This email address is being protected from spambots. You need JavaScript enabled to view it. +255 222151367/9

Staff EmailFacebook Google Plus Red Cap

 

News and Announcements 

 

Maria na Consolata Waruhusiwa Leo, Waishukuru Muhimbili

Dar es Salaam - 17-05-2018

Dar es Salaam, Hospitali ya Taifa Muhimbili (MNH) leo imewaruhusu Maria na Consolata waliokuwa wamelezwa katika hispotali hiyo kwa zaidi ya miezi miwili kutokana na afya zao kuimarika.

Pacha hao walikuwa wakipatiwa matibabu na madaktari bingwa wa Muhimbili na leo wamepelekwa Iringa ambako watapokelewa na Mganga Mkuu wa Hospitali ya Mkoa wa Iringa.

Mkurugenzi Mtendaji wa Muhimbili, Prof. Lawrence Museru amesema pacha hao wamesindikizwa na madaktari wa Muhimbili hadi Iringa na kwamba wakiwa huo wataendelea kupatiwa matibabu.

“Consolata na Maria tumewaruhusu leo. Hii ni baada ya madaktari kujiridhisha kwamba afya zao zimeimarika. Wataalamu wetu wamewafanyia vipimo mbalimbali na pia tumewasiliana na wenzetu wa nje na tukakubaliana tuwaruhusu sasa,” amesema Prof. Museru.

Prof. Museru amesema kwamba pacha hao wamepatiwa machine ya CPAP & Oxygen ambayo itawasaidia kuwapatia tiba endapo watahitaji wakati wakiwa Iringa.

Wakizungungumza kwa nyakati tofauti, Consolata amesema kwamba Muhimbili imewapatia huduma nzuri na wanawashukuru wataalamu mbalimbali waliokuwa wakiwapatia matibabu tangu walipolazwa.

Naye Maria akizungumza kwa furaha amesema hivi sasa anajisikia vizuri tofauli na awali-kabla ya kupelekwa katika hispotali hiyo kwa ajili ya matibabu. Pia, amemshukuru mkurugenzi mtendaji wa Muhimbili kwa kuwapatia huduma bora za matibabu.

Picha zote na John Stephen, Hospitali ya Taifa Muhimbili (MNH)

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akizungumza na Maria na Consolata leo kabla ya kuanza safari ya kwenda Iringa. Kushoto ni Mkurugenzi wa Huduma za Tiba Muhimbili, Dkt. Hedwiga Swai na wengine ni wataalamu waliokuwa wakiwapatia matibabu pacha hao.

Kulia ni machine ya CPAP & Oxygen ambayo Maria na Consolata wamepewa endapo watahitaji matibabu yanayotolewa kwa kutumia mashine hiyo.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akiwaaga Maria na Consolata leo.

Maria na Consolata wakisaidiwa kuingizwa kwenye gari ikiwa ni safari ya kuelekea Iringa leo.

--------------------------------------------------------------------------------------------------------------------------------------------------

 

MUHIMBILI KUFUNGA MASHINE YA KUDHIBITI TAKA HATARISHI

Dar es Salaam - 15-05-2018

Hospitali ya Taifa Muhimbili inatarajia kufunga mashine ya kisasa ya utasishaji taka ambayo itapunguza uchomaji wa taka za plastiki ambazo zina madhara kwa binadamu .

Mashine hiyo yenye thamani ya Dola Laki moja imetolewa na Shirika la Umoja wa Mataifa linaloshughulikia Maendeleo (UNDP) hivyo Hospitali ya Taifa Muhimbili itakua hospitali ya kwanza ya Umma kuwa na mashine hiyo.

Akizungumza mara baada ya kupokea ugeni kutoka UNDP ambao umekuja kwa lengo la kukagua utekelezwaji wa mradi wa mazingira , Mkuu wa Idara ya Mazingira MNH Muhandisi Veilla Matee amesema mashine hiyo itafungwa wiki hii na wiki ijayo itaanza kufanya kazi na kutoa fursa kwa kampuni mbalimbali kuja kununua malighafi ambayo hutumika kutengeneza vifaa vya plastiki.

‘’ Tumepokea mashine ya utasishaji kutoka UNDP na mara baada ya kufungwa mashine hiyo tutatoa mafunzo maalum ya kuwajengea uwezo watendaji wetu ili waweze kufanya kazi kwa ufanisi , mbali na kupewa mashine hiyo ya kisasa pia UNDP wametupatia vitendea kazi mbalimbali vya kuhifadhi taka ambavyo vitatusaidia sana katika mradi huu ’’amefafanua Injinia Matee.

Hospitalia ya Taifa Muhimbili kwa siku huzalisha taka hatarishi kilo 800 kutokana na idadi kubwa ya wagonjwa inayowahudumia .

Mradi huo wa mazingira unasimamiwa na Idara ya Mazingira kwa kushirikiana na Kitengo cha Uhakiki na Ubora Muhimbili.

Mkurugenzi Mtendaji wa Hospitali ya Taifa Muhimbili (MNH) Prof. Lawrence Museru akizungumza na ujumbe kutoka Shirika la Umoja wa Mataifa linaloshughulikia Maendeleo (UNDP) ambao umekuja kuangalia utekelezwaji wa mradi wa mazingira . UNDP wametoa msaada wa mashine ya kisasa ya utasishaji ambayo itasaidia kupunguza uchomaji wa taka za plastiki.

Mkuu wa Idara ya Mazingira Muhandisi Veilla Matee akiwasilisha mada kuhusu uzalishaji wa taka Muhimbili kwa wadau mbalimbali wa mazingira ambao wameambatana na ujumbe kutoka UNDP .

Wadau hao wakimsilikiza Muhandisi Matee alipokua akifafanua jambo wakati wa tukio hilo.

Mshauri wa masuala ya Mazingira kutoka UNDP Zambia Bi. Winnie Musonda akiuliza swali mara baada ya kuwasilishwa kwa mada hiyo mapema leo katika Hospitali ya Taifa Muhimbili.

--------------------------------------------------------------------------------------------------------------------------------------------------

 

BALOZI WA IRELAND ASIFU MUHIMBILI KWA KUBORESHA HUDUMA

Dar es Salaam - 14-05-2018

Balozi wa Ireland nchini Paul Sherlock leo ametembelea Hospitali ya Taifa Muhimbili (MNH) kwa lengo la kuona maendeleo ya miradi mbalimbali inayofadhiliwa na Serikali ya Ireland.

Katika ziara hiyo Balozi Sherlock ameambatana na ujumbe wa watu saba wakiwemo wabunge watatu kutoka Kamati ya Bunge ya Hesabu za Serikali nchini Ireland. Ujumbe huo umetembelea jengo la watoto katika wodi ya watoto wenye Saratani na jengo la wazazi namba moja wodi ya watoto wachanga .

Balozi huyo akipatiwa maelezo kuhusu watoto wenye Saratani Mkurugenzi Mtendaji kutoka Tumaini la Maisha (TLM) Dkt. Trish Scanlan amesema TLM wanashirikiana na MNH kuhakikisha wanaokoa maisha ya watoto wenye saratani kwa kuwapatia matibabu stahiki.

Akifafanua amesema ugonjwa wa Saratani kwa watoto ambao unaongoza nchini ni Saratani ya damu, jicho , figo pamoja na saratani ya matezi.

Ameishukuru Serikali ya Ireland kupitia Balozi wake kwa kufadhili mradi wa maji safi na salama ya kunywa katika jengo la watoto, mradi ambao upo katika hatua za utekelezaji .

Kwa upande wake Mkurugenzi Mtendaji wa MNH Prof. Lawrence Museru amesema pamoja na kwamba Tumaini la Maisha imekua ikisaidia kuhudumia watoto hao MNH pia ipo mstari wa mbele kuhakikisha hakuna mtoto anayekosa tiba.

Naye Mkuuu wa Kitengo cha Saratani kwa watoto MNH, Dkt. Rehema Laiti amesema kwa siku MNH hulaza watoto 60 hadi 100 wenye Saratani na pia katika Kliniki ambazo hufanyika Jumatano na Ijumaa wanahudumia watoto wenye Saratani 30 hdi 35 kwa siku.

Katika ziara hiyo Balozi Sherlock ameupongeza uongozi wa MNH kwa jitihada za kuboresha huduma na kuahidi kuwa Ireland itaendeleza ushirikiano uliopo hivi sasa.

Balozi wa Ireland nchini Tanzania, Paul Sherlock akitambulisha ujumbe wa watu saba wakiwamo wabunge watatu wa Kamati ya Hesabu za Serikali ya Ireland kwa Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru alipotembelea hospitali hiyo leo. Balozi huyo ameitembelea MNH leo ili kuona na kupatiwa maelezo ya miradi mbalimbali ya afya inayofadhiliwa na Serikali ya Ireland. Waliosimama nyuma ya Balozi huyo ni watumishi wa MNH wakiwamo wakurugenzi, wakuu wa idara na vitengo.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akizungumza na ujumbe wa watu hao leo.

Mkuu wa Kitengo cha Saratani kwa watoto katika Hospitali ya Taifa Muhimbili, Dkt. Rehema Laiti (kulia) akiwaeleza wabunge wa kamati hiyo jinsi wanavyowahudumia watoto wenye matatizo ya saratani waliolazwa kwenye hospitali hiyo.

Ofisa Mtendaji Mkuu wa Tumaini la Maisha, Dkt. Trish Scanlan akieleza taasisi yake inavyotoa huduma ya tiba kwa watoto wenye saratani ambao wanapatiwa matibabu katika Hospitali ya Taifa Muhimbili.

Mkuu wa Idara ya Watoto Muhimbili, Dkt. Marry Charles akizungumza na ujumbe wa watu hao kabla ya kutembelea wodi ya watoto wachanga leo.

Mkurugenzi Mtendaji wa Hospitali ya Taifa Muhimbili (MNH), Prof. Lawrence Museru akiwa na Balozi wa Ireland nchini Tanzania, Paul Sherlock katika hospitali hiyo.

Balozi wa Ireland nchini Tanzania, Paul Sherlock akisaini kitabu cha wageni. Kulia ni Mkuu wa Kitengo cha Masiliano kwa Umma na Huduma kwa Wateja, Aminiel Aligaesha na Mkuu wa Idara ya Watoto Muhimbili, Dkt. Marry Charles.

Baadhi ya wajumbe wakijadiliana jambo leo katika Hospitali ya Taifa Muhimbili.

Balozi wa Ireland nchini Tanzania, Paul Sherlock (kushoto) na ujumbe wake wakiwa picha ya pamoja na watendaji wa Hospitali ya Taifa Muhimbili.

--------------------------------------------------------------------------------------------------------------------------------------------------

Msajili Baraza la Uuguzi Tanzania Aanza Kazi Rasmi

Dar es Salaam - 09-05-2018

Msajili wa Baraza la Uuguzi na Ukunga Tanzania, Bi. Agnes Mtawa leo ameanza kazi rasmi baada ya kukabidhiwa ofisi tangu alipoteuliwa kushika nafasi hiyo mwezi uliopita. Bi. Agnes Mtawa anachukua nafasi ya Bi. Lena Mfalila aliyemaliza muda wake.

Awali Bi. Mtawa alikuwa Mkurugenzi wa Huduma za Uuguzi katika Hospitali ya Taifa Muhimbili (MNH) ambapo mwezi uliopita Waziri wa Afya, Maendeleo ya Jamii, Jinsia, Wazee na Watoto, Mhe. Ummy Mwalimu alimteua kuwa Msajili wa Baraza la Uuguzi Tanzania.

Uteuzi huo ulianza rasmi tarehe 16-04-2018 na kwamba utadumu kwa muda wa miaka mitano kuanzia tarehe ya uteuzi.

Nafasi mbalimbali alizowahi kushika katika Hospitali ya Taifa Muhimbili (MNH), Bi. Mtawa ni; Mkuu wa Mafunzo na Uajiri kuanzia mwaka 2004 hadi 2006, Mkuu wa Mafunzo, Utafiti na Elimu kuanzia mwaka 1997 hadi 2004, amewahi kuwa Katibu Mkuu katika baraza la uuguzi na ukunga Tanzania kuanzia 2002 hadi 2011 na mwaka 2007 aliteuliwa Mkuurugenzi wa Uuguzi katika Hospitali ya Taifa Muhimbili hadi mwezi uliopita alipoteuliwa.

