This email address is being protected from spambots. You need JavaScript enabled to view it. +255 222151367/9  Apply Elective/Internship

Staff EmailFacebook Google Plus Red Cap

 

News and Announcements 

Viongozi Muhimbili Watakiwa Kuchapa Kazi Kufikia Malengo Waliojiwekea

Dar es Salaam - 14 -08-2018

Mwenyekiti wa Bodi ya Wadhamini ya Hospitali ya Taifa Muhimbili (MNH), Prof. Charles Majinge amewataka viongozi wa hospitali hiyo kuwajibika na kutekeleza mikakati ya hospitali ipasavyo ili kufikia malengo iliyojiwekea.

Prof. Majinge ametoa kauli hiyo leo jijini Dar es Salaam alipokua akifungua mafunzo ya utawala bora yaliyohusisha Wajumbe wa Bodi, Wakurugenzi, Wakuu wa Idara pamoja na Mameneja majengo wa hospitali hiyo.

Prof. Majinge amesema viongozi wanatakiwa kufanya kazi kwa juhudi na maarifa ili kufikia malengo ambayo hospitali imejiwekea, lakini pia hatua hiyo itakua chachu kwa watendaji wa chini kufanya kazi kwa bidii.

Akizungumzia kuhusu mafunzo hayo amesema yana maana kubwa katika taasisi kwa kuwa yatasaidia kukamilisha mpango mkakati wa hospitali bila kuwepo na vikwazo.

‘’Safari ni ndefu ili kufikia malengo, Bodi ya wadhamini MNH na Menejimenti lazima tuwe kitu kimoja na tukubaliane mipango inayotakiwa kutekelezwa ili tusonge mbele hivyo wote kwa pamoja, lazima tuwajibike ili tutoe huduma bora,’’amesema Prof. Majinge.

Aidha mtoa mada katika mafunzo hayo kutoka Taasisi ya Wakurugenzi Tanzania (IoDT) Dkt. Kassim Hussein amewataka viongozi katika Hospitali ya Taifa Muhimbili kuwa na uongozi unaoacha alama.

‘’Unapokua kiongozi lazima uwe mfano na watu watambue uwepo wako kwa kufanya kazi, uwepo wako katika taasisi uwe wenye tija,‘’ amesema Dkt. Hussein.

Katika mafunzo hayo mada mbalimbali zimetolewa ikiwemo, utawala bora, mamlaka na wajibu wa bodi pamoja na wajibu na majukumu ya Wakurugenzi katika taasisi.

Picha na John Stepehn, Hospitali ya Taifa Muhimbili (MNH)

Mwenyekiti wa Bodi ya Wadhamini katika Hospitali ya Taifa Muhimbili (MNH), Prof. Charles Majinge akifungua mafunzo ya siku mbili kwa wakurugenzi, wakuu wa idara, wakuu wa vitengo na mameneja wa majengo wa hospitali hiyo kwenye ukumbi wa Kimataifa wa Mwalimu Julius Nyerere jijini Dar es Salaam. Kushoto ni Mkurugenzi Mtendaji wa Muhimbili, Prof. Lawrence Museru na Mjumbe wa Bodi ya hospitali hiyo, Juma Muhimbi.

Baadhi ya washiriki wakimsikiliza mwenyekiti huyo katika ukumbi huo leo.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akitoa mada kwenye mafunzo hayo.

Baadhi ya wakurugenzi na viongozi wengine wa hospitali hiyo wakifuatilia mafunzo hayo leo.

Washiriki wakiwa kwenye mafunzo hayo leo.

Mtoa mada kutoka Taasisi ya Wakurugenzi Tanzania, Dkt. Kassim Hussein akisisitiza jambo kwenye mafunzo hayo leo.

Mwenyekiti wa Bodi ya Hospitali hiyo, Prof. Charles Majinge na Mkurugenzi Mtendaji wa MNH, Prof. Museru wakiwa katika picha ya pamoja na wakuu wa Idara, wakuu wa vitengo na mameneja wa mjengo wa Hospitali ya Taifa Muhimbili (MNH).

--------------------------------------------------------------------------------------------------------------------------------------------------

WATAALAM MAGONJWA YA DAMU KUTOKA AFRIKA WAKUTANA MUHIMBILI

Dar es Salaam - 13 -08-2018

Dar es Salaam, Tanzania. Hospitali ya Taifa Muhimbili (MNH) kwa kushirikiana na Chuo Kikuu cha Afya na Sayansi Shirikishi Muhimbili (MUHAS) wanafanya kongamano la kwanza na la kihistoria juu ya maendeleo mbalimbali yaliyotokea katika utoaji wa huduma ya magonjwa ya damu (Haematology) barani Afrika.

Kongamano hilo la siku nne linashirikisha nchi 15 za Afrika ikiwamo Tanzania, Uganda, Kenya, Rwanda, Afrika Kusini, Malawi, Zambia, Zimbabwe, Ivory coast, Swaziland, DRC, Madagascar, Ghana, Ethiopia pamoja na Burkinafaso

Akifungua kongamano hilo leo jijini Dar es Salaam, Mganga Mkuu wa Serikali Prof. Mohamed Bakari Kambi amesema azma ya serikali ni kuendelea kuboresha huduma za afya nchini ili kuwawezesha Watanzania kupata matibabu ndani ya nchi .

‘’Miongoni mwa malengo makubwa ya serikali ya awamu ya tano ni kupanua wigo wa utoaji huduma za afya kwa wananchi na kuhakikisha huduma za kibingwa na ubingwa wa juu zinatolewa hapa hapa nchini ili kuwawezesha wananchi wengi kupata huduma hizo,’’ amesema Prof. Bakari.

Kwa upande wake Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru amesema kukutana kwa watalaam hao ni hatua nzuri ya kuangalia namna bora ya kutoa tiba ya kisasa kwa magonjwa ya damu na hata kuanzisha tiba hiyo sehemu za kanda ili kupunguza idadi ya wagonjwa wengi ambao wanakuja kupata huduma hiyo Muhimbili.

“MHN tumekua wenyeji wa kongamano hili ambalo limehusisha wataalam wa magonjwa ya damu kutoka nchi mbalimbali barani Afrika, hii ni heshima kubwa na itasaidia kufikia malengo ya kutoa huduma kwa wananchi wengi zaidi,’’amesema Prof. Museru.

Naye Makamu Mkuu wa Chuo Kikuu cha Afya na Sayansi Shirikishi Muhimbili, Prof. Andrea Pembe amesema utoaji wa huduma katika magonjwa ya damu unakabiliwa na changamoto ya upungufu wa watalaam kwani katika miaka kumi iliyopita kuliwepo na mtaalam mmoja tu, lakini sasa watalaam wameongezeka ambapo wapo watalaam kumi ambao wanafanya kazi na wengine 7 wanaendelea na mafunzo .

“Idadi ya watoa huduma za afya ni wachache ukilingannisha na idadi ya Watanzania kwani katika hospitali zetu za kitaifa kuna upungufu wa Madaktari Bingwa, tunahitaji madaktari 574, hivyo kukutana kwa wataalam hawa ni tija kwa Taifa kwa kuwa watabadilishana uzoefu na watalaam wetu watazidi kujengewa uwezo,’’ amefafanua Prof. Pembe.

Naye Balozi wa Italia nchini Roberto Mengoni amesema kukutana kwa watalaam hao kutaisaidia Tanzania kufikia malengo yake ya kutoa huduma bora za matibabu katika magonjwa ya damu. Baadhi ya magonjwa ya damu ni Selimundu, upungufu wa damu pamoja na Saratani ya damu.

Mganga Mkuu wa Serikali, Prof. Mohamed Bakari akizungumza na wataalamu wa magonjwa ya damu (Haematology) kwenye kongamano la kwanza ambalo limeandaliwa na Hospitali ya Taifa Muhimbili (MNH) kwa kushirikiana na Chuo Kikuu cha Afya na Sayansi Shirikishi Muhimbili (MUHAS).

Wataalamu wa magonjwa ya damu kutoka nchi mbalimbali duniani wakifuatilia mkutano huo leo ambao unafanyika Hospitali ya Taifa Muhimbili (MNH). Baadhi ya nchi zinazoshiriki kongamano hilo la siku nne ni Nigeria, Ghana, Bostwana, Afrika Kusini, Ufaransa, Marekani, Rwanda na Italia.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akizungumza kwenye kongamano hilo baada ya kuwakaribisha wataalam wa magonjwa ya damu kutoka mataifa mbalimbali duniani.

Washiriki wakiwa kwenye mkutano huo leo.

Balozi wa Italia nchini Tanzania, Roberto Mengoni akieleza umuhimu wa kufanyika kwa kongamano hilo barani Afrika ambalo limeandaliwa na Muhimbili kwa kushirikiana na MUHAS.

Baadhi ya washiriki wakifuatilia kongamano hilo.

Makamu Mkuu wa Chuo Kikuu cha Afya na Sayansi Shirikishi Muhimbili (MUHAS). Prof. Andrew Pembe akisoma hotuba kwenye kongamano hilo.

Baadhi washiriki wakiwa kwenye kongamano hilo leo.

--------------------------------------------------------------------------------------------------------------------------------------------------

Makamu Mkuu wa Chuo Kikuu cha Afya na Sayansi Shirikishi Muhimbili (MUHAS). Prof. Andrew Pembe akisoma hotuba kwenye kongamano hilo.

Balozi wa Kuwait Aahidi Kuwasaidia Watoto Wenye Saratani Muhimbili

Dar es Salaam - 01 -08-2018

Balozi wa Kuwait nchini Tanzania, Jasem Al-Najem ametembelea Hospitali ya Taifa Muhimbili (MNH) na kuahidi kuwasaidia watoto wenye saratani ambao wanatibiwa katika hospitali hiyo.

Katika ziara hiyo balozi huyo alimtaka Ofisa Mtendaji Mkuu wa Tumaini la Maisha (TLM) katika hospitali hiyo, Dkt. Trish Scanlan kumwandikia mahitaji ambayo watoto hao wanapaswa kupatiwa ili aweze kushiriki katika kuwapatia tiba pamoja na mambo mengine.

Balozi huyo aliongozana na Naibu Mwenyekiti wa Red Crescent kutoka Kuwait, Anwar Alhasawi, Kaimu Mkurugenzi wa Idara ya Mashariki ya Kati-Wizara ya Mambo ya Nje na Ushirikiano wa Afrika Mashariki , Suleiman Salehe pamoja na pamoja na viongozi mbalimbali wa Lions Club ambayo imekuwa ikiwasadia watoto hao mahitaji mbalimbali.

Pia, balozi huyo alitembelea watoto wenye saratani katika jengo la watoto pamoja na kuwapatia zawaidi mbalimbali ikiwamo vifaa vya kuchezea.

Hospitali ya Taifa Muhimbili kwa mwezi imekuwa ikipokea wastani wa watoto 30 hadi 40 wenye saratani ya aina mbalimbali. Wengi wa watoto wanaopokelewa wamekuwa wakisumbuliwa na saratani ya damu, jicho, figo na saratani ya matezi.

Balozi wa Kuwait nchini Tanzania, Jasem Al-Najem akimkabidhi zawadi mmoja wa kina mama, Martha John Zakaria anayemuuguza mtoto wake katika Hospitali ya Taifa Muhimbili (MNH). Kushoto ni Naibu Mwenyekiti wa Red Crescent kutoka Kuwait, Anwar Alhasawi na mwakilishi wa Jumuiya ya Red Crescent, Mayouf Alenezi.

Balozi wa Kuwait nchini Tanzania, Jasem Al-Najem akizungumza na wazazi wa watoto ambao wanatibiwa saratani katika hospitali hiyo. Kushoto ni Kaimu Mkurugenzi wa Idara ya Mashariki ya Kati-Wizara ya Mambo ya Nje na Ushirikiano wa Afrika Mashariki, Suleiman Saleh na Naibu Mwenyekiti wa Jumuiya ya Red Crescent kutoka Kuwait, Anwar Alhasawi.

Wazazi na watoto wakimsikiliza balozi huyo katika jengo la watoto.

Balozi wa Kuwait nchini Tanzania, Jasem Al-Najem akizungumza na Ofisa Mtendaji wa Tumaini la Maisha (TLM), Dkt. Trish Scanlan baada ya ofisa huyo kumweleza mahitaji wanahitaji watoto wanaotibiwa saratani katika hospitali hiyo. Kushoto ni Kaimu Mkurugenzi wa Idara ya Mashariki ya Kati-Wizara ya Mambo ya Nje na Ushirikiano wa Afrika Mashariki, Suleiman Saleh, kulia ni Naibu Mwenyekiti wa Red Crescent kutoka Kuwait, Anwar Alhasawi (mwenye koti) na wengine ni wawakilishi wa Jumuiya ya Red Crescent.

Balozi huyo akiwa katika picha ya pamoja na baadhi ya watoto baada ya kupewa zawadi mbalimbali.

