalamu wa hospitali za rufaa za mikoa nchini.

Lengo la ziara hii ni kuwaongezea ujuzi wataalamu wa hospitali za rufaa kupitia wataalamu wabobezi wa muhimbili ikiwa ni kutekeleza mpango mkakati wa MNH wa kuhakikisha inazitembelea hospitali mbalimbali za rufaa za mikoa nchini ili kushirikiana nao katika kutoa huduma bora za afya kwa wananchi ambao pengine wangepewa rufaa kwenda kupata huduma za kibingwa Muhimbili.

Baada ya timu ya wataalamu 14 kuwasili katika Hospitali ya Rufaa ya Musoma mkoani Mara, ilipokelewa na Mganga Mfawidhi wa hospitali hiyo, Dkt. Joachim Eyembe na hakusita kueleza furaha yake kwa ujio wa watalaamu hao wabobezi ambao watawajengea uwezo wataalamu wenzao katika maeneo ya upasuaji wa pua, koo, masikio na usingizi na kutoa huduma mbalimbali za afya kwa wananchi wa mkoa wa Mara. 

“Kwa kweli tuna furaha kubwa kwa ujio wenu kwani tunaamini tutanufaika katika ushirikiano wetu wa kutoa huduma bora kwa wananchi wa Mkoa wa Mara. Naamini tutafanya kazi ambayo itakidhi mahitaji ya wananchi wa mkoa huu,” amesema Mganga Mfawidhi wa hospitali hiyo. Dkt. Eyembe.

Pia, wataalamu wa Hospitali ya Rufaa ya Musoma watajengewa uwezo katika maeneo ya upasuaji wa watoto na watu wazima, kina mama, njia ya mkojo, huduma za macho pamoja na wananchi kupatiwa huduma mbalimbali.

Muhimbili kwa kushirikiana na Hospitali ya Rufaa ya Musoma mkoani Mara wametoa wito kwa wananchi walioko katika Mkoa wa Mara na mikoa mingine ya jirani kujitokeza kwa wingi ili kunufaika na huduma za kibingwa zitakazotolewa kwenye hospitali hiyo ya rufaa kuanzia kesho asubuhi hadi Ijumaa (tarehe 8 hadi 12/2018).

Pia, Muhimbili imetoa wito kwa wananchi na wadau mbalimbali kujitokeza kuchangia huduma za usafiri, gharama za vifaa vinavyotumika kutoa huduma husika ili kufanikisha azma ya kuwafikia wananchi wengi zaidi na kupunguza rufaa katika Hospitali ya Taifa Muhimbili

Picha na John Stephen, Hospitali ya Taifa Muhimbili (MNH)