Msajili wa Baraza la Uuguzi na Ukunga Tanzania, Bi. Agnes Mtawa akikaribishwa leo ofisini na watumishi wa baraza hilo. Kushoto ni Bi. Jane Mazigo aliyekuwa akikaimu nafasi hiyo akimpatia maua Bi. Agnes Mtawa na kulia ni Happy Masenga anayeshughulika na mafunzo katika baraza hilo.

Bi. Mtawa akitazama zawadi ya maua aliyokabidhiwa na watumishi wa baraza hilo leo.

Msajili akiwa katika picha pamoja na watumishi wa baraza hilo leo. Kutoka kushoto ni Bi. Jane Mazigo na Bi. Happy Masenga.

 

--------------------------------------------------------------------------------------------------------------------------------------------------

Muhimbili, MUHAS Watoa Mafunzo ya Awali kwa Watoa Huduma wa Magonjwa ya Dharura.

Dar es Salaam - 02-05-2018

Wataalamu Bingwa wa Huduma ya Tiba ya Dharura na Ajali wa Hospitali ya Taifa Muhimbili (MNH), Chuo Kikuu cha Sayansi ya Afya na Tiba Shirikishi(MUHAS)kwa kushirikian na Chama cha Wataalamu wa Magonjwa ya Dharura na Ajali Tanzania (EMAT) wameendesha mafunzo ya awali kwa watoa huduma kuhusu ya magonjwa ya dharura na ajali.

Mafunzo hayo ya siku tano yalifanyika kwa watumishi 16 wanaotoka katika hospitali za rufaa katika Manispaa tano za Mkoa wa Dar es Salaam, wakiwamo waaguzi saba, afisa wauguzi wanne, tabibu wasaidizi watatu, Madaktari wasaidizi watatu na daktari mmoja.

Mafunzo hayo yalilenga watoa huduma ambao wamekuwa wakifanya kazi kwenye magari ya wagonjwa (Ambulance) katika Mkoa wa Dar es salaam ikiwa ni maandalizi ya kozi ya wiki sita inayotegemewa kufundishwa na MUHAS kwa kushirikiana na Idara ya Magonjwa ya Tiba ya Dharura na Ajali ya Muhimbili kwa watoa huduma wa ambulance Tanzania.

Katika mafunzo hayo, wanafunzi walifundishwa mafunzo ya nadharia na vitendo kwa baadhi ya mada ambazo zinatarajiwa kutolewa kwenye kozi hiyo ili kuona kama mtaala huo uko tayari na unajitosheleza kuanza kutumika kwa walengwa kabla ya kozi rasmi ya wiki sita kuanza.

Mada zilizofundishwa ni; Basic ambulance safety, Documentation and Communications, Pre hospital trauma, Obstretics emergencies, Patient movement. Mwisho wa mafunzo hayo wanafunzi walipewa vyeti vya ushiriki wa mafunzo hayo.

PICHA NA JOHN STEPHEN, Hospitali ya Taifa Muhimbili

Dkt. Olivia Rusizoka ambaye amemwakilisha Mkurugenzi wa Huduma za Tiba katika Hospitali ya Taifa Muhimbili (MNH), Dkt. Hedwiga Swai akifunga mafunzo ya siku tano yaliowashirikisha wataalamu wa afya wa Magomjwa ya Dharura na Ajali kutoka manispaa tano za Jiji la Dar es Salaam ambayo yaliandaliwa na Muhimbili, EMAT na MUHAS . Kushoto ni Mkuu wa Idara ya Magonjwa ya Dharura na Ajali katika Hospitali ya Taifa Muhimbili, Dkt. Juma Mfinanga na Dkt. Upendo George wakiwa kwenye mkutano wa kufunga mafunzo hayo.

Wataalamu wa kutoa huduma za magonjwa ya Dharura na Ajali wakiwa kwenye mkutano wa mafunzo ya nadharia na vitendo ambayo yamefungwa na Dkt. Rusizoka aliyemuwakilisha Mkurugenzi wa Tiba, Dkt. Hedwigwa Swai.

Mkuu wa Idara ya Magonjwa ya Dharura na Ajali wa Muhimbili, Dkt. Juma Mfinanga akisisitiza madhumuni na umuhimu wa kuendesha mafunzo hayo. Kulia ni Dkt. Rusizoka na Dkt. Upendo.

Wataalamu wanaotoa huduma ya magonjwa ya Dharura na Ajali wakiwa kwenye mafunzo ya vitendo. 

Mmoja wa wataalamu wa kutoa huduma za Magonjwa ya Dharura na Ajali, Fatma Chichiri akipokea cheti kutoka kwa Dkt. Rusizoka. 

Mmoja wa wataalamu wa huduma hizo, Buheri Kiberiti akikabidhiwa cheti baada ya kukamilika kwa mafunzo hayo. 

Mtaalamu wa kutoa huduma za magonjwa ya Dharura na Ajali, Tuma Kanyumbu akipokea cheti kutoka kwa Dkt. Rusizoka. Kushoto ni Msimamizi wa mafunzo hayo, Dkt. Patrick Shayo, Dkt. Juma Mfinanga, Dkt. Rusizoka na Dkt. Upendo Geonge.

Wataalamu wa kutoa huduma za magonjwa ya Dharura na Ajali wakiwa kwenye picha ya pamoja na wakufunzi wao baada ya mafunzo kufungwa na Dkt. Rusizoka.

--------------------------------------------------------------------------------------------------------------------------------------------------

Endeleeni Kutoa Huduma Bora Kwa Wagonjwa

Dar es Salaam - 25-04-2018

Wafanyakazi Hospitali ya Taifa Muhimbili (MNH) wakiwamo madaktari na wauguzi wametakiwa kuendelea kutoa huduma bora kwa wagonjwa na kwamba atakayekwenda kinyume na agizo hilo atachukuliwa hatua na mamlaka husika.

Kauli hiyo imetolewa na Mkurugenzi Mtendaji wa hospitali hiyo, Prof. Lawrence Museru kwenye kikao cha Baraza la Wafanyakazi ambako kulijadiliwa mambo mbalimbali yakiwamo huduma bora kwa wagonjwa, mafanikio, maslahi kwa wafanyakazi na mikakati ya kujenga miundombinu mipya na kukarabati ile ya zamani.

Katika mkutano huo Prof. Museru amewataka wafanyakazi kutoa taarifa za watumishi wenzao wanaotoa huduma zisizoridhisha kwa wagonjwa pamoja na wateja wengine wanaofika MNH kwa ajili ya kupatiwa huduma.

“Watumishi watakaotajwa kwamba wanatoa huduma mbaya kwa wagonjwa na wateja wengine watachukuliwa hatua, lengo ni kuboresha huduma za afya,” amesema Prof. Museru.

Prof. Museru amewasisitiza wafanyakazi kutoa ushirikiano katika mikakati inayoendelea ya kutoa huduma bora za kibingwa ikiwamo upandikizaji wa figo, upandikizaji wa vifaa vya usikivu kwa watoto wasiosikia na huduma mbalimbali za kibingwa.

Mkurugenzi huyo amewaeleza wafanyakazi kwamba hospitali inaendelea kutoa huduma bora za kibingwa ikiwamo upandikizaji wa figo na vifaa vya usikivu kwa watoto.

Amesema hospitali ilifanikiwa kupandikiza figo kwa mgonjwa mmoja na changamoto zilizojitokeza tayari zimefanyiwa kazi na hivyo kuwezesha wagonjwa wanne kupandikizwa figo mwezi huu na kwamba kila mwezi wagonjwa watano watakuwa wakipandikizwa figo.

“Hospitali inaendelea kuboresha miundombinu inayotumika wakati wa upasuaji wa kupandikiza figo na baada ya maboresho haya kila siku mgonjwa mmoja atakuwa akipandikizwa figo.

Katika hatua nyingine, Prof. Museru amesema huduma ya upandikizaji vifaa vya usikivu inaendelea vizuri na kwamba mwishoni mwa mwezi wa tano au wa sita mwanzoni wagonjwa watano watapandikizwa vifaa vya usikivu na kwa mwaka wagonjwa 24 watakuwa wamepatiwa huduma hiyo.

Amesema pia hospitali ipo kwenye mikakati ya kujenga jengo jipya ambalo litatumika kulaza wagonjwa na kutoa huduma mbalimbali ikiwamo upandikizaji wa figo.

Naye Mkurugenzi wa Fedha wa Hospitali hiyo, Gerald Jeremiah amewataka wafanyakazi hao kujenga tabia ya kufuatilia michango yao sehemu husika ili kuweka taarifa vizuri ya mafao yao kabla ya kustaafu.

Mkurugenzi Mtendaji wa Hospitali ya Taifa Muhimbili (MNH). Prof. Lawrence Museru akiongoza kikao cha Baraza la Wafanyakazi la hospitali hiyo jana. Kushoto ni Katibu Msaidizi wa baraza hilo, Merina Rwechungura na kulia ni Katibu wa Baraza hilo, Elineza Msuya.

Wajumbe wakipitia makabrasha kwenye mkutano huo.

Mwakilishi wafanyakazi wa hospitali hiyo, Judith Nyaruga akichangia mada kwenye mkutano huo jana.

Baadhi ya wajumbe wakifuatilia mada zilizokuwa zikitolewa na wawakilishi wa wafanyakazi.

Mmoja wa wajumbe wa baraza hilo, Deus Buma akichangia mada kwenye mkutano huo.

Wajumbe wakiwa kwenye kikao hicho.

--------------------------------------------------------------------------------------------------------------------------------------------------

 

Muhimbili Yapandikiza Figo Wagonjwa Wanne

Dar es Salaam - 19-04-2018

Hospitali ya Taifa Muhimbili (MNH) imefanikiwa kupandikizia figo wagonjwa wa nne ikiwa ni mara ya pili kutoa matibabu hayo ya ubingwa wa juu nchini.

Upasuaji huo umefanywa na wataalam wa Muhimbili kwa kushirikiana na wataalam kutoka Hospitali ya BLK ya nchini India na umekua na mafanikio makubwa kwani wagonjwa wote hali zao zinaendelea vizuri .

Akizungumza na waandishi wa habari leo jijini Dar es salaam Mkurugenzi Mtendaji wa MNH Profesa Lawrence Museru amesema Novemba mwaka jana Muhimbili iliweka historia kwa kufanya upasuaji mkubwa na wa kwanza nchini kwa lengo la kuunga mkono juhudi za serikali ya awamu ya tano za kupunguza rufaa za wagonjwa kwenda kutibiwa nje ya nchi.

Akifafanua amesema upasuaji huo wa figo ukifanyika nchini unagharimu Shilingi Milioni 21 na endapo mgonjwa akipelekwa nchini India matibabu yake yanagharimu Shilingi Milioni 80 hadi Shilingi milioni 100.

“Shughuli hii inatuonyesha kwamba hospitali sasa inaweza kupandikiza figo na lengo letu ni kuhakikisha huduma hii inakua endelevu ili kuokoa fedha za serikali kupeleka wagonjwa kutibiwa nje ya nchi na pia kuwafikia Watanzania wengi ambao wanahitaji kupandikizwa figo,’’amesema Profesa Museru.

Amesema Hospitali ya Muhimbili itaendelea na shughuli hiyo na kwamba kila mwezi itapandikiza figo kwa wagonjwa watano hivyo kwa mwaka itafanikiwa kupandikiza figo wagonjwa 60.

‘’Mipango endelevu ni kuwa na sehemu maalum ya upandikizaji figo na hivi karibuni MNH itaanza ujenzi wa jengo jipya la kulipia hivyo katika jengo hilo tutatenga sehemu maalum ya upandikizaji figo,’’ amesema Profesa Museru.

Kwa upande wake Mkurugenzi wa huduma za figo kutoka hospitali ya BLK Dk.Prakash Sunil amesema ndoto yake ni kuona huduma ya upandikizaji figo Muhimbili inakua endelevu na yenye mafanikio.

Naye Daktari Bingwa wa Magonjwa ya Figo kutoka Hospitali ya Taifa Muhimbili, Dk.Onesmo Kisanga amewataka Watanzania kuzingatia ulaji unaofaa na kufanya mazoezi ili kuepuka magonjwa yasiyoambukiza ikiwemo kisukari na presha ambayo yanachangia kuleta magonjwa ya figo.