--------------------------------------------------------------------------------------------------------------------------------------------------

Muhimbili Yaendelea Kupata Mafanikio, Watoto 24 Wafanyiwa Upasuaji

Dar es Salaam - 28 -07-2018

Hospitali ya Taifa Muhimbili (MNH) inaendelea kupata mafanikio makubwa kutokana na kuboresha huduma za upasuaji wa watoto, huku ndani ya siku mbili watoto 24 wakiwa wamefanyiwa upasuaji.

Wataalamu wa upasuaji wa watoto wa Muhimbili wamesema idadi ya watoto wanaofikishwa katika hospitali hiyo kutokana na matatizo mbalimbali, inaeendelea kuongezeka kutoka maeneo mbalimbali nchini.

Watoto waliofanyiwa upasuaji ni wale wenye matatizo mbalimbali wakiwamo waliozaliwa bila kuwa na njia ya haja kubwa na wengine wenye matatizo kwenye mfumo wa chakula na hewa.

Upasuaji wa watoto hao 24 umefanywa na wataalamu wa upasuaji wa watoto wa Hospitali ya Taifa Muhimbili (MNH) kwa kushirikiana na madaktari bingwa wa upasuaji wa watoto kutoka Chuo Kikuu cha Alexandria nchini Misri.

Akizungumza leo katika mkutano na waandishi wa habari, Daktari Bingwa wa Watoto katika hospitali hiyo, Dkt. Mwajabu Rashid Mbaga amesema wataalamu wa muhimbili na wa Chuo Kikuu cha Alexandria nchini Misri wameshirikiana kufanya upasuaji mgumu (difficult cases) kwa watoto hao.

Dkt. Mbaga amesema upasuaji huo umekuwa ukifanywa mara kwa mara na wataalamu wa Muhimbili kwa muda mrefu na kwamba katika siku mbili wamekuwa na wataalamu wa Chuo Kikuu cha Alexandria kwa ajili ya kubadilisha uzoefu.

“Kuanzia Alhamisi hadi Ijumaa wiki hii tumekuwa na jopo la watalaamu wenzetu 10 wa upasuaji kutoka Chuo Kikuu cha Alexandra kilichopo Misri wakiongozwa na Prof. Saber Mohamed Waheeb mshauri mwelekezi katika upasuaji wa watoto na Dkt. Mohamed Abdelmalak Morsi bingwa wa upasuaji wa watoto,” amesema Dkt. Mbaga.

Kufanyika kwa upasuaji huo kumetokana na juhudi za uongozi wa Muhimbili kuimarisha miundombinu ya vyumba maalumu (exclusive operating theaters) vya upasuaji wa watoto.

Wakati huo huo, hospitali hiyo ilipokea watoto pacha walioungana ambao walizaliwa Julai 12, 2018 kwa njia ya kawaida wakati mama akiwa njiani kuelekea hospitalini huko Vigwaza Mkoani Pwani.

Daktari Bingwa wa Upasuaji wa Watoto wa Muhimbili, Dkt. Petronilla Joseph Ngiloi amesema pacha hao wameungana sehemu ya tumbo na sehemu ya ndani na kwamba wanachangia INI tu huku viungo vingine kila mmoja akijitegemea.

“Watoto hawa walizaliwa na kilo mbili, lakini sasa wamefikisha kilo 4 na gramu 640. Tunategemea kuwafanyia upasuaji wa kuwatenganisha katika kipindi cha miezi mitatu hadi minne ijayo kuanzia sasa. Tumejiridhisha kwamba tutaweza kuwatenganisha sisi wenyewe hapahapa katika Hospitali ya Taifa Muhimbili,” amesema Dkt. Ngiloi.

Naye Mkurugenzi wa Huduma za Upasuaji Muhimbili, Dkt. Julieth Magandi alishukuru jopo la wataalamu kutoka Misri kwa kushirikiana na wataalam wa hospitali hiyo kwa kuwa wamebadilishana uzoefu.

Daktari Bingwa wa Upasuaji wa Watoto Hospitali ya Taifa Muhimbili (MNH), Dkt. Mwajabu Rashid Mbaga akizungumza na waandishi wa habari leo baada ya wataalamu wa upasuaji wa watoto wa Muhimbili na wale wa Chuo Kikuu cha Alexandria nchini Misri kufanya upasuaji kwa watoto 24 wenye matatizo mbalimbali. Watoto hao wanaendelea vizuri baada ya kupatiwa huduma hiyo. Kutoka kushoto ni Mkurugenzi wa Huduma za Upasuaji wa MNH, Dkt. Julieth Magandi, Dkt. Petronilla Joseph Ngiloi wa MNH, Prof. Saber Mohamed Waheeb kutoka Misri, Dkt. Mohamed Abdelmalak kutoka Misri na Dkt. Ibrahimu Mkoma wa MNH.

Madaktari bingwa wa upasuaji wa watoto kutoka Chuo Kikuu cha Alexandria nchini Misri wakifanya upasuaji kwa mmoja wa watoto ambaye ana tatizo kwenye mfumo wa chakula (Gastroeso Phageal Reflux) disease) kwa kushirikiana na madaktari bingwa wa Hospitali ya Taifa Muhimbili (MNH). Kulia ni Prof. Saber Mohamed Waheeb kutoka Misri, Dkt. Mwajabu Rashid Mbaga wa Muhimbili na Dkt. Mohamed Abdelmalak kutoka Misri wakifanya upasuaji.

Daktari Bingwa wa Upasuaji wa Watoto Hospitali ya Taifa Muhimbili (MNH), Dkt. Mwajabu Rashid Mbaga (kushoto), Daktari Bingwa wa Nusu Kaputi, Dkt. Kareman Ibrahim kutoka Chuo Kikuu cha Alexandria nchini Misri na Muuguzi msaidizi, Agness Charles wa Muhimbili (kulia) wakiendelea na upasuaji katika hospitali hiyo.

Daktari Bingwa wa Upasuaji wa Watoto wa Hospitali ya Taifa Muhimbili (MNH), Dkt. Mwajabu Rashid Mbaga (kushoto), Prof. Saber Mohamed Waheeb kutoka Misri (kushoto), Dkt. Mohamed Abdelmalak kutoka Misri (kulia) na Muuguzi msaidizi, Agness Charles wa Muhimbili (kulia) wakiendelea na upasuaji leo.

Madaktari na wataalamu wengine wakiendelea na upasuaji kwa mtoto mwenye tatizo kwenye mfumo wa chakula (Gastroeso Phageal Reflux disease).

Dkt. Julieth Magandi wa Muhimbili akipokea zawadi kutoka kwa Prof. Saber Mohamed Waheeb wakati wa mkutano wa wataalamu hao na waandishi wa habari leo.

--------------------------------------------------------------------------------------------------------------------------------------------------

Muhimbili Yamuaga Mratibu wa Madaktari wa China

Dar es Salaam - 17-07-2018

Picha na John Stephen, Hospitali ya Taifa Muhimbili.

Mratibu aliyemaliza muda wake wa timu ya madaktari wa China wanaotoa huduma za afya nchini, Sao Tao akichangia damu katika Hospitali ya Taifa Muhimbili (MNH) jijini Dar es Salaam. Baada ya Tao kuchangia damu, uongozi wa hospitali hiyo ulimkabidhi cheti cha shukrani kutokana na kuhudumu kwa miaka tisa.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akiwa na mratibu huyo, Sao Tao baada ya kumkabidhi cheti cha shukrani.

Prof.Museru akimvisha skafu, Sao Tao baada ya kuchangia damu katika hospitali hiyo.

Mkurugenzi Mtendaji wa Muhimbili, Prof. Museru akiwa katika picha ya pamoja na Sao Tao. Wengine ni watumishi wa Idara ya Maabara Kuu- Muhimbili.

--------------------------------------------------------------------------------------------------------------------------------------------------

Watumishi Muhimbili Wapewa Mafunzo Kuhusu Maadili, Rushwa

Dar es Salaam - 05-07-2018

Hospitali ya Taifa Muhimbili (MNH) imeendesha mafunzo ya siku mbili ambayo yamelenga kuwakumbusha watumishi wa hospitali hiyo kuzingatia sheria ya kupambana na rushwa mahali pa kazi sambamba na maadili katika utumishi wa umma.

Watumishi walikumbushwa kutojihusisha na vitendo vya kutoa na kupokea rushwa pamoja na madhara yanayotokana na vitendo hivyo.

Ofisa wa Taasisi ya Kuzuia na Kupambana na Rushwa (Takukuru), Bw. Steven Agwanda aliwataka watumishi wa hospitali hiyo kuzingatia maadili kwa sababu makosa mengi ya rushwa yanasababishwa na ukiukwaji wa maadili.

“Kuna uhusiano mkubwa kati ya rushwa na maadili, mtumishi au viongozi hawachukui rushwa kwa sababu hawana hela, hapa tatizo ni ukosefu wa maadili, zikiwamo tamaa ambazo zinasababishwa na watumishi au viongozi,” alisema Agwanda.

Mafunzo hayo ya siku mbili yalifunguliwa na Mkuu wa Idara ya Ajira na Mafunzo, Bw. Abdallah Kiwanga na yaliwalenga wakuu wa vitengo na wasimamizi wa wodi katika Hospitali ya Taifa Muhimbili (MNH).

Picha na John Stephen, Hospitali ya Taifa Muhimbili.

Ofisa wa Taasisi ya Kuzuia na Kupambana na Rushwa (Takukuru), Bw. Steven Agwanda akitoa mada katika semina ya siku mbili kuhusu rushwa mahali pa kazi kwa watumishi wa umma katika Hospitali ya Taifa Muhimbili (MNH).

Baadhi ya watumishi wa umma wa Muhimbili wakimsikiliza mtoa mada kwenye semina hiyo.

Watumishi wa Muhimbili wakifuatilia mada kuhusu rushwa na maadili mahali pa kazi.

--------------------------------------------------------------------------------------------------------------------------------------------------

Uwezo wa Wataalam Kupandikiza Figo Waimarishwa Muhimbili

Dar es Salaam - 26-06-2018

Katika kipindi cha miezi minane Hospitali ya Taifa Muhimbili (MNH) imefanikiwa kupandikiza figo wagonjwa 10 kwa mafanikio makubwa ambapo katika kambi ya tatu ya upandikizaji figo, upasuaji umefanywa na watalaam wa MNH kwa zaidi ya silimia 80, huku wakisimamiwa na watalaam kutoka Hospitali ya Saifee ya nchini India.

Akizungumza na waandishi wa habari leo tarehe 26 Juni, 2018 jijini Dar es salaam, Mkurugenzi Mtendaji wa Hospitali ya Taifa Muhimbili, Prof. Lawrence Museru amesema MNH ilianza upandikizaji figo Novemba 2017 kwa kupandikiza mgonjwa mmoja ambapo Aprili 2018 wagonjwa wanne walipandikizwa figo na Juni 24 hadi 25, 2018 wagonjwa watano wamepandikizwa figo.

‘‘Pamoja na upasuaji huo kufanyika, mwaka 2016 hospitali ilipeleka watalaam wake nchini India kujengewa uwezo wa kupandikiza figo hivyo napenda kuwafahamisha kuwa tangu tumeanza upandikizaji wa figo tunaendelea kupata mafanikio makubwa kwa baadhi ya watalaam wetu wa ndani kuwa na uwezo wa kushika hatamu ya kufanya wenyewe katika mchakato mzima wa uchunguzi hadi kupandikiza figo,’’amesema Prof. Museru.

‘‘Tunaamini katika kambi mbili zinazokuja za upasuaji wa kupandikiza figo, madaktari wa upasuaji wazalendo watafikia kiwango cha asilimia 100. Hii ni hatua kubwa sana katika kipindi cha miezi minane kwani mara ya kwanza walikuja watalaam wote wanaohitajika wapatao 15, tulipofanya mara ya pili walipungua wakaja watalaam saba na safari hii mara ya tatu wamepungua wamekuja watano tu, tunaamini wataendelea kupungua katika kambi tatu zijazo na hatimaye kusimama wenyewe na kufanya kwa viwango na ubora uleule,” amesisitiza Prof. Museru.

Kwa upande wake Daktari Bingwa wa magonjwa ya figo kutoka hospitali ya Saifee ya nchini India Dkt. Mustafa Khokhawala amesema Madaktari wa Muhimbili wameshiriki upasuaji huo kwa asilimia kubwa ambapo kati ya wagonjwa watano waliopandikizwa figo, mgonjwa mmoja amepandikizwa na wataalam wa ndani na kwamba hatua hiyo ni nzuri na inaonesha kuwa watalaam wa MNH wanauwezo mkubwa wa kuendelea na upandikizaji.

Naye Daktari Bingwa wa Magonjwa ya Figo kutoka Hospitali ya Taifa Muhimbili, Onesmo Kisanga amesema wagonjwa wote waliopandikizwa figo pamoja na wale waliochangia figo wanaendelea vizuri na wanafuatiliwa na wataalam kwa ukaribu zaidi.