Kwa mujibu wa Dk. Kisanga nchini Tanzania kuna wagonjwa 800 ambao wapo katika huduma ya kusafisha damu.

--------------------------------------------------------------------------------------------------------------------------------------------------

Muhimbili Yapokea Msaada wa Vifaa Tiba

Dar es Salaam - 10-04-2018

Hospitali ya Taifa Muhimbili (MNH) leo imepokea msaada wa vifaa tiba kutoka Mamlaka ya Usimamizi wa Bandari Tanzania (TPA) wenye thamani ya shilingi milioni kumi.

Kaimu Mkurugenzi Mkuu wa TPA, Bi. Nuru Mhando amesema mamlaka hiyo inatambua na kuthamini dhamira na kazi kubwa inayofanywa na Serikali ya Awamu ya Tano ya kufikisha huduma mbalimbali za kijamii kwa wananchi wote hivyo imeamua kuunga mkono juhudi hizo kwa kutoa msaada wa viti vya kubebea wagonjwa na vipima joto vya kisasa .

‘’Kwa kutambua hilo mamlaka imeona ni vyema iunge mkono juhudi hizi katika wiki hii ambayo tupo kwenye shamrashamra za kuadhimisha miaka kumi na tatu tangu TPA ianzishwe, Aprili 15 ,2005, Mamlaka imeona ni vyema kusheherekea kumbukumbu hizi kwa kutoa mchango huu ili kusaidia wagonjwa katika jengo la watoto.

‘’Tunaamini msaada huu utasaidia kuhudumia watoto wengi kwa wakati mmoja na hivyo kutatua changamoto ya ukosefu wa vifaa hivi ambavyo mnakabiliana navyo,’’amesema Kaimu Mkurugezi huyo wa TPA.

Kwa upande wake Mkurugenzi wa huduma za uuguzi katika Hospitali ya Taifa Muhimbili (MNH), Agness Mtawa ambaye amemuwakilisha Mkurugenzi Mtendaji wa MNH, amesema msaada huo utaongeza kasi ya utoaji huduma kwa watoto.

Amefafanua kwamba jengo la watoto lina vitanda takribani 300 hivyo mahitaji ya viti vya kubebea wagonjwa pamoja na mahitaji mengine ni makubwa.

“Tunawashukuru TPA kwa msaada huu mliotupatia , mmeongeza kasi ya utoaji huduma niwahakikishie kwamba msaada huu utatumika kama ambavyo imekusudiwa,’’amesema Mkurugenzi Mtawa.

Ametoa rai kwa wadau wengine kujitokeza kuchangia huduma za afya na kuunga mkono juhudi za serikali za kuboresha huduma hizo

Mkurugenzi wa Huduma za Uuguzi, Bi. Agness Mtawa (kulia) wa Hospitali ya Taifa Muhimbili (MNH) akipokea msaada wa viti 20 vya kubebea wagonjwa kutoka kwa Kaimu Mkurugenzi Mkuu, Bi. Nuru Mhando wa Mamlaka ya Bandari Tanzania (TPA).

Kaimu Mkurugenzi Mkuu wa Mamlaka ya Bandari Tanzania (TPA), Nuru Mhando (kushoto) na Mkurugenzi wa Huduma za Uuguzi, Bi. Agness Mtawa (kulia) wakiwasukuma watoto wanaopatiwa matibabu katika hospitali hiyo.

Kaimu Mkurugenzi Mkuu wa Mamlaka ya Bandari Tanzania (TPA), Nuru Mhando (wa tano kushoto) na Mkurugenzi wa Huduma za Uuguzi, Bi. Agness Mtawa wa Muhimbili wakiwa katika picha ya pamoja.

--------------------------------------------------------------------------------------------------------------------------------------------------

Mbuge Ali Khamis Aipongeza Muhimbili Kuponya Mwanae

Dar es Salaam - 09-04-2018

Mbunge wa Jimbo la Mwanakwerekwe Mh. Ali Salim Khamis leo ameipongeza Hospitali ya Taifa Muhimbili (MNH) pamoja na watalaam wake wote kwa jinsi walivyompokea mtoto wake na kumpa huduma stahiki.

“Leo natoa shukrani zangu za dhati kwa MNH na kukabidhi barua ya shurakni na cheti cha utambuzi wa huduma nzuri aliyopewa mwanangu Muniri Ali Salim tangu alivyopokelewa kupitia Idara ya Magonjwa ya Dharura na kisha kupelekwa Idara ya Upasuaji Kitengo cha Upasuaji wa watoto. Mtoto wetu alikuwa na uvimbe kichwani ambao ulisababisha afanyiwe upasuaji na kutolewa vizuri, sasa mtoto wetu anaendelea vizuri sana,” amesema Mh. Khamis.

Amepongeza kazi nzuri inayofanywa na MNH chini ya usimamizi wa Mkurugenzi Mtendaji, Prof. Lawrence Museru kwa kushirikiana na wauguzi, madaktari na watalaam wengine ambao wamekuwa wakijitoa kutoa huduma nzuri kwa mtoto wake pamoja na wahitaji wengine wanaofika MNH kupata huduma.

“Nimeamua kutoa barua ya shukrani kwenu, cheti cha utambuzi kwa MNH, Idara ya Upasuaji kupitia Kitengo cha Upasuaji Watoto, Idara ya Magonjwa ya Dharura na kipekee kwa Dkt. Juma Mfinanga ambaye ni daktari Bingwa wa Magonjwa ya Dharura pamoja na Dkt. Zaitun Bhokare ambaye ni daktari bingwa wa upasuaji watoto kwa kazi nzuri ambayo imefanikisha matibabu kwa mtoto wetu,” amesema Mh. Khamis.

Akipokea cheti na barua kwa niaba ya MNH, Kaimu Mkurugenzi Mtendaji Bw. Makwaia Makani amemshukuru Mh. Khamis kwa utambuzi na kutoa mrejesho chanya kutokana na huduma ya matibabu aliyopatiwa mtoto wake.

“Sisi kama watoa huduma tunapokea maoni aina zote, lakni maoni ya kupongeza ni machache ukilinganisha na maoni mengine. Hivyo hii imetupa hamasa kubwa sana na watalaam wetu wamefurahi,” amesema Bw. Makani.

Daktari Bingwa wa Upasuaji Dkt. Zaituni Bokhari amesema walimpokea mtoto Munira Ali Salim mwezi mmoja uliopita na baada ya kumfanyia uchunguzi waligundua alikuwa na uvimbe kichwani (kichogoni) na hivyo kumpatia huduma ya upasuaji.

Dkt. amesema kuwa baada ya kujiridhisha kwamba ana uvimbe huo kwenye ubongo waliamua kumfanyia upasuaji na kutoa uvimbe huo. Dkt. Bhokari anasema mara baada ya upasuaji mtoto aliendelea vizuri na hatimaye kuruhusiwa kwenda nyumbani.

Picha na John Stephen, Hospitali ya Taifa Muhimbili

Mkurugenzi wa Rasilimali Watu na Utawala, Makwaia Makani akipokea cheti cha utambuzi wa huduma zinazotolewa na Hospitali ya Taifa Muhimbili (MNH) kutoka kwa Mbunge wa Jimbo la Mwanakwerekwe- Zanzibar, Ali Salim Khamis ambaye mtoto wake alipatiwa huduma ya matibabu katika hospitali hiyo.

Daktari Bingwa wa Upasuaji Watoto katika Hospitali ya Taifa ya Muhimbili (MNH), Dkt. Zaitun Bokhary akipokea cheti cha utambuzi wa huduma kutoka kwa Mbunge wa Jimbo la Mwanakwerekwe- Zanzibar, Ali Salim Khamis.

Daktari Bingwa wa Magonjwa ya Dharura na Ajali, Dkt. Kefa akipokea cheti cha utambuzi kwa niaba ya Dkt. Juma Mfinanga ambaye ni Mkuu wa Idara ya Magonjwa ya Dharura na Ajali katika hospitali hiyo.

Kutoka kushoto ni Mkurugenzi wa Rasilimali Watu na Utawala, Makwaia Makani akiwa katika picha ya pamoja na Mbunge Ali Salim Khamis wa Jimbo la Mwanakwerekwe na madaktari wa hospitali hiyo.

Cheti cha utambuzi wa huduma kilichotolewa kwa hospitali hiyo.

Cheti cha utambuzi alichokabidhiwa Dkt. Zaitun Bokhary.

Cheti cha utambuzi alichokabidhiwa Dkt. Juma Mfinanga.

--------------------------------------------------------------------------------------------------------------------------------------------------

Serikali Kuboresha Michezo Taasisi Afya

Dar es Salaam - 03-04-2018

Serikali imesema itaendelea kuboresha michezo sehemu za kazi ili kuifanya iwe endelevu na kuwawezesha watumishi wengi kushiriki.

Kauli hiyo imetolewa na Naibu Mkurugenzi Mkuu-Kitengo cha Utafiti Zanzibar, Hamisi Rashid Mohamed wakati alipokua akizungumza katika hafla ya kufunga tamasha la michezo ya Pasaka 2018, iliyoshirikisha timu za michezo kutoka Wizara ya afya Zanzibar, Hospitali ya Taifa Muhimbili (MNH) , Taasisi ya Tiba ya Mifupa Muhimbili (MOI) pamoja na Chuo Kikuu cha Afya na Sayansi Shirikishi Muhimbili (MUHAS).

Amesema michezo hiyo ni ya muda mrefu ilianzishwa mwaka 1972 na kwamba hakuna budi kuindeleza na kuiboresha zaidi ili kuleta hamasa kwa wanamichezo wa taasisi hizo kushiriki kwa wingi.

Kwa upande wake Mkurugenzi wa Rasilimali watu na Utawala Bw. Makwaia Makani ambaye amemuwakilisha Mkurugenzi Mtendaji wa MNH Prof. Lawrence Museru amesema ushiriki wa michezo ni jambo zuri kwani inawaepusha vijana kujiingiza kwenye mambo yasiyofaa.

Amesisitiza mipango iliyopo katika Hospitali ya Taifa Muhimbili ni kuhakikisha michezo hiyo inaboreshwa na kutoa fursa kwa watumishi wengi kushiriki.

‘’Hospitali ya Taifa Muhimbili inaipa kipaumbele michezo na nina ahidi kwamba mapungufu yote yaliyopo tutayafanyia kazi kikamilifu na michezo hii tutaendelea kuiboresha,’’ amesema Mkurugenzi Makani.

Tamasha la michezo ya Pasaka lilianza Machi 30, 2018 na kumalizika Aprili 2 , 2018 likihusisha mchezo wa mpira wa miguu ,pete pamoja na kuvuta kamba .

Tamasha hilo mwakani litafanyika Visiwani Zanzibar.

Picha na John Stephen, Hospitali ya Taifa Muhimbili

Mkurugenzi wa Rasilimali Watu na Utawala wa Hospitali ya Taifa Muhimbili (MNH), Bw. Makwaia Makani akizungumza kwenye tafrija ya kuwaaga wachezaji wa Timu ya Michezo ya Hospitali ya Taifa Muhimbili (MNH), timu ya Wizara ya Afya Zanzibar, Taasisi ya Tiba ya Mifupa Muhimbili (MOI) na Chuo Kikuu cha Afya na Sayansi Shirikishi Muhimbili (MUHAS) baada ya timu hizo kushiriki tamasha la Michezo ya Pasaka 2018.

Baadhi ya wachezaji na wafanyakazi wa Hospitali ya Taifa Muhimbili (MNH) wakimsikiliza Mkurugezi wa Hospitali ya Taifa Muhimbili (MNH), Bw. Makani wakati akizungumza nao.

Naibu Mkurugenzi Mkuu wa Kitengo cha Utafiti- Zanzibar, Hamisi Rashidi Mohamed akizungumza kwenye tafrija ya kuwaaga wachezaji wa timu ya Wizara ya Afya Zanzibar na Timu ya Michezo ya Hospitali ya Taifa Muhimbili (MNH).

Mkurugenzi wa Rasilimali Watu na Utawala katika Hospitali ya Taifa Muhimbili (MNH), Bw. Makwaia Makani na Naibu Mkurugenzi Mkuu wa Kitengo cha Utafiti- Zanzibar, Hamisi Rashidi Mohamed akiwa kwenye picha ya pamoja na wachezaji wa timu hizo baada ya kumalizika kwa tafrija hiyo.