Pia amesema mahitaji ya wagonjwa wanaohitaji kupandikizwa figo ni makubwa kwani kuna wagonjwa karibu 1000 nchi nzima ambao wanahitaji huduma ya kupandikizwa figo.

Upasuaji wa kupandikiza figo kwa wagonjwa 10 hadi hivi sasa umegharimu kiasi cha shilingi milioni 210 sawa na milioni 21 kwa mgonjwa mmoja ambapo kama wangeenda nje ya nchi ingegharimu kiasi cha shilingi Bilioni moja sawa na shilingi milioni 100 kwa kila mgonjwa.

Kabla ya kuanza upandikizaji wa figo hapa nchini Serikali ilipeleka wagonjwa takribani 230 katika kipindi cha miaka 15 iliyopita, hivyo kuanza kwa huduma hii nchini kutaongeza idadi zaidi ya hiyo kwa kipindi cha miaka mitatu ijayo.

Picha na John Stephen, Hospitali ya Taifa Muhimbili.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akizungumza na waandishi wa habari leo tarehe 26 Juni, 2018 kuhusu wagonjwa watano kupandikizwa figo katika hospitali hii. Kushoto ni Daktari Bingwa wa Upasuaji wa Figo na Mfumo wa Mkojo, Dkt. Mustafa Khokhawala, Daktari Bingwa wa Upasuaji wa Mishipa ya Damu, Dkt. Aliasgar Behranwala na Daktari Bingwa wa Upasuaji wa Figo na Mfumo wa Mkojo, Dkt. Raval Ashiq Ali Ahmad, wote kutoka Hospitali ya Saifee iliyopo Mumbai nchini India.

Kulia ni Daktari Bingwa wa Upasuaji wa Figo na Mfumo wa Mkojo, Dkt. Njiku Kim, Daktari Bingwa wa Upasuaji wa Figo na Mfumo wa Mkojo, Dkt. Victor Sensa naDkt. Isaack Mlatie ambaye pia ni Daktari Bingwa wa Upasuaji wa Figo na Mfumo wa Mkojo- wote wa Hospitali ya Taifa Muhimbili (MNH) wakiwa kwenye mkutano na waandishi wa habari.

Daktari Bingwa wa Upasuaji wa Figo na Mfumo wa Mkojo, Dkt. Isaack Mlatie akizungumza na waandishi wa habari leo kuhusu hospitali hii kufanikiwa kupandikiza figo kwa wagonjwa watano.

Baadhi ya wakurugenzi wa Muhimbili wakifuatilia mkutano huo leo.

Daktari Bingwa wa Upasuaji wa Mishipa ya Damu, Dkt. Aliasgar Behranwala kutoka Hospitali ya Saifee iliyopo Mumbai nchini India na Daktari Bingwa wa Upasuaji wa Figo na Mfumo wa Mkojo, Dkt. Njiku Kim wa Hospitali ya Taifa Muhimbili wakipandikiza figo mmoja wa wagonjwa watano walipatiwa huduma hiyo.

--------------------------------------------------------------------------------------------------------------------------------------------------

Pacha walioungana Muhimbili kupelekwa Saudi Arabia kwa matibabu zaidi

Dar es Salaam - 25-06-2018

Watoto pacha Maryness Benatus Bernado na Anisia Benatus Bernado waliozaliwa wakiwa wameungana ambao kwa sasa wamelazwa Hospitali ya Taifa Muhimbili (MNH) tangu mwezi Februari mwaka huu, wanatarajiwa kupelekwa nchini Saudia Arabia ndani ya wiki mbili kuanzia sasa kwa ajili ya matibabu zaidi ikiwemo kuangalia uwezekano wa kuwatenganisha.

Hayo yameelezwa leo na Kaimu Balozi wa Saudi Arabia nchini Tanzania, Bandar Abdullah Al-Hazzan alipotembelea Hospitali ya Taifa Muhimbili kuangalia watoto hao. Watoto hawa wameungana kuanzia sehemu ya tumboni hadi chini.

“Tumekuwa na uzoefu mkubwa sana wa kuwatenganisha watoto pacha waliozaliwa wakiwa wameungana kuanzia miaka ya 1990 ambapo hadi hivi sasa watoto zaidi 35 kutoka nchi mbalimbali duniani waliozaliwa wakiwa wameungana tulifanikiwa kuwatenganisha,” alisema Kaimu Balozi Al-Hazzan

Amesema kwamba kutokana na uzoefu mkubwa walionao, nchi yake kupitia Mfalme wa nchi hiyo ameagiza watoto hao wapelekwe Saudi Arabia kwa ajili ya kupatiwa matibabu ya ubingwa wa juu.

Mbali na hayo Serikali ya Saudi Arabia imesema itagharamia usafiri, malazi pamoja na matibabu hivyo wamemuhakikishia mama wa pacha hao kwamba matibabu yatakwenda vizuri na watarejea nchini wakiwa salama.

Mkurugenzi Mtendaji wa Hospitali ya Taifa Muhimbili, Prof. Lawrence Museru amemshukuru Mfalme wa Saudi Arabia na Serikali yake kwa ujumla kwa ushirikiano mkubwa wanaoendelea kuutoa kwa Serikali ya Tanzania hususani katika Hospitali ya Taifa Muhimbili.

Prof. Museru ameiomba Serikali ya Saudi Arabia kuendelea kushirikiana na Tanzania katika sekta ya Afya katika kuangalia maeneo yenye upungufu wa wataalamu pamoja na maeneo mengine zikiwamo huduma za upasuaji.

Kwa upande wake Mama wa watoto hao, Bi. Jonesia Jovitus amemshukuru Mfalme wa Saudia Arabia kupitia Ubalozi wake hapa nchini Tanzania kwa msaada alioupata kwani anaamini kwa uwezo wa Mwenyezi Mungu watoto wake watapata huduma ya matibabu kulingana na uzoefu ulipo nchini humo. Watoto hao kwa pamoja wana uzito wa kilo 7 na gramu 40, walizaliwa Wilayani Misenyi, Mkoani Kagera tarehe 29 Januari, 2018.

Picha na John Stephen, Hospitali ya Taifa Muhimbili.

Kaimu Balozi wa Saudia Arabia nchini Tanzania, Bandar Abdullah Al-Hazzan akiwa na watoto pacha waliungana, Maryness Benatus Bernado na Anisia Benatus Bernado ambao wamebebwa na mama yao, Jonesia Jovitus. Kulia ni Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru.

Mkurugenzi Mtendaji wa Muhimbili, Prof. Museru akimsikiliza balozi huyo kabla ya kuwatembelea wodini watoto pacha leo tarehe 25 Juni, 2018. Kushoto ni Mkurugenzi wa ubalozi huo, Fahad Ali Al Qahtani.

Kaimu Balozi wa Saudia Arabia nchini Tanzania, Bandar Abdullah Al-Hazzan na Mkurugenzi Mtendaji wa Muhimbili, Prof. Museru wakielekea wodini kuwaona watoto pacha walioungana leo tarehe 25 Juni, 2018.

Kaimu Balozi wa Saudia Arabia nchini Tanzania, Bandar Abdullah Al-Hazzan na Mkurugenzi Mtendaji wa Muhimbili, Prof. Museru wakiwa katika picha ya pamoja leo tarehe 25 Juni, 2018.

--------------------------------------------------------------------------------------------------------------------------------------------------

Timu ya Madaktari Kutoa Hudumza Kitabibu Muhimbili, MOI, JKCI na Hospitali ya Mbeya

Dar es Salaam - 22-06-2018

Kaimu Mkurugenzi Mtendaji wa Hospitali ya Taifa Muhimbili (MNH), Makani Makwaia akikaribisha timu ya wataalamu kutoka China ambao wamekuja kujenga uwezo kwa wataalamu wetu na kusaidia maeneo ambayo yana upungu wa wataalamu Muhimbili, Taasisi ya Mifupa MOI, Taasisi ya Moyo Jakaya Kikwete (JKCI) na Hospitali ya Rufaa ya Mbeya. Kutoka kushoto ni viongozi wa watalaamu hao na kulia ni Mkurungezi Mtendaji wa JKCI, Prof. Mohamed Janabi na anayefuatia ni mwakilishi wa MOI, Dkt. Swai. Leo Muhimbili, MOI na JKCI imewaaga wataalamu watatu ambao walikuwa hapa nchini. Tanzania na China imekuwa ikishinikiana kwa zaidi ya miaka 50 katika shughuli mbalimbali za maendeleo ikiwamo sekta ya afya.

Pichani ni wataalamu kutoka China ambao watashirikiana na wataalamu wetu wa MNH, MOI, JKCI na Hospitali ta Rufaa ya Mkoa Mbeya katika kutoa huduma za kitabibu. Miongoni mwa kundi hilo wamo wataalamu watatu; Dkt. Zhu Jian, Dkt.Wang Qiang na Song Tao ambao wameagwa leo baada ya kumaliza muda wao.

Mwakilishi kutoka MOI akizungumza na wataalamu kutoka China.

Mkurungezi Mtendaji wa JKCI, Prof. Mohamed Janabi akiwakaribisha watalaamu hao.

Kaimu Mkurugenzi Mtendaji wa Hospitali ya Taifa Muhimbili (MNH), Makani Makwaia akimpatia cheti Dkt. Zhu Jian ambaye amemaliza muda wake.

Dkt. Wang Qiang akionyesha cheti chake baada ya kupewa na Kaimu Mkurugenzi Mtendaji.

Mwakilishi wa MOI, Dkt. Swai akimuaga Song Tao ambaye pia amemaliza muda wake nchini.

Kaimu Mkurugenzi Mtendaji wa Muhimbili, Bw. Makwaia akiwa katika picha ya pamoja na wataalamu hao na watumishi wa taasisi tatu; MOI, JKCI na Hospitali ya Taifa Muhimbili.

--------------------------------------------------------------------------------------------------------------------------------------------------

Muhimbili ya Kwanza A. Mashariki Tiba ya Kuondoa Mawe Kwenye Ini na Kogosho

Dar es Salaam - 21-06-2018

Dar es Salaam, Tanzania: Hospitali ya Taifa Muhimbili (MNH) imeanza kufanya uchunguzi na tiba ya vivimbe pamoja na kuondoa mawe kwenye ini na kwenye kongosho kwa kutumia teknolojia ya kisasa ya hadubini.

Mbali na Muhimbili kuanza kutoa huduma ya uchunguzi na kutibu wagonjwa, Kenya inatarajia kuanza kutoa huduma kama hiyo Agosti, mwaka huu.

Mpaka sasa wataalamu wa magonjwa ya tumbo na ini, wamefanikiwa kuchunguza na kutibu wagonjwa 40.

Akizungumza na waandishi wa habari Mkuu wa Kitengo cha Magonjwa ya Tumbo na Ini kutoka idara ya tiba, Dkt. John Rwegasha amesema mfumo wa njia ya hadubini ni wa kisasa na kwamba unafanywa bila kufungua tumbo la mgonjwa.

Amesema kwamba mfumo wa hadibini umekuwa ukitumiwa kuchunguza na kutibu matatizo ya vivimbe na mawe kwenye ini ikiwa ni miongoni mwa mikakati wa hatua za awali wa kuelekea kwenye upasuaji wa kupandikiza ini nchini.

Pia, amesema wataalamu wa Muhimbili kwa kushirikiana na Mtalaamu Bingwa wa Upasuaji na Upandikizaji wa Ini kutoka Hospitali ya BLK India wamefanikiwa kurepea ini la mgonjwa lililopasuka ikiwa ni hatua ya msingi wa kujenga uwezo kwa watalaamu wetu wa upasuaji.

“Tayari wataalamu wetu wa upasuaji wamefanikiwa kurepea ini lililopasuka baada ya mgonjwa kupata ajali ikiwa ni hatua ya awali kuwajengea uwezo watalaamu wetu kuelekea kwenye upasuaji mkubwa wa ini,” amesema Rwegasha.

Akizungumzia gharama, Dkt. Rwegasha amesema kuwa gharama za kumfanyia uchunguzi na tiba kwa mgonjwa mmoja kwa matumizi ya vifaa tiba pekee ni milioni mbili na kwamba mgonjwa akitibiwa nje ya nchi ni Shs. milioni sita kwa uchunguzi na tiba ya aina hiyo kwa mgonjwa mmoja.

Amesema gharama za kupandikiza ini ni kubwa kuliko kupandikiza figo na kwamba mgonjwa mmoja anahitaji lita 20 za damu ili kufanikisha upasuaji huo.

Mkuu wa Kitengo cha Magonjwa ya Tumbo na Ini, Dkt. John Rwegasha akizungumza na waandishi wa habari kuhusu Hospitali ya Taifa Muhimbili (MNH) kuanza mchakato wa uchunguzi na tiba ya vivimbe pamoja na kuondoa mawe kwenye ini na kongosho kwa kutumia teknolojia ya kisasa ya hadubini. Kulia ni Daktari Bingwa wa Magonjwa ya Tumbo na Ini, Dkt. Yogesh Batra kutoka Hospitali ya BLK nchini India, katikati ni Manju Sharma ambaye ni Meneja wa Uhusiano wa Kimtaifa kutoka Hospitali ya BLK. Wengine ni wataalamu wa magonjwa ya tumbo na ini. 

Mmoja wa wagonjwa akipatiwa tiba ya vivimbe pamoja na kuondoa mawe kwenye ini katika Hospitali ya Taifa Muhimbili (MNH) leo tarehe 21 Juni, 2018. 

--------------------------------------------------------------------------------------------------------------------------------------------------

Washiriki Washinda Vikombe, Fedha Maonesho ya Utumishi wa Umma Muhimbili

Dar es Salaam - 20-06-2018

MSHINDI KWANZA: Mwenyekiti wa Bodi ya Hospitali ya Taifa Muhimbili (MNH), Prof. Charles Majinge akikabidhi zawadi ya kikombe kwa Idara ya upasuaji ambayo imekuwa mshindi wa kwanza kwenye Maonesho ya Wiki ya Utumishi wa Umma ambayo yalianza tarehe 18 hadi 20 Juni, 2018 kwenye viwanja vya Muhimbili. Idara hiyo imepatiwa zawadi ya kikombe, fedha na cheti cha ushiriki. Kulia ni Mkurugenzi Mtendaji wa Muhimbili, Prof. Lawrence Museru akishuhudia shughuli ya kukabidhi zawadi kwa washiriki mbalimbali. Mwenyekiti huyo amefunga maonesho ya siku tatu yalioanza tarehe 18 hadi 20, Juni 2018 kwenye viwanja vya Muhimbili. Wengi walijitokeza kupima afya BURE, kupata elimu na ushauri kuhusu afya zao.

MSHINDI WA PILI: Mkuu wa Idara ya Magonjwa ya Dharura na Ajali, Dkt. Juma Mfinanga akipokea zawadi ya kikombe kutoka kwa Prof. Majinge. Pia, Idara hiyo imepatiwa fedha na cheti cha ushiriki. Kulia ni Mkurugenzi Mtendaji wa Muhimbili, Prof. Lawrence Museru.

Wananchi wakitembelea banda la Magonjwa ya Damu na Saratani za Damu katika maonesho yaliofanyika Muhimbili.

MSHINDI WA TATU: Mwenyekiti wa Bodi ya Hospitali ya Taifa Muhimbili (MNH), Prof. Charles Majinge akikabidhi zawadi ya fedha na kikombe kwa Idara meno.

MSHINDI WA NNE: Idara ya macho nayo haikuwa nyuma katika kutoa huduma bora kwa wananchi waliofika kwenye banda lao kwani walishinda kikombe pamoja na feda taslimu.

Wananchi wakisubiri kuhudumiwa katika banda la lishe kwenye maonesho hayo.

MSHINDI WA TANO: Mkuu wa Kitengo cha Lishe katika Hospitali ya Taifa Muhimbili (MNH), Schola Mlinda akipokea zawadi baada ya kuwa mshindi wa tano.

Wananchi wakiwa kwenye banda la Idara ya Magonjwa ya Kinamama na Uzazi.

Mwenyekiti wa Bodi ya Hospitali ya Taifa Muhimbili (MNH), Prof. Majinge akiwa kwenye banda la lishe. Kushoto ni Mtaalamu wa Lishe, Mariam Nyamwaira akimsikiliza mwenyekiti huyo.

Mwenyekiti wa Bodi ya Hospitali ya Taifa Muhimbili (MNH), Prof. Charles Majinge akiwa katika picha ya pamoja na washiriki wa maonesho hayo.

--------------------------------------------------------------------------------------------------------------------------------------------------

Maonesho ya Wiki ya Utumishi wa Umma Yafana Muhimbili

Dar es Salaam - 18-06-2018

Waziri wa Afya Maendeleo ya Jamii, Jinsia, Wazee na Watoto, Mhe. Ummy Mwalimu akizungumza katika Hospitali ya Taifa Muhimbili (MNH) ambako maonesho ya Wiki ya Utumishi wa Umma yanafaniyika kwa siku tatu mfulilizo. Wananchi mbalimbali wamefika kwa wingi katika hospitali hiyo kwa ajili ya kuona huduma mbalimbali zinazotolewa na hospitali hiyo pamoja na kupima afya bure. Kushoto ni Mjumbe wa Bodi ya Muhimbili, Bw. Juma Muhimbi na Mkurugenzi wa Tiba katika wizara hiyo, Dkt. Doroth Gwajima.

Wananchi mbalimbali wakiwamo wataalamu wa MNH wakifuatilia hotuba ya Waziri wa Afya, Mhe. Ummy Mwalimu wakati akizungumza kwenye viwanja vya Muhimbili.

Daktari Bingwa wa Magonjwa ya Figo, Dkt. Onesmo Kisanga akifafanua jambo kwa Waziri Ummy Mwalimu kuhusu magonjwa ya figo. Kushoto ni Mkurugenzi Mtendaji wa Muhimbili, Prof. Lawrence Museru wakati kulia ni mjumbe wa bodi ya Muhimbili, Bw. Juma Muhimbi.

Bw. Paul Mayengo akipima dawa ya methadone kwa watu wenye tatizo la uraibu wa heroin katika Hospitali ya Taifa Muhimbili (MNH). Dawa hiyo inatumiwa na wataalamu wa afya kwa ajili ya kutibu uraibu.

Prisca akimweleza waziri kuhusu maendeleo yake baada ya kupandikizwa figo katika hospitali hiyo. Kushoto ni Mkuu wa Idara ya Mahonjwa ya Figo, Dkt. Jacqueline Shoo.

Waziri Ummy Mwalimu akiwa kwenye banda la lishe ambako ampatiwa maelezo kuhusu lishe bora. Kushoto ni mmoja wa watu akipimwa afya baada ya kutembelea banda hilo leo.

Ofisa Ustawi wa Jamii wa Hospitali ya Taifa Muhimbili (MNH), John Mwakyusa akitoa huduma ya ushauri kwa mmoja wa watu waliotembelea banda hilo.

Waziri wa Afya, Ummy Mwalimu akimsikiliza Msimamizi wa wodi ya Kangaroo, Cleopatra Mtei jinsi ya kuwabeba watoto wanaozaliwa kabla ya muda (premature).

Mtoto, Mnyaman Omary Mohammed akizungumza na Waziri Ummy Mwalimu leo katika viwanja vya Muhimbili ambako maonesho ya wiki ya Utumishi wa Umma yanaendelea.

Mkuu wa Idara ya Afya ya Akili, Dkt. Frank Masao akieleza shughuli mbalimbali za tiba zinazofanywa na idara hiyo

--------------------------------------------------------------------------------------------------------------------------------------------------

Maonesho ya Utumishi wa Umma Kuanza Juni 18 Muhimbili

Dar es Salaam - 12-06-2018

Hospitali ya Taifa Muhimbili (MNH) inatarajia kufanya maonesho ya Utumishi wa Umma-siku tatu mfululizo ambayo yatafanyika ndani ya hospitali hiyo kuanzia Juni 18 hadi 20, 2018.

Maonesho hayo ambayo yatazinduliwa na Waziri wa Afya, Maendeleo ya Jamii, Jinsia, Wazee na Watoto Mh. Ummy Mwalimu yamebeba kaulil mbiu inayosema “Mapambano dhidi ya rushwa kwa kushirikisha wadau na kujenga uongozi bora ili kufikia malengo ya ajenda 2063 ya Umoja wa Afrika na malengo ya maendeleo endelevu’’.

Akizungumza na waandishi wa habari leo jijini Dar es Salaam, Mkuu wa Kitengo cha Mawasiliano ya Umma na Huduma kwa Wateja, Bw. Aminiel Aligaesha amesema Hospitali itafanya maonesho hayo kwa kipindi cha siku tatu kuanzia saa mbili asubuhi hadi saa11jioni ili wananchi waweze kuona shughuli zinazofanywa na Hospitali ya Taifa Muhimbili.

“Wananchi watapata elimu juu ya utaratibu wa kupata huduma, kutoa elimu ya afya kuhusiana na magonjwa mbalimbali na pia kuwapa fursa wananchi kutoa maoni na malalamiko juu ya huduma tunazotoa,’’amesema Bw. Aminiel.

Kupitia kauli mbiu hiyo amesema MNH itaeleza ni namna gani wanapambana na vitendo au viashiria vya rushwa katika utoaji wa huduma kwa wananchi na pia kuwaeleza wananchi mipango iliyopo katika kutoa huduma za afya ambazo ni endelevu.

Katika maonesho hayo watalaam waliobobea kutoka maeneo mbalimbali ya Hospitali watakuwepo ambao ni washauri,wachunguzi,tiba na upasuaji ili kukutana na wananchi watakaojitokeza.

Maadhimisho hayo ni moja ya matukio katika kalenda ya Umoja wa Afrika (AU) ambapo nchi wanachama huadhimisha kwa kufanya maonesho ya kazi mbalimbali zinazofanywa na serikali pamoja na taasisi zake na pia kongamano kuhusu masuala ya Utumishi wa Umma.

Maonesho hayo huratibiwa na Ofisi ya Rais Menejiment ya Umma na Utwala Bora ambayo hufanyika kila mwaka kuanzia tarehe 16 hadi 23 Juni.

Picha zote na John Stephen, Hospitali ya Taifa Muhimbili (MNH)

Mkuu wa Kitengo cha Mawasiliano kwa Umma na Huduma kwa Wateja katika Hospitali ya Taifa Muhimbili (MNH), Aminiel Aligaesha akiwaonesha waandishi wa habari idara mbalimbali zitakazoshiriki kwenye maonesho ya maadhimisho ya Wiki ya Utumishi wa Umma 2018. Maonesho hayo yanatarajiwa kuanza tarehe 18 hadi 20 Juni, mwaka huu kwenye viwanja vya Muhimbili.

Waandishi wa habari kutoka vyombo mbalimbali wakiwa kwenye mkutano huo leo.

Mkuu wa Kitengo cha Mawasiliano kwa Umma na Huduma kwa Wateja katika Hospitali ya Taifa Muhimbili (MNH), Aminiel Aligaesha akisisitiza jambo kwa waandhishi wa habari.

--------------------------------------------------------------------------------------------------------------------------------------------------

30 Kufanyiwa Upasuaji wa Mtoto wa Jicho Muhimbili

Dar es Salaam - 28-05-2018

Hospitali ya Taifa Mhimbili (MNH) leo tarehe 28-05-2018 imepokea msaada wa vifaa tiba vyenye thamani ya shilingi milioni 200 vitakavyotumika kuhudumia wagonjwa wenye matatizo ya macho.

Msaada huo ambao unajumuisha kifaa maalum kinachotumika kupima uwezo wa kuona umetolewa na timu ya madaktari wa macho kutoka Japan ambao wamekuja MNH kwa ajili ya kambi maalum ya upasuaji wa macho.

Akikabidhi msaada huo Balozi wa Japan nchini Tanzania, Masaharu Yoshida amesema kwa muda mrefu Japan imekua ikishirikiana na Hospitali ya Taifa Muhimbili katika masuala mbalimbali hivyo ujio wa madaktari hao unazidi kuimarisha ushirikiano wao, lakini pia watalaam wa pande zote mbili wanapata fursa ya kubadilishana uzoefu.

Kwa upande wake Mkurugenzi wa Huduma za Upasuaji MNH, Dkt. Julieth Magandi ambaye amemuwakilisha Mkurugenzi Mtendaji Prof. Lawrence Museru amesema Japan na Muhimbili wamekua na ushirikiano takribani miaka 11 sasa na kwamba wamekuwa wakipeleka watalaam wao MNH kwa ajili ya kufanya upasuaji wa macho wa kibingwa.

“Napenda kutoa shukrani za pekee kwa Ubalozi wa Japan kwa ushirikiano tuliokua nao katika nyanja tofauti, wenzetu wamekua wakileta watalaam hapa na tumekua tukifanya nao kazi na kuzidi kujengeana uwezo,” amesema Dkt. Magandi.

Kuhusu kambi ya upasuaji wa macho amesema kambi hiyo ya siku tatu ambayo imeanza leo jumla ya wagonjwa 30 wenye tatizo la mtoto wa jicho watafanyiwa upasuaji.

Naye Daktari Bingwa wa upasuaji macho Neema Kanyaro amesema katika Kliniki ya macho Muhimbili wataalam huona wagonjwa 15 hadi 20 kwa siku ambao wanatatizo la mtoto wa jicho.

Amesema tatizo hilo ni kubwa hususani kwa watu wazima na lina chukua nafasi ya kwanza katika matatizo ya macho yanayosababisha upofu kwa asilimia kubwa. Hata hivyo tatizo hilo linatibika kwa asilimia 100.