--------------------------------------------------------------------------------------------------------------------------------------------------

Waziri Hamad Rashid Awataka Viongozi Kudumisha Michezo

Dar es Salaam - 30-03-2018

Waziri wa Afya Zanzibar, Hamad Rashid Mohamed leo amefungua tamasha la michezo ya Pasaka inayohusisha timu za michezo kutoka Wizara ya afya Zanzibar , Hospitali ya Taifa Muhimbili (MNH) , Taasisi ya Tiba ya Mifupa Muhimbili (MOI) pamoja na Chuo Kikuu cha Afya na Sayansi Shirikishi Muhimbili (MUHAS).

Akizungumza wakati wa ufunguzi wa tamasha hilo Mhe. Hamad Rashid Mohamed amesema afya bora hujengwa na michezo hivyo amewataka viongozi kuendeleza michezo katika taasisi zao ili watumishi wawe na afya bora hatua itakayowawezesha kufanya kazi kwa ufanisi.

‘’Ukiwa na afya bora hata hutendaji wako wa kazi utakuwa na ufanisi mkubwa hivyo nawasihi muendeleze michezo ili kuendelea kujenga taifa letu,’’ amesema Mh. Rashid.

Mbali na hilo lakini pia amesema katika historia ya nchi yetu michezo imekua kielelezo muhimu katika kudumisha undugu , umoja , mshikamo na muungano wetu.

Kwa upande wake Mkurugenzi wa Rasilimali watu na Utawala Bw. Makwaia Makani ambaye amemwakilisha Mkurugenzi Mtendaji wa MNH Prof. Lawrence Museru , amesema Tamasha hilo la michezo hufanyika kila mwaka ambapo kwa mwaka huu MNH ni wenyeji na mwakani iltafanyika Visiwani Zanzibar.

“Imekua utamaduni wetu kila mwaka kushiriki katika michezo hii kwa lengo la kuendeleza ushirikiano wetu wa muda mrefu ,pia niseme tu michezo ni kitu muhimu kwa mwanadamu kwani hutujenga afya na akili,’’ amesema Bw. Makani.

Tamasha hilo linahusisha mchezo wa mpira wa miguu na pete na pamoja na mambo mengine shughuli mbalimbali zitafanyika ikiwemo zoezi la kuchangia damu na kusafisha maeneo mbalimbali ya Hospitali ya Taifa Muhimbili. Tamasha hilo limeanza leo na litamalizika Aprili 2 , 2018.

Picha na John Stephen, Hospitali ya Taifa Muhimbili

Waziri wa Afya Serikali ya Mapinduzi Zanzibar, Mhe. Ahamad Rashid Mohamed akiwasalimia wachezaji wa Timu ya Wizara ya Afya Zanzibar na Taasisi ya Tiba ya Mifupa Muhimbili (MOI) katika Uwanja wa Chuo Kikuu cha Afya na Sayansi Shirikishi Muhimbili (MUHAS) jijini Dar es Salaam.

Mh. Ahamad Rashid Mohamed akipiga mpira ikiwa ni ushara ya kufungua tamasha la michezo ambalo linafanyika Chuo Kikuu cha Afya na Sayansi Shirikishi Muhimbili (MUHAS).

Wachezaji wa Taasisi ya Tiba ya Mifupa Muhimbili (waliovaa jezi nyekundu) wakielekea katika lango la wapinzani wao.

Kutoka kushoto Mwalimu wa timu mpira wa pete, Mwajuma Kisengo, Mh. Ahamad Rashid Mohamed na Mkurugenzi wa Rasilimali watu na Utawala (DHR) katika Hospitali ya Taifa Muhimbili (MNH), Makwaia Makani wakifuatilia tamasha hilo leo kwenye uwanja wa MUHAS.

Mshiriki kutoka timu ya Afya Zanzibar, Juma Haji Mlekwa, akichangia damu leo kabla ya kuanza kwa mpira wa miguu kati ya timu ya Afya Zanzibar na Taasisi ya Tiba ya Mifupa Muhimbili (MOI).

Mwalimu wa mpira wa pete kutoka Hospitali ya Taifa Muhimbili (MNH), Mwajuma Kisengo akichangia damu kabla ya kuanza kwa mpira wa miguu kati ya timu ya Afya Zanzibar na Taasisi ya Tiba ya Mifupa Muhimbili (MOI)

--------------------------------------------------------------------------------------------------------------------------------------------------

Muhimbili Yapokea Msaada wa Vitanda na Magodoro

Dar es Salaam - 20-03-2018

Hospitali ya Taifa Muhimbili (MNH) leo imepokea msaada wa vitanda 14, magodoro 12 pamoja na drip stands kutoka Australia Tanzania Society ambavyo vitasaida kuimarisha utoaji wa huduma hospitalini hapo.

Akipokea msada huo jijini Dar es Salaam kwa niaba ya Mkurugenzi Mtendaji wa MNH, Mkurugenzi wa Huduma za Upasuaji Dkt. Juliethi Magandi amesema kwa muda mrefu hospitali imekua na ushirikiano na tasisi hiyo katika masuala mbalimbali ikiwemo kufanya upasuaji wa ubingwa wa juu.

“Kipekee nichukue fursa hii kuwashukuru rafiki zetu hawa Australia Tanzania Society kwa msaada huu walioutoa kwani tumekua tukishirikiana kwa zaidi ya miaka mitatu sasa,”. amesema Dkt. Magandi.

Amesema Hospitali ya Taifa Muhimbili ina jumla ya vitanda 1,507 na kwamba kina mama wajawazito na watoto pekee wanatumia karibu ya nusu ya vitanda hivyo. “Hivyo msaada huo umekuja wakati muafaka kwani hospitali bado ina mahitaji kutokana na kutoa huduma zake kila siku kwa saa 24,”.

“Kati ya vitanda hivi 14 tulivyopewa leo, sita tumevileta wodi 35 kwa ajili ya kina mama na vingine 8 tumepeleka ICU namba moja na ICU namba mbili’’ amefafanua Dkt. Magandi.

Kwa upande wake Mkurugenzi wa Australia Tanzania Society, James Chialo amesema msaada huo umegharimu zaidi ya shilingi milioni 25 na kwamba lengo ni kuboresha huduma za afya hususani katika hospitali za Umma.

“Kutoa ni moyo si utajiri tutaendelea kushirikiana katika kuboresha huduma za afya kadiri hali inavyoruhusu nitoe wito kwa wadau wengine kuendelea kushirikiana ili tuboreshe huduma za afya nchini ‘’amesema Bwana Chialo.

Picha na John Stephen, Hospitali ya Taifa Muhimbili

Mkurugenzi wa Huduma za Upasuaji katika Hospitali ya Taifa Muhimbili (MNH), Dkt. Julieth Magandi akizungumza katika mkutano na waandishi wa habari kabla kukabidhiwa vitanda 14 na magodoro 12 ambayo yametolewa na Australia Tanzania Society. Kulia ni Mkurugenzi wa Australia Tanzania Society, James Chialo na kushoto ni Mkuu wa Idara ya Uuguzi na Mazingira Muhimbili, Zuhura Mawona.

Muuguzi Alice Msonda na Velena Joahackim wakitandika kitanda baada ya kukabidhiwa vitanda na magodoro na Australia Tanzania Society.

Mkurugenzi wa Australia Tanzania Society, James Chialo akimkabidhi Mkurugenzi wa Huduma za Upasuaji wa Muhimbili, Dkt. Julieth Magandi vitanda 14 leo. Katikati ni Mkuu wa Idara ya Uuguzi na Mazingira Muhimbili, Zuhura Mawona.

Mkurugenzi wa Australia Tanzania Society, James Chialo akizungumza na waandishi wa habari leo kabla ya kukabidhi vitanda hivyo.

--------------------------------------------------------------------------------------------------------------------------------------------------

 

Watoto 6 Wawashiwa Vifaa vya Usikivu (Cochlear Implant)

Dar es Salaam - 25-02-2018

Watoto sita ambao wamewekewa vifaa vya usikivu Januari mwaka huu katika Hospitali ya Taifa Muhimbili (MNH) leo wameanza kusikia kwa mara ya kwanza baada ya kuwashiwa vifaa hivyo.

Kuwashwa kwa vifaa hivyo kumeleta furaha kwa wazazi kwani wameshuhudia watoto wao wakisikia sauti kwa mara ya kwanza na hivyo kuwajengea matumaini ya watoto hao kuanza maisha mapya.

Zoezi la kuwawashia vifaa hivyo (Switch On) limefanyika leo katika Hospitali ya Taifa Muhimbili kwa kushirikiana na wataalaam kutoka Medel Austria ambao ndio wasambazaji wa vifaa hivyo.

Akizungumza na waandishi wa habari , Mkuu wa Idara ya Magonjwa ya Pua, Koo na Masikio Dkt. Edwin Liyombo amesema watoto hao walifanyiwa upasuaji wa upandikizaji kifaa cha usikivu Januari mwaka huu ambapo zaidi ya asilimia 80 ya upasuaji huo ulifanywa na watalaam wa Hospitali ya Taifa ya Muhimbili .

‘’Watoto hawa wataanza maisha mapya ya kusikia sauti mbalimbali katika mazingira yanayowazunguka baada ya kuunganisha vifaa hivi na kuviwasha’’. Amesema Dkt. Liyombo

Akifafanua amesema mbali na watoto hao sita lakini pia watoto wengine watano ambao walifanyiwa upasuaji huo mwaka jana na wengine sita ambao walifanyiwa upasuaji huo nchini India nao wamekuja kufuatiliwa maendeleo yao ili kubaini changamoto zinazowakabili na kupewa ushauri wa kitaalam.

Akielezea ukubwa tatizo Dkt. Liyombo amesema takwimu za Shirika la Afya Ulimwenguni (WHO) zinaonesha kuwa katika watoto 1,000 wanaozaliwa, inakadiriwa kuwa watoto watano wanazaliwa na tatizo kubwa la usikivu .

Pia amesema MNH ipo kwenye mchakato wa kuanzisha utaratibu wa kuwachunguza watoto wachanga ili kubaini mapema wenye matatizo yakutosikia.

Kwa upande wake Muwakilishi kutoka Medel Fayaz Jafar amesema upasuji huo umekua na mafanikio makubwa kwakua katika awamu hiyo kumekua na mabadiliko kwani asilimia kubwa ya upasuaji umefanywa na watalaam wa MNH na kwamba hatua hiyo ni ya kuridhisha.

Huduma ya Upandikizaji wa kifaa cha usikivu (Cochlear Implant) ilizinduliwa Juni 7 , 2017 na Waziri wa Afya, Maendeleo ya Jamii , Jinsia , Wazee na Watoto Mheshimiwa Ummy Mwalimu hivyo Tanzania imekuwa nchi ya pili kutoa huduma hiyo katika nchi za Ukanda wa Afrika Mashariki baada ya Kenya. Aidha Tanzania imekuwa nchi ya kwanza kutoa huduma hiyo kupitia Hospitali ya Umma ambayo ni Muhimbili yenye hadhi ya ubingwa wa hali ya juu.

Picha na John Stephen, Hospitali ya Taifa Muhimbili

Mtaalam wa Huduma ya Usikivu katika Hospitali ya Taifa Muhimbili (MNH), Mathayo Majogoro Alfred (katikati) akiunganisha kifaa cha usikivu cha nje na cha ndani ili mtoto Matilda Katobesi aweze kusikia kwa mara ya kwanza. Kulia ni Daktari Bingwa wa Magonjwa ya Pua, Koo na Masikio, Dkt. Edwin Liyombo akifuatilia na kushoto ni mama wa mtoto huyo, Angelina Cosmas.

Mtoto Matilda kwa mara ya kwanza leo tarehe 24, Januari, 2018 akianza kutamka baadhi ya maneno baada ya kufundishwa na mtaalamu wa sauti kutoka Hospitali ya Taifa Muhimbili.