Picha zote na John Stephen, Hospitali ya Taifa Muhimbili (MNH)

Balozi wa Japan nchini Tanzania, Masaharu Yoshida (kushoto) vifaa tiba-Mkurugenzi wa Huduma za Upasuaji wa Hospitali ya Taifa Muhimbili (MNH), Dkt. Julieth Magandi.Wengine ni Mkurungezi wa Hospitali ya Macho nchini Japan, Dkt. Takashi Yamasaki, Mkurugenzi wa Hospitali ya Kojima nchini Japan, Dkt. Yoshihisa Kojima. Balozi huyo amekabidhi vifaa tiba kwa niaba ya timu ya madaktari wa Japan ambao wametoa msaada huo. Madaktari hao wameanza kambi ya siku tatu kwa ajili ya kufanya upasuaji wa mtoto wa jicho katika hospitali hiyo.

Baadhi ya madaktari wakifuatilia tukio hilo leo tarehe 28-05-2018.

Balozi wa Japan nchini Tanzania, Masaharu Yoshida akizungumza kabla ya kukabidhi msaada huo kwa uongozi wa Hospitali ya Taifa Muhimbili (MNH). Kulia ni Mkurugenzi wa Huduma za Upasuaji wa Hospitali ya Taifa Muhimbili (MNH), Dkt. Julieth Magandi na kushoto ni Mkurungezi wa Hospitali ya Macho nchini Japan, Dkt. Takashi Yamasaki.

Baadhi ya madaktari wakifuatilia tukio hilo leo tarehe 28-05-2018.

Balozi wa Japan nchini Tanzania, Masaharu Yoshida akiwa katika picha ya pamoja na viongozi wa Hospitali ya Taifa Muhimbili (MNH) ikiwamo timu ya madaktari kutoka Japan.

--------------------------------------------------------------------------------------------------------------------------------------------------

 

Maria na Consolata Waruhusiwa Leo, Waishukuru Muhimbili

Dar es Salaam - 17-05-2018

Dar es Salaam, Hospitali ya Taifa Muhimbili (MNH) leo imewaruhusu Maria na Consolata waliokuwa wamelezwa katika hispotali hiyo kwa zaidi ya miezi miwili kutokana na afya zao kuimarika.

Pacha hao walikuwa wakipatiwa matibabu na madaktari bingwa wa Muhimbili na leo wamepelekwa Iringa ambako watapokelewa na Mganga Mkuu wa Hospitali ya Mkoa wa Iringa.

Mkurugenzi Mtendaji wa Muhimbili, Prof. Lawrence Museru amesema pacha hao wamesindikizwa na madaktari wa Muhimbili hadi Iringa na kwamba wakiwa huo wataendelea kupatiwa matibabu.

“Consolata na Maria tumewaruhusu leo. Hii ni baada ya madaktari kujiridhisha kwamba afya zao zimeimarika. Wataalamu wetu wamewafanyia vipimo mbalimbali na pia tumewasiliana na wenzetu wa nje na tukakubaliana tuwaruhusu sasa,” amesema Prof. Museru.

Prof. Museru amesema kwamba pacha hao wamepatiwa machine ya CPAP & Oxygen ambayo itawasaidia kuwapatia tiba endapo watahitaji wakati wakiwa Iringa.

Wakizungungumza kwa nyakati tofauti, Consolata amesema kwamba Muhimbili imewapatia huduma nzuri na wanawashukuru wataalamu mbalimbali waliokuwa wakiwapatia matibabu tangu walipolazwa.

Naye Maria akizungumza kwa furaha amesema hivi sasa anajisikia vizuri tofauli na awali-kabla ya kupelekwa katika hispotali hiyo kwa ajili ya matibabu. Pia, amemshukuru mkurugenzi mtendaji wa Muhimbili kwa kuwapatia huduma bora za matibabu.

Picha zote na John Stephen, Hospitali ya Taifa Muhimbili (MNH)

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akizungumza na Maria na Consolata leo kabla ya kuanza safari ya kwenda Iringa. Kushoto ni Mkurugenzi wa Huduma za Tiba Muhimbili, Dkt. Hedwiga Swai na wengine ni wataalamu waliokuwa wakiwapatia matibabu pacha hao.

Kulia ni machine ya CPAP & Oxygen ambayo Maria na Consolata wamepewa endapo watahitaji matibabu yanayotolewa kwa kutumia mashine hiyo.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akiwaaga Maria na Consolata leo.

Maria na Consolata wakisaidiwa kuingizwa kwenye gari ikiwa ni safari ya kuelekea Iringa leo.

--------------------------------------------------------------------------------------------------------------------------------------------------

 

MUHIMBILI KUFUNGA MASHINE YA KUDHIBITI TAKA HATARISHI

Dar es Salaam - 15-05-2018

Hospitali ya Taifa Muhimbili inatarajia kufunga mashine ya kisasa ya utasishaji taka ambayo itapunguza uchomaji wa taka za plastiki ambazo zina madhara kwa binadamu .

Mashine hiyo yenye thamani ya Dola Laki moja imetolewa na Shirika la Umoja wa Mataifa linaloshughulikia Maendeleo (UNDP) hivyo Hospitali ya Taifa Muhimbili itakua hospitali ya kwanza ya Umma kuwa na mashine hiyo.

Akizungumza mara baada ya kupokea ugeni kutoka UNDP ambao umekuja kwa lengo la kukagua utekelezwaji wa mradi wa mazingira , Mkuu wa Idara ya Mazingira MNH Muhandisi Veilla Matee amesema mashine hiyo itafungwa wiki hii na wiki ijayo itaanza kufanya kazi na kutoa fursa kwa kampuni mbalimbali kuja kununua malighafi ambayo hutumika kutengeneza vifaa vya plastiki.

‘’ Tumepokea mashine ya utasishaji kutoka UNDP na mara baada ya kufungwa mashine hiyo tutatoa mafunzo maalum ya kuwajengea uwezo watendaji wetu ili waweze kufanya kazi kwa ufanisi , mbali na kupewa mashine hiyo ya kisasa pia UNDP wametupatia vitendea kazi mbalimbali vya kuhifadhi taka ambavyo vitatusaidia sana katika mradi huu ’’amefafanua Injinia Matee.

Hospitalia ya Taifa Muhimbili kwa siku huzalisha taka hatarishi kilo 800 kutokana na idadi kubwa ya wagonjwa inayowahudumia .

Mradi huo wa mazingira unasimamiwa na Idara ya Mazingira kwa kushirikiana na Kitengo cha Uhakiki na Ubora Muhimbili.

Mkurugenzi Mtendaji wa Hospitali ya Taifa Muhimbili (MNH) Prof. Lawrence Museru akizungumza na ujumbe kutoka Shirika la Umoja wa Mataifa linaloshughulikia Maendeleo (UNDP) ambao umekuja kuangalia utekelezwaji wa mradi wa mazingira . UNDP wametoa msaada wa mashine ya kisasa ya utasishaji ambayo itasaidia kupunguza uchomaji wa taka za plastiki.

Mkuu wa Idara ya Mazingira Muhandisi Veilla Matee akiwasilisha mada kuhusu uzalishaji wa taka Muhimbili kwa wadau mbalimbali wa mazingira ambao wameambatana na ujumbe kutoka UNDP .

Wadau hao wakimsilikiza Muhandisi Matee alipokua akifafanua jambo wakati wa tukio hilo.

Mshauri wa masuala ya Mazingira kutoka UNDP Zambia Bi. Winnie Musonda akiuliza swali mara baada ya kuwasilishwa kwa mada hiyo mapema leo katika Hospitali ya Taifa Muhimbili.

--------------------------------------------------------------------------------------------------------------------------------------------------

 

BALOZI WA IRELAND ASIFU MUHIMBILI KWA KUBORESHA HUDUMA

Dar es Salaam - 14-05-2018

Balozi wa Ireland nchini Paul Sherlock leo ametembelea Hospitali ya Taifa Muhimbili (MNH) kwa lengo la kuona maendeleo ya miradi mbalimbali inayofadhiliwa na Serikali ya Ireland.

Katika ziara hiyo Balozi Sherlock ameambatana na ujumbe wa watu saba wakiwemo wabunge watatu kutoka Kamati ya Bunge ya Hesabu za Serikali nchini Ireland. Ujumbe huo umetembelea jengo la watoto katika wodi ya watoto wenye Saratani na jengo la wazazi namba moja wodi ya watoto wachanga .

Balozi huyo akipatiwa maelezo kuhusu watoto wenye Saratani Mkurugenzi Mtendaji kutoka Tumaini la Maisha (TLM) Dkt. Trish Scanlan amesema TLM wanashirikiana na MNH kuhakikisha wanaokoa maisha ya watoto wenye saratani kwa kuwapatia matibabu stahiki.

Akifafanua amesema ugonjwa wa Saratani kwa watoto ambao unaongoza nchini ni Saratani ya damu, jicho , figo pamoja na saratani ya matezi.

Ameishukuru Serikali ya Ireland kupitia Balozi wake kwa kufadhili mradi wa maji safi na salama ya kunywa katika jengo la watoto, mradi ambao upo katika hatua za utekelezaji .

Kwa upande wake Mkurugenzi Mtendaji wa MNH Prof. Lawrence Museru amesema pamoja na kwamba Tumaini la Maisha imekua ikisaidia kuhudumia watoto hao MNH pia ipo mstari wa mbele kuhakikisha hakuna mtoto anayekosa tiba.

Naye Mkuuu wa Kitengo cha Saratani kwa watoto MNH, Dkt. Rehema Laiti amesema kwa siku MNH hulaza watoto 60 hadi 100 wenye Saratani na pia katika Kliniki ambazo hufanyika Jumatano na Ijumaa wanahudumia watoto wenye Saratani 30 hdi 35 kwa siku.

Katika ziara hiyo Balozi Sherlock ameupongeza uongozi wa MNH kwa jitihada za kuboresha huduma na kuahidi kuwa Ireland itaendeleza ushirikiano uliopo hivi sasa.

Balozi wa Ireland nchini Tanzania, Paul Sherlock akitambulisha ujumbe wa watu saba wakiwamo wabunge watatu wa Kamati ya Hesabu za Serikali ya Ireland kwa Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru alipotembelea hospitali hiyo leo. Balozi huyo ameitembelea MNH leo ili kuona na kupatiwa maelezo ya miradi mbalimbali ya afya inayofadhiliwa na Serikali ya Ireland. Waliosimama nyuma ya Balozi huyo ni watumishi wa MNH wakiwamo wakurugenzi, wakuu wa idara na vitengo.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akizungumza na ujumbe wa watu hao leo.

Mkuu wa Kitengo cha Saratani kwa watoto katika Hospitali ya Taifa Muhimbili, Dkt. Rehema Laiti (kulia) akiwaeleza wabunge wa kamati hiyo jinsi wanavyowahudumia watoto wenye matatizo ya saratani waliolazwa kwenye hospitali hiyo.

Ofisa Mtendaji Mkuu wa Tumaini la Maisha, Dkt. Trish Scanlan akieleza taasisi yake inavyotoa huduma ya tiba kwa watoto wenye saratani ambao wanapatiwa matibabu katika Hospitali ya Taifa Muhimbili.

Mkuu wa Idara ya Watoto Muhimbili, Dkt. Marry Charles akizungumza na ujumbe wa watu hao kabla ya kutembelea wodi ya watoto wachanga leo.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akiwa na Balozi wa Ireland nchini Tanzania, Paul Sherlock katika hospitali hiyo.

Balozi wa Ireland nchini Tanzania, Paul Sherlock akisaini kitabu cha wageni. Kulia ni Mkuu wa Kitengo cha Masiliano kwa Umma na Huduma kwa Wateja, Aminiel Aligaesha na Mkuu wa Idara ya Watoto Muhimbili, Dkt. Marry Charles.

Baadhi ya wajumbe wakijadiliana jambo leo katika Hospitali ya Taifa Muhimbili.

Balozi wa Ireland nchini Tanzania, Paul Sherlock (kushoto) na ujumbe wake wakiwa picha ya pamoja na watendaji wa Hospitali ya Taifa Muhimbili.

--------------------------------------------------------------------------------------------------------------------------------------------------

Msajili Baraza la Uuguzi Tanzania Aanza Kazi Rasmi

Dar es Salaam - 09-05-2018

Msajili wa Baraza la Uuguzi na Ukunga Tanzania, Bi. Agnes Mtawa leo ameanza kazi rasmi baada ya kukabidhiwa ofisi tangu alipoteuliwa kushika nafasi hiyo mwezi uliopita. Bi. Agnes Mtawa anachukua nafasi ya Bi. Lena Mfalila aliyemaliza muda wake.

Awali Bi. Mtawa alikuwa Mkurugenzi wa Huduma za Uuguzi katika Hospitali ya Taifa Muhimbili (MNH) ambapo mwezi uliopita Waziri wa Afya, Maendeleo ya Jamii, Jinsia, Wazee na Watoto, Mhe. Ummy Mwalimu alimteua kuwa Msajili wa Baraza la Uuguzi Tanzania.

Uteuzi huo ulianza rasmi tarehe 16-04-2018 na kwamba utadumu kwa muda wa miaka mitano kuanzia tarehe ya uteuzi.

Nafasi mbalimbali alizowahi kushika katika Hospitali ya Taifa Muhimbili (MNH), Bi. Mtawa ni; Mkuu wa Mafunzo na Uajiri kuanzia mwaka 2004 hadi 2006, Mkuu wa Mafunzo, Utafiti na Elimu kuanzia mwaka 1997 hadi 2004, amewahi kuwa Katibu Mkuu katika baraza la uuguzi na ukunga Tanzania kuanzia 2002 hadi 2011 na mwaka 2007 aliteuliwa Mkuurugenzi wa Uuguzi katika Hospitali ya Taifa Muhimbili hadi mwezi uliopita alipoteuliwa.

Msajili wa Baraza la Uuguzi na Ukunga Tanzania, Bi. Agnes Mtawa akikaribishwa leo ofisini na watumishi wa baraza hilo. Kushoto ni Bi. Jane Mazigo aliyekuwa akikaimu nafasi hiyo akimpatia maua Bi. Agnes Mtawa na kulia ni Happy Masenga anayeshughulika na mafunzo katika baraza hilo.

Bi. Mtawa akitazama zawadi ya maua aliyokabidhiwa na watumishi wa baraza hilo leo.

Msajili akiwa katika picha pamoja na watumishi wa baraza hilo leo. Kutoka kushoto ni Bi. Jane Mazigo na Bi. Happy Masenga.

 

--------------------------------------------------------------------------------------------------------------------------------------------------

Muhimbili, MUHAS Watoa Mafunzo ya Awali kwa Watoa Huduma wa Magonjwa ya Dharura.

Dar es Salaam - 02-05-2018

Wataalamu Bingwa wa Huduma ya Tiba ya Dharura na Ajali wa Hospitali ya Taifa Muhimbili (MNH), Chuo Kikuu cha Sayansi ya Afya na Tiba Shirikishi(MUHAS)kwa kushirikian na Chama cha Wataalamu wa Magonjwa ya Dharura na Ajali Tanzania (EMAT) wameendesha mafunzo ya awali kwa watoa huduma kuhusu ya magonjwa ya dharura na ajali.

Mafunzo hayo ya siku tano yalifanyika kwa watumishi 16 wanaotoka katika hospitali za rufaa katika Manispaa tano za Mkoa wa Dar es Salaam, wakiwamo waaguzi saba, afisa wauguzi wanne, tabibu wasaidizi watatu, Madaktari wasaidizi watatu na daktari mmoja.

Mafunzo hayo yalilenga watoa huduma ambao wamekuwa wakifanya kazi kwenye magari ya wagonjwa (Ambulance) katika Mkoa wa Dar es salaam ikiwa ni maandalizi ya kozi ya wiki sita inayotegemewa kufundishwa na MUHAS kwa kushirikiana na Idara ya Magonjwa ya Tiba ya Dharura na Ajali ya Muhimbili kwa watoa huduma wa ambulance Tanzania.

Katika mafunzo hayo, wanafunzi walifundishwa mafunzo ya nadharia na vitendo kwa baadhi ya mada ambazo zinatarajiwa kutolewa kwenye kozi hiyo ili kuona kama mtaala huo uko tayari na unajitosheleza kuanza kutumika kwa walengwa kabla ya kozi rasmi ya wiki sita kuanza.

Mada zilizofundishwa ni; Basic ambulance safety, Documentation and Communications, Pre hospital trauma, Obstretics emergencies, Patient movement. Mwisho wa mafunzo hayo wanafunzi walipewa vyeti vya ushiriki wa mafunzo hayo.

PICHA NA JOHN STEPHEN, Hospitali ya Taifa Muhimbili

Dkt. Olivia Rusizoka ambaye amemwakilisha Mkurugenzi wa Huduma za Tiba katika Hospitali ya Taifa Muhimbili (MNH), Dkt. Hedwiga Swai akifunga mafunzo ya siku tano yaliowashirikisha wataalamu wa afya wa Magomjwa ya Dharura na Ajali kutoka manispaa tano za Jiji la Dar es Salaam ambayo yaliandaliwa na Muhimbili, EMAT na MUHAS . Kushoto ni Mkuu wa Idara ya Magonjwa ya Dharura na Ajali katika Hospitali ya Taifa Muhimbili, Dkt. Juma Mfinanga na Dkt. Upendo George wakiwa kwenye mkutano wa kufunga mafunzo hayo.

Wataalamu wa kutoa huduma za magonjwa ya Dharura na Ajali wakiwa kwenye mkutano wa mafunzo ya nadharia na vitendo ambayo yamefungwa na Dkt. Rusizoka aliyemuwakilisha Mkurugenzi wa Tiba, Dkt. Hedwigwa Swai.

Mkuu wa Idara ya Magonjwa ya Dharura na Ajali wa Muhimbili, Dkt. Juma Mfinanga akisisitiza madhumuni na umuhimu wa kuendesha mafunzo hayo. Kulia ni Dkt. Rusizoka na Dkt. Upendo.

Wataalamu wanaotoa huduma ya magonjwa ya Dharura na Ajali wakiwa kwenye mafunzo ya vitendo. 

Mmoja wa wataalamu wa kutoa huduma za Magonjwa ya Dharura na Ajali, Fatma Chichiri akipokea cheti kutoka kwa Dkt. Rusizoka. 

Mmoja wa wataalamu wa huduma hizo, Buheri Kiberiti akikabidhiwa cheti baada ya kukamilika kwa mafunzo hayo. 

Mtaalamu wa kutoa huduma za magonjwa ya Dharura na Ajali, Tuma Kanyumbu akipokea cheti kutoka kwa Dkt. Rusizoka. Kushoto ni Msimamizi wa mafunzo hayo, Dkt. Patrick Shayo, Dkt. Juma Mfinanga, Dkt. Rusizoka na Dkt. Upendo Geonge.

Wataalamu wa kutoa huduma za magonjwa ya Dharura na Ajali wakiwa kwenye picha ya pamoja na wakufunzi wao baada ya mafunzo kufungwa na Dkt. Rusizoka.

--------------------------------------------------------------------------------------------------------------------------------------------------

Endeleeni Kutoa Huduma Bora Kwa Wagonjwa

Dar es Salaam - 25-04-2018

Wafanyakazi Hospitali ya Taifa Muhimbili (MNH) wakiwamo madaktari na wauguzi wametakiwa kuendelea kutoa huduma bora kwa wagonjwa na kwamba atakayekwenda kinyume na agizo hilo atachukuliwa hatua na mamlaka husika.

Kauli hiyo imetolewa na Mkurugenzi Mtendaji wa hospitali hiyo, Prof. Lawrence Museru kwenye kikao cha Baraza la Wafanyakazi ambako kulijadiliwa mambo mbalimbali yakiwamo huduma bora kwa wagonjwa, mafanikio, maslahi kwa wafanyakazi na mikakati ya kujenga miundombinu mipya na kukarabati ile ya zamani.

Katika mkutano huo Prof. Museru amewataka wafanyakazi kutoa taarifa za watumishi wenzao wanaotoa huduma zisizoridhisha kwa wagonjwa pamoja na wateja wengine wanaofika MNH kwa ajili ya kupatiwa huduma.

“Watumishi watakaotajwa kwamba wanatoa huduma mbaya kwa wagonjwa na wateja wengine watachukuliwa hatua, lengo ni kuboresha huduma za afya,” amesema Prof. Museru.

Prof. Museru amewasisitiza wafanyakazi kutoa ushirikiano katika mikakati inayoendelea ya kutoa huduma bora za kibingwa ikiwamo upandikizaji wa figo, upandikizaji wa vifaa vya usikivu kwa watoto wasiosikia na huduma mbalimbali za kibingwa.

Mkurugenzi huyo amewaeleza wafanyakazi kwamba hospitali inaendelea kutoa huduma bora za kibingwa ikiwamo upandikizaji wa figo na vifaa vya usikivu kwa watoto.

Amesema hospitali ilifanikiwa kupandikiza figo kwa mgonjwa mmoja na changamoto zilizojitokeza tayari zimefanyiwa kazi na hivyo kuwezesha wagonjwa wanne kupandikizwa figo mwezi huu na kwamba kila mwezi wagonjwa watano watakuwa wakipandikizwa figo.

“Hospitali inaendelea kuboresha miundombinu inayotumika wakati wa upasuaji wa kupandikiza figo na baada ya maboresho haya kila siku mgonjwa mmoja atakuwa akipandikizwa figo.

Katika hatua nyingine, Prof. Museru amesema huduma ya upandikizaji vifaa vya usikivu inaendelea vizuri na kwamba mwishoni mwa mwezi wa tano au wa sita mwanzoni wagonjwa watano watapandikizwa vifaa vya usikivu na kwa mwaka wagonjwa 24 watakuwa wamepatiwa huduma hiyo.

Amesema pia hospitali ipo kwenye mikakati ya kujenga jengo jipya ambalo litatumika kulaza wagonjwa na kutoa huduma mbalimbali ikiwamo upandikizaji wa figo.

Naye Mkurugenzi wa Fedha wa Hospitali hiyo, Gerald Jeremiah amewataka wafanyakazi hao kujenga tabia ya kufuatilia michango yao sehemu husika ili kuweka taarifa vizuri ya mafao yao kabla ya kustaafu.

Mkurugenzi Mtendaji wa Hospitali ya Taifa Muhimbili (MNH). Prof. Lawrence Museru akiongoza kikao cha Baraza la Wafanyakazi la hospitali hiyo jana. Kushoto ni Katibu Msaidizi wa baraza hilo, Merina Rwechungura na kulia ni Katibu wa Baraza hilo, Elineza Msuya.

Wajumbe wakipitia makabrasha kwenye mkutano huo.

Mwakilishi wafanyakazi wa hospitali hiyo, Judith Nyaruga akichangia mada kwenye mkutano huo jana.

Baadhi ya wajumbe wakifuatilia mada zilizokuwa zikitolewa na wawakilishi wa wafanyakazi.

Mmoja wa wajumbe wa baraza hilo, Deus Buma akichangia mada kwenye mkutano huo.

Wajumbe wakiwa kwenye kikao hicho.

--------------------------------------------------------------------------------------------------------------------------------------------------

 

Muhimbili Yapandikiza Figo Wagonjwa Wanne

Dar es Salaam - 19-04-2018

Hospitali ya Taifa Muhimbili (MNH) imefanikiwa kupandikizia figo wagonjwa wa nne ikiwa ni mara ya pili kutoa matibabu hayo ya ubingwa wa juu nchini.

Upasuaji huo umefanywa na wataalam wa Muhimbili kwa kushirikiana na wataalam kutoka Hospitali ya BLK ya nchini India na umekua na mafanikio makubwa kwani wagonjwa wote hali zao zinaendelea vizuri .

Akizungumza na waandishi wa habari leo jijini Dar es salaam Mkurugenzi Mtendaji wa MNH Profesa Lawrence Museru amesema Novemba mwaka jana Muhimbili iliweka historia kwa kufanya upasuaji mkubwa na wa kwanza nchini kwa lengo la kuunga mkono juhudi za serikali ya awamu ya tano za kupunguza rufaa za wagonjwa kwenda kutibiwa nje ya nchi.

Akifafanua amesema upasuaji huo wa figo ukifanyika nchini unagharimu Shilingi Milioni 21 na endapo mgonjwa akipelekwa nchini India matibabu yake yanagharimu Shilingi Milioni 80 hadi Shilingi milioni 100.

“Shughuli hii inatuonyesha kwamba hospitali sasa inaweza kupandikiza figo na lengo letu ni kuhakikisha huduma hii inakua endelevu ili kuokoa fedha za serikali kupeleka wagonjwa kutibiwa nje ya nchi na pia kuwafikia Watanzania wengi ambao wanahitaji kupandikizwa figo,’’amesema Profesa Museru.

Amesema Hospitali ya Muhimbili itaendelea na shughuli hiyo na kwamba kila mwezi itapandikiza figo kwa wagonjwa watano hivyo kwa mwaka itafanikiwa kupandikiza figo wagonjwa 60.

‘’Mipango endelevu ni kuwa na sehemu maalum ya upandikizaji figo na hivi karibuni MNH itaanza ujenzi wa jengo jipya la kulipia hivyo katika jengo hilo tutatenga sehemu maalum ya upandikizaji figo,’’ amesema Profesa Museru.

Kwa upande wake Mkurugenzi wa huduma za figo kutoka hospitali ya BLK Dk.Prakash Sunil amesema ndoto yake ni kuona huduma ya upandikizaji figo Muhimbili inakua endelevu na yenye mafanikio.

Naye Daktari Bingwa wa Magonjwa ya Figo kutoka Hospitali ya Taifa Muhimbili, Dk.Onesmo Kisanga amewataka Watanzania kuzingatia ulaji unaofaa na kufanya mazoezi ili kuepuka magonjwa yasiyoambukiza ikiwemo kisukari na presha ambayo yanachangia kuleta magonjwa ya figo.