Daktari Bingwa wa Magonjwa ya Pua, Koo na Masikio, Dkt. Edwin Liyombo wa Muhimbili akizungumza na waandishi wa habari kuhusu kuwasha kwa mara ya kwanza vifaa vya usikivu kwa watoto waliofanyiwa upasuaji na kupandikizwa vifaa hivyo katika hospitaili hiyo. Kuanzia kushoto ni Mkuu wa Idara ya Macho, Dkt. Baruani, Katibu wa Umoja wa Watoto na Wazazi Wanaonufaika na Vifaa vya Usikivu nchini, Bupe Mwakalambile na Mkuu wa Kitengo cha Mawasiliano kwa Umma na Huduma kwa Wateja, Bwana Aminiel Aligaesha.

Wazazi wakisubiri kuashwa kwa mara ya kwanza kwa vifaa vya usikivu katika hospitali hiyo.

Mtaalamu wa Sauti, Fayaz Jaffer akionyesha kifaa cha usikivu (Cochlear Implant) kwa waandishi wa habari ambacho kinapandikizwa kwa mtoto mwenye tatizo la kusikia. Kulia ni Paul Khalil kutoka Kampuni ya Medel. Kuanzia kushoto ni Dkt. Edwin Liyombo, Dkt. Baruani, Bi. Bupe Mwakalambile na Bwana Aminiel Aligaesha wakiwa kwenye mkutano huo leo.

Wazazi wa watoto wenye matatizo ya kusikia wakiwa kwenye mkutano huo leo.

--------------------------------------------------------------------------------------------------------------------------------------------------

 

LIONS CLUB: WATOTO WENYE SARATANI WASAIDIWE

Dar es Salaam - 17-02-2018

Watanzania wametakiwa kushirikiana kwa pamoja katika kuhakikisha watoto wenye Saratani wanapata matibabu sanjari na kuwasaidia kwa mahitaji mbalimbali.

Wito huo umetolewa leo Jijini Dar es salaam na kiongozi wa kiwilaya wa Lions Club ambaye anasimamia nchi tatu za Tanzania , Uganda na Sudan Kusini Bwan . Sayed Rizwan Qadr alipokua akizungumza katika maadhimisho ya Saratani ya watoto ambayo yameandaliwa na Kituo cha Tumaini la Maisha Muhimbili .

Akizungumza katika maadhimisho hayo amesema suala la Saratani kwa watoto huwa linasahaulika kwakua watoto hawawezi kujieleza tofauti na watu wazima.

‘’ Saratani kwa watoto huwa inasahaulika tofauti na watu wazima hivyo naahidi kutoa kipaumbele katika suala hili ili jamii ipate muamko na kuipa kipaumbele kama magonjwa mengine’’.Amesema Qadr

Kwa upande wake Daktari Bingwa wa Magonjwa ya Saratani kwa Watoto kutoka Hospitali ya Taifa Muhimbili (MNH) Dkt. Hadija Mwamtemi amesema MNH kwa siku hulaza watoto 60 hadi 100 .

“Katika Kliniki zetu ambazo hufanyika Jumatano na Ijumaa huwa tunahudumia watoto wenye Saratani 30 hdi 35 kwa siku. Pia mwaka 2014/2015 tulipata wagonjwa 400 hadi 450 , mwaka 2016 idadi iliongezeka na kufikia wagonjwa 500.’’ Amesema Dkt. Mwamtemi.

Kwa mujibu wa Dkt. Huyo, Saratani inayoongoza kwa watoto ni ya jicho na damu ikifuatiwa na Saratani ya figo, matezi pamoja na mifupa.

Katika maadhimisho hayo kiongozi huyo wa Lions Club ametoa shilingi milioni tatu kwa ajili ya Kituo cha Tumaini la Maisha pamoja na vyerehani 10 kwa ajili ya kina mama ambao wanakaa muda murefu Hospitalini wakiuguza watoto wao , vyerehani hivyo vitatumika kujipatia kipato.

Picha na John Stephen, Hospitali ya Taifa Muhimbili

Mwakilishi wa Lions Club, Lion Bhavika Sajan akizungumza baada ya kukabidhi msaada kwa wazazi wa watoto wenye tatizo la saratani ambao wanatibiwa katika Hospitali ya Taifa Muhimbili (MNH). Msaada huo umetolewa leo katika maadhimisho ya saratani ya watoto ambayo yamefanyika leo katika eneo la Kidongochekundu jijini Dar es Salaam.

Baadhi ya kinamama wa watoto wenye tatizo la saratani na wawakilishi wa Lions Club wakiwa kwenye maadhimisho ya siku ya saratani ya watoto leo.

Baadhi ya watoto wenye tatizo la saratani wakishiriki moja ya michezo iliyofanyika katika viwanya vya Kidongochekundu leo.

Ofisa Mtendaji Mkuu wa Tumaini la Maisha, Dkt. Trish Scanlan akishukuru baada ya kupokea misaada mbalimbali vikiwamo vyerahani 10 na Shilingi milioni tatu kutoka Lions Club. Kutoka kushoto ni Gavana wa Kiwilaya inayojumuisha Tanzania, Uganda na Sudani Kusini, Sayed Rizwan Qadri, Lilian kutoka Tumaini la Maisha Muhimbili na anayefuata ni mwakilishi wa Lions Club jijini Dar es Salaam.

Gavana wa Kiwilaya inayojumuisha Tanzania, Uganda na Sudani Kusini, Sayed Rizwan Qadri akiwa amebeba mmoja wa watoto katika maadhimisho hayo. Kulia ni mmoja wa wawakilishi wa Lions Club.

--------------------------------------------------------------------------------------------------------------------------------------------------

 

Watoto 45 Muhimbili Wafanyiwa Upasuaji Mfumo wa Choo na Mkojo

Dar es Salaam - 02/02/2018

Hospitali ya Taifa Muhimbili (MNH) imefanya upasuaji 45 kwa watoto ambao mfumo wa njia ya choo na mkojo umeunganika.

Watoto hao wamefanyiwa upasuaji na wataalamu kutoka Hospitali ya Tiba na Utafiti ya Chuo Kikuu cha King Faisal nchini Saudia Arabia kwa kushirikiana na madaktari na wataalamu wengine wa Muhimbili.

Daktari Bingwa Upasuaji wa Watoto wa Muhimbili, Dkt. Zaitun Bokhary alisema awali watoto waliokuwa na tatizo hilo walikuwa wakipelekwa nje kwa ajili ya kufanyiwa upasuaji, lakini sasa huduma hiyo inapatika katika Hospitali ya Muhimbili.

Profesa Faeqal Queen alisema wako katika hospitali hiyo kwa ajili ya kutoa huduma ya matibabu kwa wagonjwa wenye tatizo hilo hasa watoto.

“Tumekuja Muhimbili kwa ajili ya kuokoa maisha ya watoto. Tumepokelewa vizuri, Watanzania ni wakarimu kwani tumekuwa tukiona tabasamu kila wakati.” Alisema Profesa Faeqal.

Profesa Faeqal alisema wanafurahi kuwapo katika hospitali hiyo kwa kuwa wanabadilisha uzoefu katika kutoa tiba kwa wagonjwa wenye tatizo la mfumo kwenye njia ya choo na mkojo.

Pia, ameahidi kutoa ushirikiano zaidi kwa Hospitali ya Muhimbili ili kuokoa maisha ya wagonjwa.

 

Picha na John Stephen, Hospitali ya Taifa Muhimbili

Mkurugenzi Mtendaji wa Hospitali ya Taifa Muhimbili (MNH), Profesa Lawrence Museru akiwashukuru wataalamu wa Muhimbili kutoka katika falme za kiarabu baada ya kuwafanyia upasuaji watoto 45 wenye tatizo kwenye mfumo wa njia ya choo na mkojo.

Mkurugenzi Mtendaji Profesa Museru akifurahia jambo baada ya kumkabidhi zawadi mmoja wa wataalamu wa afya, Julia Kumar Anthony kutoka Hospitali ya Tiba na Utafiti ya Chuo Kikuu cha King Faisal nchini Saudia Arabia. Kushoto ni Mkuu wa Idara ya Upasuaji, Dkt. Mkoma.

Profesa Zakaria Habib wa Hospitali ya Tiba na Utafiti ya Chuo Kikuu cha King Faisal nchini Saudia Arabia akiwasilisha mada leo katika Hospitali ya Taifa Muhimbili.

Profesa Zakaria Habib akimkabidhi cheti Dkt. Zaitun Bokhary wa Muhimbili.

Mkurugenzi Mtendaji wa Muhimbili, Profesa Museru (mwenye Kaunda suti na miwani) akiwa katika picha ya pamoja na wataalamu wa afya kutoka Muhimbili na Hospitali ya Tiba na Utafiti ya Chuo Kikuu cha King Faisal.

--------------------------------------------------------------------------------------------------------------------------------------------------

 

Watoto 6 wapandikizwa Vifaa vya Usikivu Muhimbili

Dar es Salaam - 31/01/2018

Watoto sita wenye tatizo la kutosikia wamefanyiwa upasuaji na kupandikizwa vifaa vya usikivu katika Hospitali ya Taifa Muhimbili (MNH).

Upasuaji huo umeanza Januari 29, mwaka huu na umehusisha wataalam wa Muhimbili kwa kushirikiana na wataalam kutoka Chuo Kikuu cha Tiba Cairo, Misri.

Daktari Bingwa wa Masikio, Pua na Koo Dkt. Edwin Liyombo amesema hii ni ni mara ya pili kwa upasuaji huo kufanyika Muhimbili, upasuaji wa kwanza ulifanyika Juni mwaka jana ambapo watoto watano waliwekewa vifaa hivyo.

Akisisitiza amesema Hospitali ya Taifa Muhimbili inaendelea kutekeleza azma ya serikali ya kupunguza idadi ya wagonjwa wanaokwenda kutibiwa nje ya nchi ambao mara nyingi walikuwa wakifuata matibabu yasiyopatikana hapa nchini ama kutokana na kutokuwepo kwa wataalam au ukosefu wa vifaa vya kutolea huduma husika.

“Takwimu za MNH zinaonyesha kuwa asilimia 95 ya wagonjwa ambao wanahitaji kufanyiwa upasuaji wa kuwekewa kifaa cha usikivu ni watoto wadogo , hivyo huduma hii itasaidia watoto wengi hapa nchini lakini pia inazidi kuwajengea uwezo wataalam wetu wa ndani’’ amesema Dkt. Liyombo.

Kwa mujibu wa Dkt. Liyombo, kupeleka mtoto mmoja nje ya nchi kwa ajili ya kupandikizwa kifaa cha usikivu ni kati ya Shilingi milioni 85 hadi Shilingi milioni 100 wakati gharama ya upasuaji kwa mtoto mmoja katika Hospitali ya Taifa Muhimbili ni shilingi milioni 33.

Akielezea ukubwa wa tatizo la kutosikia amesema kati ya watoto 1,000 wanaozaliwa, watoto watano wanazaliwa na tatizo la kutosikia hivyo kutokana na hali hiyo wazazi wanapaswa kujenga tabia ya kuwapeleka watoto wao hospitalini ili kubaini tatizo mapema.

Katika Hospitali za Umma, Tanzania ni nchi ya kwanza kutoa huduma ya upandikizaji wa vifaa vya usikivu na ya pili kutoa huduma hiyo katika nchi za ukanda wa Afrika Mashariki ikitanguliwa na Kenya.

Picha na John Stephen, Hospitali ya Taifa Muhimbili

Mkuu wa Idara ya Magonjwa ya Pua na Masikio na Daktari Bingwa wa Magonjwa ya Pua na Masikio wa Hospitali ya Taifa Muhimbili (MNH), Dkt Edwin Liyombo akipandikiza kifaa cha usikivu kwa mtoto Raiyyan Mshana mwenye tatizo la usikivu baada ya kumfanyia upasuaji leo. Kulia ni Profesa Hassan Wahba kutoka Chuo Kikuu cha Tiba nchini Misri.

Picha ikionyesha jinsi Dkt. Edwin Liyombo akipandikiza kifaa cha usikivu kwa mtoto Raiyyan Mshana mwenye tatizo la usikivu.

Baadhi ya watoto waliofanyiwa upasuaji wa kupandikiza kifaa cha usikivu jana katika Hospitali ya Taifa Muhimbili wakicheza karata leo. Watoto hao wanaendelea vizuri na matibabu baada ya upasuaji huo.

Dkt Liyombo akizungumza na waandishi wa habari leo kuhusu watoto waliopandikizwa vifaa vya usikivu baada ya kufanyiwa upasuaji wa masikio.