Kwa mujibu wa Dk. Kisanga nchini Tanzania kuna wagonjwa 800 ambao wapo katika huduma ya kusafisha damu.

--------------------------------------------------------------------------------------------------------------------------------------------------

Muhimbili Yapokea Msaada wa Vifaa Tiba

Dar es Salaam - 10-04-2018

Hospitali ya Taifa Muhimbili (MNH) leo imepokea msaada wa vifaa tiba kutoka Mamlaka ya Usimamizi wa Bandari Tanzania (TPA) wenye thamani ya shilingi milioni kumi.

Kaimu Mkurugenzi Mkuu wa TPA, Bi. Nuru Mhando amesema mamlaka hiyo inatambua na kuthamini dhamira na kazi kubwa inayofanywa na Serikali ya Awamu ya Tano ya kufikisha huduma mbalimbali za kijamii kwa wananchi wote hivyo imeamua kuunga mkono juhudi hizo kwa kutoa msaada wa viti vya kubebea wagonjwa na vipima joto vya kisasa .

‘’Kwa kutambua hilo mamlaka imeona ni vyema iunge mkono juhudi hizi katika wiki hii ambayo tupo kwenye shamrashamra za kuadhimisha miaka kumi na tatu tangu TPA ianzishwe, Aprili 15 ,2005, Mamlaka imeona ni vyema kusheherekea kumbukumbu hizi kwa kutoa mchango huu ili kusaidia wagonjwa katika jengo la watoto.

‘’Tunaamini msaada huu utasaidia kuhudumia watoto wengi kwa wakati mmoja na hivyo kutatua changamoto ya ukosefu wa vifaa hivi ambavyo mnakabiliana navyo,’’amesema Kaimu Mkurugezi huyo wa TPA.

Kwa upande wake Mkurugenzi wa huduma za uuguzi katika Hospitali ya Taifa Muhimbili (MNH), Agness Mtawa ambaye amemuwakilisha Mkurugenzi Mtendaji wa MNH, amesema msaada huo utaongeza kasi ya utoaji huduma kwa watoto.

Amefafanua kwamba jengo la watoto lina vitanda takribani 300 hivyo mahitaji ya viti vya kubebea wagonjwa pamoja na mahitaji mengine ni makubwa.

“Tunawashukuru TPA kwa msaada huu mliotupatia , mmeongeza kasi ya utoaji huduma niwahakikishie kwamba msaada huu utatumika kama ambavyo imekusudiwa,’’amesema Mkurugenzi Mtawa.

Ametoa rai kwa wadau wengine kujitokeza kuchangia huduma za afya na kuunga mkono juhudi za serikali za kuboresha huduma hizo

Mkurugenzi wa Huduma za Uuguzi, Bi. Agness Mtawa (kulia) wa Hospitali ya Taifa Muhimbili (MNH) akipokea msaada wa viti 20 vya kubebea wagonjwa kutoka kwa Kaimu Mkurugenzi Mkuu, Bi. Nuru Mhando wa Mamlaka ya Bandari Tanzania (TPA).

Kaimu Mkurugenzi Mkuu wa Mamlaka ya Bandari Tanzania (TPA), Nuru Mhando (kushoto) na Mkurugenzi wa Huduma za Uuguzi, Bi. Agness Mtawa (kulia) wakiwasukuma watoto wanaopatiwa matibabu katika hospitali hiyo.

Kaimu Mkurugenzi Mkuu wa Mamlaka ya Bandari Tanzania (TPA), Nuru Mhando (wa tano kushoto) na Mkurugenzi wa Huduma za Uuguzi, Bi. Agness Mtawa wa Muhimbili wakiwa katika picha ya pamoja.

--------------------------------------------------------------------------------------------------------------------------------------------------

Mbuge Ali Khamis Aipongeza Muhimbili Kuponya Mwanae

Dar es Salaam - 09-04-2018

Mbunge wa Jimbo la Mwanakwerekwe Mh. Ali Salim Khamis leo ameipongeza Hospitali ya Taifa Muhimbili (MNH) pamoja na watalaam wake wote kwa jinsi walivyompokea mtoto wake na kumpa huduma stahiki.

“Leo natoa shukrani zangu za dhati kwa MNH na kukabidhi barua ya shurakni na cheti cha utambuzi wa huduma nzuri aliyopewa mwanangu Muniri Ali Salim tangu alivyopokelewa kupitia Idara ya Magonjwa ya Dharura na kisha kupelekwa Idara ya Upasuaji Kitengo cha Upasuaji wa watoto. Mtoto wetu alikuwa na uvimbe kichwani ambao ulisababisha afanyiwe upasuaji na kutolewa vizuri, sasa mtoto wetu anaendelea vizuri sana,” amesema Mh. Khamis.

Amepongeza kazi nzuri inayofanywa na MNH chini ya usimamizi wa Mkurugenzi Mtendaji, Prof. Lawrence Museru kwa kushirikiana na wauguzi, madaktari na watalaam wengine ambao wamekuwa wakijitoa kutoa huduma nzuri kwa mtoto wake pamoja na wahitaji wengine wanaofika MNH kupata huduma.

“Nimeamua kutoa barua ya shukrani kwenu, cheti cha utambuzi kwa MNH, Idara ya Upasuaji kupitia Kitengo cha Upasuaji Watoto, Idara ya Magonjwa ya Dharura na kipekee kwa Dkt. Juma Mfinanga ambaye ni daktari Bingwa wa Magonjwa ya Dharura pamoja na Dkt. Zaitun Bhokare ambaye ni daktari bingwa wa upasuaji watoto kwa kazi nzuri ambayo imefanikisha matibabu kwa mtoto wetu,” amesema Mh. Khamis.

Akipokea cheti na barua kwa niaba ya MNH, Kaimu Mkurugenzi Mtendaji Bw. Makwaia Makani amemshukuru Mh. Khamis kwa utambuzi na kutoa mrejesho chanya kutokana na huduma ya matibabu aliyopatiwa mtoto wake.

“Sisi kama watoa huduma tunapokea maoni aina zote, lakni maoni ya kupongeza ni machache ukilinganisha na maoni mengine. Hivyo hii imetupa hamasa kubwa sana na watalaam wetu wamefurahi,” amesema Bw. Makani.

Daktari Bingwa wa Upasuaji Dkt. Zaituni Bokhari amesema walimpokea mtoto Munira Ali Salim mwezi mmoja uliopita na baada ya kumfanyia uchunguzi waligundua alikuwa na uvimbe kichwani (kichogoni) na hivyo kumpatia huduma ya upasuaji.

Dkt. amesema kuwa baada ya kujiridhisha kwamba ana uvimbe huo kwenye ubongo waliamua kumfanyia upasuaji na kutoa uvimbe huo. Dkt. Bhokari anasema mara baada ya upasuaji mtoto aliendelea vizuri na hatimaye kuruhusiwa kwenda nyumbani.

Picha na John Stephen, Hospitali ya Taifa Muhimbili

Mkurugenzi wa Rasilimali Watu na Utawala, Makwaia Makani akipokea cheti cha utambuzi wa huduma zinazotolewa na Hospitali ya Taifa Muhimbili (MNH) kutoka kwa Mbunge wa Jimbo la Mwanakwerekwe- Zanzibar, Ali Salim Khamis ambaye mtoto wake alipatiwa huduma ya matibabu katika hospitali hiyo.

Daktari Bingwa wa Upasuaji Watoto katika Hospitali ya Taifa ya Muhimbili (MNH), Dkt. Zaitun Bokhary akipokea cheti cha utambuzi wa huduma kutoka kwa Mbunge wa Jimbo la Mwanakwerekwe- Zanzibar, Ali Salim Khamis.

Daktari Bingwa wa Magonjwa ya Dharura na Ajali, Dkt. Kefa akipokea cheti cha utambuzi kwa niaba ya Dkt. Juma Mfinanga ambaye ni Mkuu wa Idara ya Magonjwa ya Dharura na Ajali katika hospitali hiyo.

Kutoka kushoto ni Mkurugenzi wa Rasilimali Watu na Utawala, Makwaia Makani akiwa katika picha ya pamoja na Mbunge Ali Salim Khamis wa Jimbo la Mwanakwerekwe na madaktari wa hospitali hiyo.

Cheti cha utambuzi wa huduma kilichotolewa kwa hospitali hiyo.

Cheti cha utambuzi alichokabidhiwa Dkt. Zaitun Bokhary.

Cheti cha utambuzi alichokabidhiwa Dkt. Juma Mfinanga.

--------------------------------------------------------------------------------------------------------------------------------------------------

Serikali Kuboresha Michezo Taasisi Afya

Dar es Salaam - 03-04-2018

Serikali imesema itaendelea kuboresha michezo sehemu za kazi ili kuifanya iwe endelevu na kuwawezesha watumishi wengi kushiriki.

Kauli hiyo imetolewa na Naibu Mkurugenzi Mkuu-Kitengo cha Utafiti Zanzibar, Hamisi Rashid Mohamed wakati alipokua akizungumza katika hafla ya kufunga tamasha la michezo ya Pasaka 2018, iliyoshirikisha timu za michezo kutoka Wizara ya afya Zanzibar, Hospitali ya Taifa Muhimbili (MNH) , Taasisi ya Tiba ya Mifupa Muhimbili (MOI) pamoja na Chuo Kikuu cha Afya na Sayansi Shirikishi Muhimbili (MUHAS).

Amesema michezo hiyo ni ya muda mrefu ilianzishwa mwaka 1972 na kwamba hakuna budi kuindeleza na kuiboresha zaidi ili kuleta hamasa kwa wanamichezo wa taasisi hizo kushiriki kwa wingi.

Kwa upande wake Mkurugenzi wa Rasilimali watu na Utawala Bw. Makwaia Makani ambaye amemuwakilisha Mkurugenzi Mtendaji wa MNH Prof. Lawrence Museru amesema ushiriki wa michezo ni jambo zuri kwani inawaepusha vijana kujiingiza kwenye mambo yasiyofaa.

Amesisitiza mipango iliyopo katika Hospitali ya Taifa Muhimbili ni kuhakikisha michezo hiyo inaboreshwa na kutoa fursa kwa watumishi wengi kushiriki.

‘’Hospitali ya Taifa Muhimbili inaipa kipaumbele michezo na nina ahidi kwamba mapungufu yote yaliyopo tutayafanyia kazi kikamilifu na michezo hii tutaendelea kuiboresha,’’ amesema Mkurugenzi Makani.

Tamasha la michezo ya Pasaka lilianza Machi 30, 2018 na kumalizika Aprili 2 , 2018 likihusisha mchezo wa mpira wa miguu ,pete pamoja na kuvuta kamba .

Tamasha hilo mwakani litafanyika Visiwani Zanzibar.

Picha na John Stephen, Hospitali ya Taifa Muhimbili

Mkurugenzi wa Rasilimali Watu na Utawala wa Hospitali ya Taifa Muhimbili (MNH), Bw. Makwaia Makani akizungumza kwenye tafrija ya kuwaaga wachezaji wa Timu ya Michezo ya Hospitali ya Taifa Muhimbili (MNH), timu ya Wizara ya Afya Zanzibar, Taasisi ya Tiba ya Mifupa Muhimbili (MOI) na Chuo Kikuu cha Afya na Sayansi Shirikishi Muhimbili (MUHAS) baada ya timu hizo kushiriki tamasha la Michezo ya Pasaka 2018.

Baadhi ya wachezaji na wafanyakazi wa Hospitali ya Taifa Muhimbili (MNH) wakimsikiliza Mkurugezi wa Hospitali ya Taifa Muhimbili (MNH), Bw. Makani wakati akizungumza nao.

Naibu Mkurugenzi Mkuu wa Kitengo cha Utafiti- Zanzibar, Hamisi Rashidi Mohamed akizungumza kwenye tafrija ya kuwaaga wachezaji wa timu ya Wizara ya Afya Zanzibar na Timu ya Michezo ya Hospitali ya Taifa Muhimbili (MNH).

Mkurugenzi wa Rasilimali Watu na Utawala katika Hospitali ya Taifa Muhimbili (MNH), Bw. Makwaia Makani na Naibu Mkurugenzi Mkuu wa Kitengo cha Utafiti- Zanzibar, Hamisi Rashidi Mohamed akiwa kwenye picha ya pamoja na wachezaji wa timu hizo baada ya kumalizika kwa tafrija hiyo.

--------------------------------------------------------------------------------------------------------------------------------------------------

Waziri Hamad Rashid Awataka Viongozi Kudumisha Michezo

Dar es Salaam - 30-03-2018

Waziri wa Afya Zanzibar, Hamad Rashid Mohamed leo amefungua tamasha la michezo ya Pasaka inayohusisha timu za michezo kutoka Wizara ya afya Zanzibar , Hospitali ya Taifa Muhimbili (MNH) , Taasisi ya Tiba ya Mifupa Muhimbili (MOI) pamoja na Chuo Kikuu cha Afya na Sayansi Shirikishi Muhimbili (MUHAS).