--------------------------------------------------------------------------------------------------------------------------------------------------

23 Kufanyiwa Upasuaji wa Pressure ya Macho Muhimbili

Dar es Salaam - 05/12/2017

Hospitali ya Taifa Muhimbili-MNH- kwa kushirikiana na Hospitali ya Mtakatifu Thomas ya Uingereza inafanya upasuaji kwa wagonjwa wenye matizo ya pressure macho zoezi lililoanza leo na linataraji kukamalizika Disemba 7 mwaka huu.

Daktari Bingwa wa upasuaji wa macho na pressure ya jicho katika Hospitali ya Taifa Muhimbili Neema Kanyaro amesema jumla ya wagonjwa 23 watafanyiwa upasuaji huo ambapo kati ya hao watatu ni watoto.

Kwa mujibu wa Dkt. Neema upasuaji huo unafanyika kwa kumuwekea mgonjwa kifaa maalum cha kupunguza pressure ya jicho ambapo kifaa hicho kinasaidia kupunguza maji kwenye jicho.

‘’ Jicho linapata pressure kwasababu maji yanakuwa mengi kwenye jicho kwahiyo kifaa hicho (Implant) kitawekwa kwa mgonjwa ili kupunguza maji kwenye jicho, pia kifaa hiki kinagharimu kati ya Dola 500 hadi Dola 1,000 .’’ Amesema Dkt. Neema.

Ametaja dalili ya pressure ya macho kwa watu wazima ni kutokuona ambapo kwa watoto jicho linakuwa kubwa , jicho linatoa machozi na pia mboni ya jicho kuwa nyeupe.

Aidha Dkt. Huyo ametoa ushauri kwa watu wazima wenye umri kuanzia miaka 40 kujenga utamaduni wa kufanya uchunguzi wa pressure ya macho angalau mara moja kwa mwaka ili kuweza kugundua tatizo mapema na kupata tiba kwa wakati.

Daktari Bingwa wa Upasuaji wa Presha ya Macho wa Hospitali ya Taifa Muhimbili (MNH), Dkt. Neema Daniel Kanyaro (kulia) akimfanyia upasuaji mgonjwa mwenye tatizo la presha ya macho kwa kushirikiana na madaktari bingwa kutoka Hospitali ya Mtakatifu Thomas ya Uingereza. Kushoto ni Daktari Bingwa wa Upasuaji wa Macho, Dkt. Pouya Alaghband na Profesa Lim Sheng kutoka hospitali ya Mtakatifu Thomas.

Madaktari bingwa wa macho wa Hospitali ya Taifa Muhimbili kwa kushirikiana na madaktari bingwa wa Muhimbili wakiendelea na upasuaji kwa mgonjwa mwenye tatizo la presha ya macho.

Sehemu ya jicho ikionekana katika ‘screen’ wakati upasuaji wa presha ya jicho ukiendelea kufanywa na madaktari bingwa kutoka Hospitali ya Mtakatifu Thomas ya Uingereza kwa kushirikiana na madaktari wabobezi wa Muhimbili.

Daktari Bingwa wa Upasuaji wa Presha ya Macho wa Hospitali ya Taifa Muhimbili (MNH), Dkt. Neema Daniel Kanyaro akimwandaa mgonjwa mwingine kabla ya kuanza kufanyia upasuaji wa macho leo.

--------------------------------------------------------------------------------------------------------------------------------------------------

Upasuaji wa Kihistoria, Aliyepandikizwa Figo Muhimbili Aruhusiwa

Dar es Salaam - 01/12/2017

Mgonjwa aliyefanyiwa upasuaji wa kihistoria wa kupandikizwa figo leo ameruhusiwa kutoka katika hospitalini akiwa na afya njema.

Bibi Prisca Mwingira ambaye amefanyiwa upasuaji mkubwa na wa kwanza kufanyika hapa nchini alipandikizwa figo Novemba 21, mwaka huu katika Hospitali ya Taifa Muhimbili (MNH) chini ya timu ya wataalam wa MNH kwa kushirikiana na watalaam wa Hospitali ya BLK ya nchini India.

Akizungumza na waandishi wa habari leo baada ya kuruhusiwa kutoka hospitalini Bibi Prisca amewashukuru watalaamu wote walioshiriki katika kumuhudumia na pia ametumia fursa huyo kumuomba Rais John Magufulu kuendelea kuisaidia MNH ili kuhakikisha huduma za kibingwa wa juu zinaendelea kutolewa katika hospitali hiyo.

“Kipekee namshukuru mwenyezi Mungu, madaktari , wauguzi, uongozi wa Hospitali ya Muhimbili pamoja na serikali kwa kufanisha matibabu yangu, nilisumbuliwa na ugonjwa wa figo takribani mwaka mzima na kuingia katika matibabu ya kuchuja damu, lakini hatimaye leo kaka yangu amejitolea figo yake moja na nimewekewa mimi kwa kweli namshukuru sana.

“Napenda kuwashauri wagonjwa wenye matatizo ya figo na wanaoendelea na huduma ya kuchuja damu wasikake tamaa kwani sasa matibabu yamepatikana na mimi ni shuhuda katika hili,’’ amesema Bibi Prisca.

Kwa upande wake, Bwan Bathelomayo Mwingira ambaye amemtolea figo dada yake, amesema anafuraha kwani amesaidia kufanikisha matibabu ya dada yake na anamuomba Mungu afya ya dada yake izidi kuimarika.

Pia, Baba mdogo wa Prisca , Ainhard Mwingira ameishukuru serikali ya awamu ya tano kwa kufanikisha huduma za kibingwa kutolewa Muhimbili.

Naye Daktari Bingwa wa Magonjwa ya figo, Dkt. Jackline Shoo wa Muhimbili amesema upasuaji wa kupandikiza figo ulitumia takribani saa nne na zoezi hilo limekamilika vizuri na mgonjwa anarejea nyumbani huku afya yake ikiwa salama.

“Mgonjwa anaondoka Hospitalini akiwa mzima salama kabisa , anaenda kujumuika na familia yake ataishi kama binadamu wengine ingawa kuna masharti atatakiwa kuyafuata kama alivyoshauriwa na wataalam,” amesema Dkt. Shoo.

Pia, Mkuu wa Kitengo cha Mawasiliano na Hudma kwa Wateja, Aminiel Aligaesha amesema upasuaji huo umegharimu Shilingi Milioni 21 na endapo mgonjwa angepelekwa nchini India matibabu yake yangegharimu Shilingi Milioni 80 hadi Shilingi milioni 100.

“Kwa niaba ya uongozi wa Hospitali ya Taifa Muhimbili nawapongeza watalaam wote walioshiriki katika upasuaji huu mkubwa na wa kihistoria na pia naishukuru serikali kwa kufanikisha zoezi hili,’’ amesema.

Bibi Prisca Mwingira ambaye alifanyiwa upasuaji wa kupandikizwa figo Novemba 21, mwaka huu akiishukuru Hospitali ya Taifa Muhimbili (MNH), madaktari bingwa wa hospitali hiyo pamoja na Rais John Pombe Magufuli baada ya afya yake kuendelea vizuri. Bibi Prisca ameruhusiwa kurejea nyumbani leo saa 6:00 mchana baada madaktari bingwa wa magonjwa figo kufanikisha upasuaji huo wa kihistoria. Kulia ni Bathelomayo Mwingira ambaye amempatia figo dada yake. Kutoka kushoto ni Daktari Bingwa wa Magonjwa ya Figo, Dkt. Jacqueline Shoo na Daktari Bingwa wa Magonjwa ya Figo, Dkt. Kisanga (katikati).

Bibi Prisca Mwingira akimshukuru kaka yake, Bathelomayo Mwingira kwa kumpatia figo kutokana na tatizo hilo kumsumbua katika kipindi cha mwaka mmoja.

Baadhi ya waandishi wa habari kutoka vyombo mbalimbali nchini wakishudia tukio hilo lakihistoria ambalo limefanywa na madaktari bingwa wa Muhimbili.

Daktari Bingwa wa Magonjwa ya Figo, Dkt. Jacqueline Shoo akizungumza na waandishi wa habari baada ya Bibi Prisca kuruhusiwa kurejea nyumbani kutokana na afya yake kuendelea vizuri.

Baadhi ya wananchi wakishudia tukio hilo leo katika Hospitali ya Taifa Muhimbili (MNH).

Mzazi wa Bibi Prisca, Mzee Mwingira akiwashukuru madaktari wa hospitali hiyo kwa kufanikisha upasuaji huo na sasa mtoto wake anaendelea vizuri kiafya.

--------------------------------------------------------------------------------------------------------------------------------------------------

Baada Kupandikiza Figo, Muhimbili Yaanza Maandalizi ya Kupandikiza Ini

Dar es Salaam - 28/11/2017

Hospitali ya Taifa Muhimbili (MNH) inatarajia kupeleka wataalam saba kwenda nchini India kwa ajili ya kuwajengea uwezo wa kupandikiza Ini pamoja na kutibu magonjwa ya mfumo wa chakula.

Mkuu wa Kitengo cha Mawasiliano kwa Umma, Aminiel Aligaesha amesema mafunzo hayo yatachukua muda wa miezi mitatu na kwamba timu hiyo ya wataalam inajumuisha madaktari bingwa wanne wa magonjwa ya mfumo wa chakula na ini, wauguzi wawili wanaosimamia mifumo ya hadubini na mhandisi wa vifaa tiba anayesimamia mitambo ya hadubini.

“Lengo la Hospitali ni kuendelea kutekeleza azma ya serikali kwa vitendo ya kupunguza rufaa za nje ambazo serikali ilikuwa ikigharamia fedha nyingi kutokana na kutokuwapo kwa wataalam wa kutibu magonjwa hayo."

‘’Utekelezaji huu unasaidia wagonjwa kupata huduma sahihi wakiwa hapahapa nchini na kupunguza vifo visivyo vya lazima kwani wakati mwingine ililamizimika wagonjwa hawa kusubiri kwa muda mrefu,’’ amesema Aminiel.

Amesema upatikaji wa huduma hizo hapa nchini utasaidia kwa kiwango kikubwa kuokoa na kuboresha maisha ya wagonjwa waliokuwa wanahitaji huduma hiyo.

“Hii ni awamu ya kwanza kwa wataalam wa magonjwa hayo kwenda kwenye mafunzo na mara watakaporudi hospitali itapeleka awamu nyingine ikiwa ni pamoja na kuimarisha miundombinu ya tiba na vifaa tiba,”amesema.

Kwa upande wake Mkuu wa Kitengo cha Magonjwa ya Mfumo wa Chakula na Ini, Dk. John Rwegasha ambaye pia ni Daktari Bingwa wa magonjwa hayo amesema mafunzo hayo yatawaongezea ufanisi katika kufanya uchunguzi na tiba ya magonjwa ya ini kwa kutoa mawe, kuzibua mifereji ya nyongo na kongosho iliyozibwa na uvimbe , kufanya upasuaji wa ini ili kuondoa uvimbe na kupandikiza ini kwa wagonjwa wenye mahitaji hayo.

Kwa mujibu wa Dk. Rwegasha hatua hiyo itaipunguzia mzigo serikali wa kupeleka wagonjwa nje ya nchi kwani mgonjwa mmoja akipelekwa nchini India kwa ajili ya upasuaji wa Ini kwa wastani hugharimu Shilingi milioni 100.

Huduma nyingine kubwa ambazo zimeanza kutolewa na Muhimbili ni upandikizaji wa figo na upandikizaji wa vifaa vya usikivu kwa watoto watano waliokuwa na matatizo ya kutosikia. Upandikizaji wa figo umefanikiwa kwa mafanikio makubwa na sasa mgonjwa anaendelea vizuri.

Picha na John Stephen, Hospitali ya Taifa Muhimbili.

Mkuu wa Kitengo cha Mawasiliano na Huduma kwa Wateja, Aminiel Aligaesha wa Hospitali ya Taifa Muhimbili (MNH) akizungumza na waandishi wa habari juu ya hospitali hiyo kupeleka wataalamu saba India kwa ajili ya kujengewa uwezo wa kufanya upasuaji wa kupandikiza ini. Kushoto ni Daktari Bingwa wa Magonjwa ya Mfumo wa Chakula na Ini, Dkt. Masolwa Mwanasai, kulia ni Mkuu wa Kitengo cha Magonjwa ya Mfumo wa Chakula na Ini, Dkt. John Rwegasha na Daktari Bingwa wa Upasuaji wa Mfumo wa Chakula na Ini, Dkt. Ally Mwanga.

Waandishi wa habari kutoka vyombo mbalimbali wakiwa kwenye mkutano kuhusu Muhimbili kupeleka wataalamu saba India kwa ajili ya kujengewa uwezo wa kufanya upasuaji wa kupandikiza Ini pamoja na kutibu magonjwa ya mfumo wa Ini.

Daktari Bingwa wa Magonjwa ya Mfumo wa Chakula na Ini, Dkt. Masolwa Mwanasai akifafanua jambo kwa waandishi wa habari leo. Kushoto ni Mhandisi wa Vifaa Tiba, James Moyo na Mkuu wa Kitengo cha Mawasiliano na Huduma kwa Wateja, Aminiel Aligaesha wa hospitali hiyo wakiwa kwenye mkutano huo Leo.

Mkuu wa Kitengo cha Magonjwa ya Mfumo wa Chakula na Ini Muhimbili, Dkt. John Rwegasha akiwaeleza waandishi wa habari jinsi vifaa tiba vinavyofanya kazi ya kubaini magonjwa ya mfumo wa chakula na ini.

-----------------------------------------------------------------------------------------------------

EMAT, Muhimbili Wapongezwa Kwa Kutekeleza Mikakati ya Serikali

Dar es Salaam - 13/10/2017

Serikali imekipongeza Chama cha Watoa Huduma za Magonjwa ya Dharura Tanzania (EMAT) kwa kushirikiana na Hospitali ya Taifa Muhimbili (MNH) pamoja na Chuo Kikuu cha Afya na Tiba Shirikishi Muhimbili (MUHAS) kwa kuendelea kutekeleza mpango wa Serikali wa kutoa mafunzo kwa madaktari na wauguzi nchini.

Lengo la mafunzo hayo ni kuwajengea uwezo madaktari na wauguzi kutoka hospitali za mikoani na wilayani ili kutoa huduma bora kwa wagonjwa mahututi na ajali.

EMAT, MNH, MUHAS pamoja na wadau mbalimbali ilianza kutoa mafunzo kwa madaktari na wauguzi kutoka hospitali mbalimbali nchini ikiwa ni utekelezaji wa mpango wa serikali kupitia Wizara ya Afya, Maendeleo ya Jamii, Jinsia, Wazee na Watoto wa kuhakikisha inaokoa maisha ya wagonjwa wa dharura na ajali kupitia wataalamu wa Afya waliopo mikoani na wilayani.

Akifungua Mkutano wa EMAT, Katibu Mkuu wa Wizara hiyo, Dkt. Mpoki Ulisubisya amesema kwa kuwa dharura hutokea mahali popote na kwa kila mtu ni muhimu sababu mpango huo umekuwa ukiokoa maisha ya wagonjwa kwa zaidi asilimia 45.

“Najivunia kuona kazi kubwa inayofanywa na EMAT ambayo inasaidia kutekeleza mpango wa Serikali wa kusambaza huduma za dharura hapa nchini. Serikali inatambua juhudi zenu na tunawahakikishia tutaendelea kuwaunga mkono ili muendelee kuboresha huduma za dharura nchini,” alisema Dkt. Mpoki.

Katibu Mkuu amesema ili kuhakikisha wagonjwa mahututi wanaendelea kuokolewa, Serikali imewasomesha wataalamu bingwa wa magonjwa ya dharura na ajali 27 ambao wanafanya kazi katika hospitali mbalimbali nchini.

Amesema Serikali itaendelea kuwasomesha wataalamu zaidi wa huduma ya dharura na ajali ili kuhakikisha kila mkoa unakuwa wataalamu bingwa wa huma hiyo.

“Sasa hivi tutafungua idara ya magonjwa ya dharura na ajali katika Hospitali ya Rufaa Mbeya, Hospitali ya Mkoa ya Maount Meru Arusha na baadaye kwenda katika hospitali za mikoa na wilaya nchini,” amesema.

Rais wa EMAT, Dkt. Hendry Sawe amesema chama hicho kimejiwekea malengo kwa kushirikiana Wizara ya Afya na wadau wengine ili kutimiza lengo la kuwa na huduma bora za tiba ya dharura kwa Watanzania wote.

Mwenyekiti wa Kamati ya Maandalizi, Dkt. Upendo George amesema EMAT ikishirikiana na MNH, MUHAS, Abbot Fund Tanzania Stanbic Bank, MSD, Dkt. Ntuyabaliwe Foundation, Aga Khan na MOKAS imetoa mafunzo ya siku mbili kwa washiriki zaidi ya 150 kutoka hospitali mbalimbali nchini ili kuwawezesha kutumia vifaa vichache vilivyopo wakati wa kutoa huduma kwa wagonjwa wa dharura.

Daktari Bingwa wa Magonjwa ya Dharura na Ajali, Dkt. Irene Kulola amesema washiriki wote kutoka sehemu mbalimbali nchini wamepatiwa mafunzo stahiki ili waweze kuwafundisha wenzao jinsi ya kuokoa maisha kwa wagonjwa wa dharura na ajali.

Naye Katibu wa EMAT ambaye ni Mkuu wa Idara ya Magonjwa ya Dharura na Ajali Muhimbili, Dkt. Juma Mfinanga amesema kuwapo kwa wataalamu waliobobea katika kutoa huduma za dharura na ajali katika hospitali hiyo kumesaidia kuboresha huduma na kupunguza vifo.

Picha na John Stephen, Hospitali ya Taifa Muhimbili.

Katibu Mkuu wa Wizara ya Afya, Maendeleo ya Jamii, Jinsia, Wazee na Watoto, Dkt. Mpoki Ulisubisya akizungumza katika mkutano wa Chama cha Watoa Huduma za Magonjwa ya Dharura Tanzania (EMAT) ambao umefanyika jijini Dar es Salaam leo.

Baadhi ya washiriki kutoka mikoa mbalimbali nchini na nje ya nchi wakiwa kwenye mkutano huo leo.

Rais wa EMAT, Dkt. Hendry Sawe akieleza juhudi zilizofanywa na chama hicho katika kutoa mafunzo kwa wataalamu wa magonjwa ya dharura na ajali nchini.

Baadhi ya washiriki wakimsikiliza Rais wa EMAT leo jijini Dar es Salaam.

Mkurugenzi wa Mpango Endelevu wa Abbot Foundation, Dkt. Festo Kayandabila akiueleza mkutano huo jinsi mfuko huo unavyoshirikiana na EMAT katika kutoa mafunzo kwa wataalamu wa magonjwa ya dharura na ajali nchini.

Washiriki wakiwa katika picha ya pamoja na Katibu Mkuu wa Wizara ya Afya, Maendeleo ya Jamii, Jinsia, Wazee na Watoto, Dkt. Mpoki.

 

--------------------------------------------------------------------------------------------------------------------------------------------------

EMAT Yaanza Mafunzo ya Kuokoa Maisha ya Wagonjwa Mahututi Nchini

Dar es Salaam - 12/10/2017

Chama cha Watoa Huduma za Magonjwa ya Dharura Tanzania (EMAT) kwa kushirikiana na Hospitali ya Taifa Muhimbili (MNH), Chuo kikuu cha Afya na Sayansi Shirikishi Muhimbili (MUHAS) wameanza kutoa mafunzo kwa vitendo jinsi ya kuwahudumia wagonjwa wa dharura kwa wataalamu mbalimbali wa afya.

Lengo la mafunzo hayo ni kupunguza vifo vinavyotokana na magonjwa ya dharura na ajali nchini kwani utoaji bora wa huduma ya magonjwa ya dharura na ajali imesaidia kupunguza vifo kwa zaidi ya asilimia 45 duniani.

Kwa mujibu wa Rais wa EMAT, Dkt. Hendry Sawe, mafunzo hayo ya siku mbili yanafanyika katika kampasi za Muhimbili, MUHAS na Hospitali ya Aga Khan na kwamba yanahusisha watoa huduma zaidi ya 150 kutoka mikoa mbalimbali hapa nchini.

Dkt. Sawe amesema lengo la kuu la mafunzo kwa njia ya vitendo ambayo yameanza kutolewa leo hadi kesho ni kuwawezesha watoa huduma nchini kuwa tayari kutoa huduma za kuokoa maisha kwa kutumia mbinu mbalimbali za kitaalamu kwenye hospitali zao.

“EMAT kwa kushirikiana Wizara ya Afya, Ustawi wa Jamii, Jinsia, Wazee na Watoto na wadau wengine, tunatimiza lengo la kuwa na huduma bora za tiba ya dharura kwa Watanzania wote, hivyo mafunzo haya ni hatua muhimu sana ya kutimiza malengo hayo,” amesema Dkt. Sawe.

Rais huyo amesema mafunzo hayo pamoja na mkutano yanaratibiwa na EMAT kwa kushirikiana na MHN, MUHAS, Aga Khan, MSD, Abbot Fund Tanzania, Stanbic Bank, MOKAS na Dkt. Ntuyabaliwe Foundation.

Naye Katibu wa EMAT ambaye ni Mkuu wa Idara ya Magonjwa ya Dharura na Ajali katika Hospitali ya Taifa Muhimbili, Dkt. Juma Mfinanga amesema kuwapo kwa wataalamu waliobobea katika kutoa huduma za dharura na ajali, kumesaidia kuboresha huduma katika hospitali hiyo na kupunguza vifo kwa zaidi ya asilimia tano.

Katika hatua nyingine, Dkt. Pendo George ambaye ni Mwenyekiti wa Kamati ya Maandalizi ya mkutano huo amesema washiriki wanafundishwa jinsi ya kutumia vifaa vichache vilivyopo wakati wa kutoa huduma kwa wagonjwa wa dharura.

“Kama unataka kumpima mgonjwa mapigo ya moyo na kukuna mashine, daktari au muuguzi anapaswa kutumia njia mbadala ili kuokoa maisha ya mgonjwa,”amesema Dkt. Pendo.

Mratibu wa mafunzo hayo, Daktari Bingwa wa Magonjwa ya Dharura na Ajali, Dkt. Irene Kulola amesema washiriki wote watapata mafunzo stahiki ili kuokoa maisha ya kila mtanzania nchini. Amesema washiriki kutoka mikoa mbalimbali na nchi za jirani wamehudhuria mafunzo hayo.

Mafunzo hayo yanatarajiwa kuhitimishwa na kongamano kuu la kisayasi ‘Tanzanian Conference on Emergency Medicine’ ambalo litafanyika Ijumaa wiki hii tarehe 13/10/2017 kwenye ukumbi wa mikutano wa LAPF, Kijitonyama, jijini Dar es Salaam. Mgeni Rasmi katika kongamano hilo anatarajiwa kuwa Katibu Mkuu wa Wizara ya Afya, Maendeleo ya Jamii, Jinsia, Wazee na Watoto, Dkt. Mpoki Ulisubisya.

Picha na John Stephen, Hospitali ya Taifa Muhimbili.

Dkt. Kilalo Mjema wa Hospitali ya Taifa Muhimbili (MNH) akitoa mafunzo jinsi ya kuokoa maisha ya mtoto mdogo kwa washiriki mbalimbali.

Washiriki mbalimbali wakimsikiliza Dkt. Ramadhani Juma wa hospitali hiyo wakati akitoa mafunzo ya vifaa gani vinapaswa kutumika kwa mgonjwa mwenye tatizo la kupumua.

Muuguzi Songoma John wa Muhimbili akiwaeleza washiriki jinsi kumpatia huduma mtoto mwenye tatizo katika mfumo wa njia ya hewa (choking)

Baadhi ya washiriki wakijifunza mafunzo ya uongozi katika kutoa huduma ya dharura kwa wagonjwa.

Dkt. George Dilunga akitoa mafunzo kwa washiriki jinsi ya kumuhudumia mgonjwa mwenye tatizo la kupumua (respiratory failure).