Akizungumza wakati wa ufunguzi wa tamasha hilo Mhe. Hamad Rashid Mohamed amesema afya bora hujengwa na michezo hivyo amewataka viongozi kuendeleza michezo katika taasisi zao ili watumishi wawe na afya bora hatua itakayowawezesha kufanya kazi kwa ufanisi.

‘’Ukiwa na afya bora hata hutendaji wako wa kazi utakuwa na ufanisi mkubwa hivyo nawasihi muendeleze michezo ili kuendelea kujenga taifa letu,’’ amesema Mh. Rashid.

Mbali na hilo lakini pia amesema katika historia ya nchi yetu michezo imekua kielelezo muhimu katika kudumisha undugu , umoja , mshikamo na muungano wetu.

Kwa upande wake Mkurugenzi wa Rasilimali watu na Utawala Bw. Makwaia Makani ambaye amemwakilisha Mkurugenzi Mtendaji wa MNH Prof. Lawrence Museru , amesema Tamasha hilo la michezo hufanyika kila mwaka ambapo kwa mwaka huu MNH ni wenyeji na mwakani iltafanyika Visiwani Zanzibar.

“Imekua utamaduni wetu kila mwaka kushiriki katika michezo hii kwa lengo la kuendeleza ushirikiano wetu wa muda mrefu ,pia niseme tu michezo ni kitu muhimu kwa mwanadamu kwani hutujenga afya na akili,’’ amesema Bw. Makani.

Tamasha hilo linahusisha mchezo wa mpira wa miguu na pete na pamoja na mambo mengine shughuli mbalimbali zitafanyika ikiwemo zoezi la kuchangia damu na kusafisha maeneo mbalimbali ya Hospitali ya Taifa Muhimbili. Tamasha hilo limeanza leo na litamalizika Aprili 2 , 2018.

Picha na John Stephen, Hospitali ya Taifa Muhimbili

Waziri wa Afya Serikali ya Mapinduzi Zanzibar, Mhe. Ahamad Rashid Mohamed akiwasalimia wachezaji wa Timu ya Wizara ya Afya Zanzibar na Taasisi ya Tiba ya Mifupa Muhimbili (MOI) katika Uwanja wa Chuo Kikuu cha Afya na Sayansi Shirikishi Muhimbili (MUHAS) jijini Dar es Salaam.

Mh. Ahamad Rashid Mohamed akipiga mpira ikiwa ni ushara ya kufungua tamasha la michezo ambalo linafanyika Chuo Kikuu cha Afya na Sayansi Shirikishi Muhimbili (MUHAS).

Wachezaji wa Taasisi ya Tiba ya Mifupa Muhimbili (waliovaa jezi nyekundu) wakielekea katika lango la wapinzani wao.

Kutoka kushoto Mwalimu wa timu mpira wa pete, Mwajuma Kisengo, Mh. Ahamad Rashid Mohamed na Mkurugenzi wa Rasilimali watu na Utawala (DHR) katika Hospitali ya Taifa Muhimbili (MNH), Makwaia Makani wakifuatilia tamasha hilo leo kwenye uwanja wa MUHAS.

Mshiriki kutoka timu ya Afya Zanzibar, Juma Haji Mlekwa, akichangia damu leo kabla ya kuanza kwa mpira wa miguu kati ya timu ya Afya Zanzibar na Taasisi ya Tiba ya Mifupa Muhimbili (MOI).

Mwalimu wa mpira wa pete kutoka Hospitali ya Taifa Muhimbili (MNH), Mwajuma Kisengo akichangia damu kabla ya kuanza kwa mpira wa miguu kati ya timu ya Afya Zanzibar na Taasisi ya Tiba ya Mifupa Muhimbili (MOI)

--------------------------------------------------------------------------------------------------------------------------------------------------

Muhimbili Yapokea Msaada wa Vitanda na Magodoro

Dar es Salaam - 20-03-2018

Hospitali ya Taifa Muhimbili (MNH) leo imepokea msaada wa vitanda 14, magodoro 12 pamoja na drip stands kutoka Australia Tanzania Society ambavyo vitasaida kuimarisha utoaji wa huduma hospitalini hapo.

Akipokea msada huo jijini Dar es Salaam kwa niaba ya Mkurugenzi Mtendaji wa MNH, Mkurugenzi wa Huduma za Upasuaji Dkt. Juliethi Magandi amesema kwa muda mrefu hospitali imekua na ushirikiano na tasisi hiyo katika masuala mbalimbali ikiwemo kufanya upasuaji wa ubingwa wa juu.

“Kipekee nichukue fursa hii kuwashukuru rafiki zetu hawa Australia Tanzania Society kwa msaada huu walioutoa kwani tumekua tukishirikiana kwa zaidi ya miaka mitatu sasa,”. amesema Dkt. Magandi.

Amesema Hospitali ya Taifa Muhimbili ina jumla ya vitanda 1,507 na kwamba kina mama wajawazito na watoto pekee wanatumia karibu ya nusu ya vitanda hivyo. “Hivyo msaada huo umekuja wakati muafaka kwani hospitali bado ina mahitaji kutokana na kutoa huduma zake kila siku kwa saa 24,”.

“Kati ya vitanda hivi 14 tulivyopewa leo, sita tumevileta wodi 35 kwa ajili ya kina mama na vingine 8 tumepeleka ICU namba moja na ICU namba mbili’’ amefafanua Dkt. Magandi.

Kwa upande wake Mkurugenzi wa Australia Tanzania Society, James Chialo amesema msaada huo umegharimu zaidi ya shilingi milioni 25 na kwamba lengo ni kuboresha huduma za afya hususani katika hospitali za Umma.

“Kutoa ni moyo si utajiri tutaendelea kushirikiana katika kuboresha huduma za afya kadiri hali inavyoruhusu nitoe wito kwa wadau wengine kuendelea kushirikiana ili tuboreshe huduma za afya nchini ‘’amesema Bwana Chialo.

Picha na John Stephen, Hospitali ya Taifa Muhimbili

Mkurugenzi wa Huduma za Upasuaji katika Hospitali ya Taifa Muhimbili (MNH), Dkt. Julieth Magandi akizungumza katika mkutano na waandishi wa habari kabla kukabidhiwa vitanda 14 na magodoro 12 ambayo yametolewa na Australia Tanzania Society. Kulia ni Mkurugenzi wa Australia Tanzania Society, James Chialo na kushoto ni Mkuu wa Idara ya Uuguzi na Mazingira Muhimbili, Zuhura Mawona.

Muuguzi Alice Msonda na Velena Joahackim wakitandika kitanda baada ya kukabidhiwa vitanda na magodoro na Australia Tanzania Society.

Mkurugenzi wa Australia Tanzania Society, James Chialo akimkabidhi Mkurugenzi wa Huduma za Upasuaji wa Muhimbili, Dkt. Julieth Magandi vitanda 14 leo. Katikati ni Mkuu wa Idara ya Uuguzi na Mazingira Muhimbili, Zuhura Mawona.

Mkurugenzi wa Australia Tanzania Society, James Chialo akizungumza na waandishi wa habari leo kabla ya kukabidhi vitanda hivyo.

--------------------------------------------------------------------------------------------------------------------------------------------------

 

Watoto 6 Wawashiwa Vifaa vya Usikivu (Cochlear Implant)

Dar es Salaam - 25-02-2018

Watoto sita ambao wamewekewa vifaa vya usikivu Januari mwaka huu katika Hospitali ya Taifa Muhimbili (MNH) leo wameanza kusikia kwa mara ya kwanza baada ya kuwashiwa vifaa hivyo.

Kuwashwa kwa vifaa hivyo kumeleta furaha kwa wazazi kwani wameshuhudia watoto wao wakisikia sauti kwa mara ya kwanza na hivyo kuwajengea matumaini ya watoto hao kuanza maisha mapya.

Zoezi la kuwawashia vifaa hivyo (Switch On) limefanyika leo katika Hospitali ya Taifa Muhimbili kwa kushirikiana na wataalaam kutoka Medel Austria ambao ndio wasambazaji wa vifaa hivyo.

Akizungumza na waandishi wa habari , Mkuu wa Idara ya Magonjwa ya Pua, Koo na Masikio Dkt. Edwin Liyombo amesema watoto hao walifanyiwa upasuaji wa upandikizaji kifaa cha usikivu Januari mwaka huu ambapo zaidi ya asilimia 80 ya upasuaji huo ulifanywa na watalaam wa Hospitali ya Taifa ya Muhimbili .

‘’Watoto hawa wataanza maisha mapya ya kusikia sauti mbalimbali katika mazingira yanayowazunguka baada ya kuunganisha vifaa hivi na kuviwasha’’. Amesema Dkt. Liyombo

Akifafanua amesema mbali na watoto hao sita lakini pia watoto wengine watano ambao walifanyiwa upasuaji huo mwaka jana na wengine sita ambao walifanyiwa upasuaji huo nchini India nao wamekuja kufuatiliwa maendeleo yao ili kubaini changamoto zinazowakabili na kupewa ushauri wa kitaalam.

Akielezea ukubwa tatizo Dkt. Liyombo amesema takwimu za Shirika la Afya Ulimwenguni (WHO) zinaonesha kuwa katika watoto 1,000 wanaozaliwa, inakadiriwa kuwa watoto watano wanazaliwa na tatizo kubwa la usikivu .

Pia amesema MNH ipo kwenye mchakato wa kuanzisha utaratibu wa kuwachunguza watoto wachanga ili kubaini mapema wenye matatizo yakutosikia.

Kwa upande wake Muwakilishi kutoka Medel Fayaz Jafar amesema upasuji huo umekua na mafanikio makubwa kwakua katika awamu hiyo kumekua na mabadiliko kwani asilimia kubwa ya upasuaji umefanywa na watalaam wa MNH na kwamba hatua hiyo ni ya kuridhisha.

Huduma ya Upandikizaji wa kifaa cha usikivu (Cochlear Implant) ilizinduliwa Juni 7 , 2017 na Waziri wa Afya, Maendeleo ya Jamii , Jinsia , Wazee na Watoto Mheshimiwa Ummy Mwalimu hivyo Tanzania imekuwa nchi ya pili kutoa huduma hiyo katika nchi za Ukanda wa Afrika Mashariki baada ya Kenya. Aidha Tanzania imekuwa nchi ya kwanza kutoa huduma hiyo kupitia Hospitali ya Umma ambayo ni Muhimbili yenye hadhi ya ubingwa wa hali ya juu.

Picha na John Stephen, Hospitali ya Taifa Muhimbili

Mtaalam wa Huduma ya Usikivu katika Hospitali ya Taifa Muhimbili (MNH), Mathayo Majogoro Alfred (katikati) akiunganisha kifaa cha usikivu cha nje na cha ndani ili mtoto Matilda Katobesi aweze kusikia kwa mara ya kwanza. Kulia ni Daktari Bingwa wa Magonjwa ya Pua, Koo na Masikio, Dkt. Edwin Liyombo akifuatilia na kushoto ni mama wa mtoto huyo, Angelina Cosmas.

Mtoto Matilda kwa mara ya kwanza leo tarehe 24, Januari, 2018 akianza kutamka baadhi ya maneno baada ya kufundishwa na mtaalamu wa sauti kutoka Hospitali ya Taifa Muhimbili.

Daktari Bingwa wa Magonjwa ya Pua, Koo na Masikio, Dkt. Edwin Liyombo wa Muhimbili akizungumza na waandishi wa habari kuhusu kuwasha kwa mara ya kwanza vifaa vya usikivu kwa watoto waliofanyiwa upasuaji na kupandikizwa vifaa hivyo katika hospitaili hiyo. Kuanzia kushoto ni Mkuu wa Idara ya Macho, Dkt. Baruani, Katibu wa Umoja wa Watoto na Wazazi Wanaonufaika na Vifaa vya Usikivu nchini, Bupe Mwakalambile na Mkuu wa Kitengo cha Mawasiliano kwa Umma na Huduma kwa Wateja, Bwana Aminiel Aligaesha.

Wazazi wakisubiri kuashwa kwa mara ya kwanza kwa vifaa vya usikivu katika hospitali hiyo.

Mtaalamu wa Sauti, Fayaz Jaffer akionyesha kifaa cha usikivu (Cochlear Implant) kwa waandishi wa habari ambacho kinapandikizwa kwa mtoto mwenye tatizo la kusikia. Kulia ni Paul Khalil kutoka Kampuni ya Medel. Kuanzia kushoto ni Dkt. Edwin Liyombo, Dkt. Baruani, Bi. Bupe Mwakalambile na Bwana Aminiel Aligaesha wakiwa kwenye mkutano huo leo.

Wazazi wa watoto wenye matatizo ya kusikia wakiwa kwenye mkutano huo leo.

Other Menu
Useful Links
Polls
How do you rate our site?
Visitor Counter

Today 28

Yesterday 178

This Week 563

This Month 1985

All 93296

Kubik-Rubik Joomla! Extensions