--------------------------------------------------------------------------------------------------------------------------------------------------

Muhimbili Yapewa Msaada wa Thamani Sh10 Milioni NMB

Dar es Salaam - 06/10/2017

Kaimu Mkurugenzi wa Uuguzi katika Hospitali ya Taifa Muhimbili (MNH), Zuhura Mawona ameishukuru Benki ya NMB kwa kuipatia hospitali hiyo msaada wa wenye thamani ya Sh 10 milioni.

Benki hiyo imetoa magodoro 35, vitanda vitatu na mashuka 100 ikiwa ni utaratibu wa kurejesha faida kwa wateja wa benki hiyo.

“Msaada huu utatumika kwa ajili ya kuwanufaisha Watanzania wengi, hivyo tunaomba muendelee kuisaidia Muhimbili kwani inahitaji msaada zaidi,” amesema Zuhura.

Naye Meneja wa NMB tawi la Muhimbili, Lukas Malua amesema benki hiyo imetenga Sh 1 bilioni ikiwa ni sehemu ya faida yake ili kurejesha faida hiyo kwa jamii.

Meneja wa NMB tawi la Hospitali ya Taifa Muhimbili (MNH), Lukas Malua akikabidhi msaada wenye thamani ya Sh 10 milioni kwa Kaimu Mkurugezi wa Uuguzi wa hospitali hiyo, Zuhura Mawona. Msaada uliokabidhiwa leo ni magodoro 35, mashuka 100 na vitanda vitatu.

--------------------------------------------------------------------------------------------------------------------------------------------------

Serikali Yaipongeza Muhimbili kwa Kutoa Huduma Bora

Dar es Salaam.

Serikali imepongeza juhudi zinazofanywa na Hospitali ya Taifa Muhimbili (MNH) za kuboresha huduma sanjari na kuwawezesha watalaam kusoma ili wapate ujuzi zaidi na kutoa huduma bora na za kibingwa.

Kauli hiyo imetolewa leo Jijini Dar es Salaam na Katibu Mkuu Wizara ya Afya, Maendeleo ya Jamii, Jinsia, Wazee na Watoto Dk. Mpoki Ulusubisya wakati akizungumza na watumishi wa hospitali hiyo kupitia Idara ya Usingizi.

Dk. Mpoki amesema serikali inatambua juhudi zinazofanywa na uongozi wa hospitali na kwamba hatua hiyo inaleta faraja kwa Watanzania kwani sasa wana uhakika wa kupata huduma bora .

“Naona mabadiliko makubwa hapa Muhimbili, mmeongeza vyumba vya upasuaji, Vyumba vya wagonjwa mahutuni (ICU) na pia mnaendelea kuboresha huduma zingine kwakweli hatua hii ni ya kupongezwa na ninaomba muendelee kujituma kwani hospitali hii inategemewa kwa sababu mna watalaam wengi waliobobea hapa,’’ amesema Dk. Mpoki.

Kuhusu kusomesha wataalam, Katibu Mkuu amesema hatua hiyo ni nzuri kwani watalaam hao watapata fursa ya kuwatawafundisha wengine ili nao wapate ujuzi .

Kwa upande wake Mkurugenzi Mtendaji wa Hospitali ya Taifa Muhimbili Profesa Lawrence Museru amesema MNH inakabiliwa na changamoto mbalimbali ikiwemo upungufu wa wataalam katika Idara ya Usingizi na kwamba hospitali inaendelea kutatua changamoto hizo.

Dk. Mpoki ambaye ameambatana na Mkurugenzi wa Huduma za Tiba Dk. Doroth Gwajima pamoja na mambo mengine wamepata fursa ya kutembelea maeneo mbalimbali ya Hospitali ya Taifa Muhimbili ikiwemo vyumba vya upasuaji, wodi ya wagonjwa mahututi na wodi ya watoto.

Picha na John Stephen, Hospitali ya Taifa Muhimbili

Katibu Mkuu wa Wizara ya Afya, Maendeleo ya Jamii, Jinsia, Wazee na Watoto, Dk. Mpoki Ulusubisya (kulia) akitembelea Hospitali ya Taifa Muhimbili (MNH) leo ili kuona maeneo mbalimbali yaliokarabatiwa vikiwamo vyumba vya upasuaji na vyumba vya kulaza wagonjwa wa figo. Kushoto ni Mkurugenzi Mtendaji wa hospitali hiyo, Profesa Lawrence Museru.

Katibu Mkuu wa Wizara ya Afya, Maendeleo ya Jamii, Jinsia, Wazee na Watoto, Dk. Mpoki Ulusubisya akizungumza na wafanyakazi wa Idara ya Uzingizi leo pamoja na watumishi wengine wa hospitali hiyo

Baadhi ya wafanyakazi wa idara hiyo pamoja na watumishi wengine mbalimbali wakimsikiliza Katibu Mkuu wa Wizara hiyo, Dk. Ulusubisya leo.

Mkurugenzi Mtendaji wa Hospitali ya Taifa Muhimbili, Profesa Lawrence Museru akimkaribisha Katibu Mkuu wa Wizara hiyo, Dk. Ulusubisya kuzungumza na wafanyakazi wa idara hiyo leo.

Wafanyakazi wa Muhimbili wakiwamo wa Idara ya Usingizi wakimsikiliza Mkurugenzi wa Muhimbili, Profesa Museru.

--------------------------------------------------------------------------------------------------------------------------------------------------

Muhimbili Yazindua Mwongozo wa Kuwahudumia Watoto Wachanga

Na John Stephen

Dar es Salaam, Tanzania. Hospitali ya Taifa Muhimbili (MNH) leo imezindua muongozo utakaosaidia kuwahudumia watoto wachanga( Neonatal Guideline) wenye umri kuanzia siku 0 hadi siku 28 ili kuhakikisha wanapata huduma inayostahiki.

Muongozo huo umeandaliwa na madaktari wa MNH na kupitiwa na wadau mbalimbali wakiwemo wataalam kutoka Chuo Kikuu cha Afya na Sayansi Shirikishi Muhimbili (MUHAS) pamoja na Chuo Kikuu cha Kwazulu Natal kilichopo Afrika Kusini.

Mkurugenzi Mtendaji wa Hospitali ya Taifa Muhimbili Profesa Lawrence Museru amesema muongozo huo si tu unamanufaa kwa MNH bali pia una manufaa kwa hospitali zingine kwani utawezesha mtoto kupata tiba inayotakiwa hata sehemu ambazo hakuna watalaam.

Kwa upande wake Daktari Bingwa wa Watoto Edna Majaliwa ambaye pia ni Mkuu wa Kitengo cha Watoto Wachanga wa hospitali hiyo amesema kuwepo kwa muongozo huo kutasaidia kupunguza vifo vya watoto wachanga sanjari na kupunguza rufaa za watoto hao kuletwa Muhimbili .

‘’ Kusudio letu ni kuendelea kupunguza vifo vya watoto wachanga , MNH tumefanikiwa kupunguza vifo hivyo kutoka 26 kwa kila vizazi hai 1,000 na kufikia 18 kwa kila vizazi hai 1,000. Kwa mwaka watoto wanaozaliwa hapa ni takribani 10,000 hivyo naamini muongozo huuu utaleta mabadiliko makubwa‘’ amesema Dk. Majaliwa.

Pia ameelezea vyanzo vinavyosababisha vifo vya watoto wachanga kuwa ni madhara ya kuwa njiti, mtoto ambaye amezaliwa na hakulia pamoja na mtoto mwenye vimelea vya bakteria.

Akiwasilisha mada kuhusu muongozo huo , Daktari wa watoto , Jullieth Cosmas ametaja sababu zinazochangia watoto wachanga kulazwa Hospitalini kuwa ni mtoto kuzaliwa kabla ya wakati(Njiti) mtoto kushindwa kupumua vizuri pindi anapozaliwa , mtoto kupata maambukizi , mtoto kutolia wakapi alipozaliwa na mtoto kuumia wakati akizaliwa.

Mkurugenzi Mtendaji wa Hospitali ya Taifa ya Muhimbili (MNH), Profesa Lawrence Museru akizungumza katika uzinduzi wa kitabu chenye mwongozo jinsi ya kutoa huduma ya afya kwa watoto wachanga wenye umri sufuri hadi siku 28. Uzinduzi huo umefanyika leo katika hospitali hiyo.

Daktari wa watoto wa hospitali hiyo, Dk. Judith Cosmas ambaye ameshiriki kuaanda kitabu hicho akizungumza kwenye mkutano huo.

Baadhi ya wataalamu wa afya wakiwa kwenye mkutano huo leo.

Mkuu wa Idara ya Watoto, Dk. Merry Charles akisisitiza jambo huku akionyesha kitabu hicho ambacho kitakuwa kikitumika wakati wa kuwahudumia watoto hao.

Mkurugenzi Mtendaji, Profesa Museru (kaunda suti) akiwa kwenye mkutano huo leo.

Mkurugenzi wa hospitali hiyo akiwa katika picha ya pamoja na wataalamu wa afya MNH na wadau mbalimbali.

--------------------------------------------------------------------------------------------------------------------------------------------------

Cuba Yaipongeza Muhimbili Leo kwa Kutoa Huduma Bora

Na John Stephen

Balozi wa CUBA nchini ametembelea Hospitali ya Taifa Muhimbili (MNH) leo na kuipongeza hospitali hiyo kwa kutoa huduma nzuri za afya.

Ujumbe kutoka ubalozi huo umetembelea maeneo mbalimbali ya kutolea huduma, ikiwamo vyumba vya kutoa huduma kwa wagonjwa wanaohitaji uangalizi maalumu (ICU), vyumba vya upasuaji na maeneo mengine ya kutoa huduma.

Hospitali hiyo inashirikiana na Cuba katika kutoa huduma ya afya na imeahidi kuendelea kushirikiana na MNH kwa ajili ya kuboresha huduma hiyo.

Mkurugenzi Mtendaji wa MNH, Profesa Lawrence Museru amesema hospitali hiyo itaendelea kushirikiana na Cuba ambayo imeahidi kupeleka wataalamu wake katika hospitali hiyo.

“Tunaushukuru ubalozi wa Cuba kwa ushirikiano mkubwa waliouonyesha, hii ni moja ya njia nzuri ya kutekeleza malengo yetu,” amesema Profesa Museru.

Balozi wa Cuba nchini Tanzania, Profesa Lucas Domingo Hernandez Polledo ameipongeza Muhimbili kwa kufanya upanuzi mkubwa katika majengo mbalimbali kwa lengo la kutoa huduma bora.

“Nimefurahishwa na huduma bora, pia vyumba vya wagonjwa wanaohitaji uangalizi maalimu ni vizuri na vimekizi mahitaji ya wagonjwa,” amesema Balozi Polledo.

Naye Mkurugenzi wa Upasuaji, Dk Julieth Magandi amesema Cuba imekubali kuipatia Muhimbili wauguzi waliobobea katika kutoa huduma kwa wagonjwa wanaohitaji uangalizi maalumu.

“Cuba imekubali kuipatia Muhimbili madaktari wawili waliobobea katika kutoa huduma za uzingizi, madaktari bingwa wawili wa kutoa huduma katika vyumba vya upasuaji na daktari bingwa mmoja wa mionzi,” amesema Dk Magandi.

PICHA NA JOHN STEPHEN, HOSPITALI YA TAIFA MUHIMBILI

Balozi wa Cuba nchini Tanzania, Profesa Lucas Domingo Hernandez Polledo akizungumza na baadhi ya wakurugenzi wa Hospitali ya Taifa Muhimbili (MNH) wakati akiitembelea leo. Kushoto ni Mratibu wa madaktari wa Cuba nchini, Dk Maylen Lopez. Kutoka kushoto wa tatu ni Mkurugenzi wa Rasilimali Watu Muhimbili, Makwaia Makani, Mkurugenzi wa Upasuaji, Dk. Julieth Magandi, ofisa Idara ya ufundi, Mkurugenzi wa Tiba, Dk. Hedwiga Swai, Mkurugenzi Mtendaji, Profesa Lawrence Museru na Mkurugenzi wa Ufundi, Gaudence Aksante.

Mkurugenzi Mtendaji wa Hospitali ya Taifa Muhimbili (MNH), Profesa Lawrence Museru akizungumza na Balozi wa Cuba nchini, Profesa Lucas Domingo Hernandez Polledo. Kulia ni Mkurugenzi wa Ufundi, Gaudence Aksante.

Balozi wa Cuba nchini, Profesa Lucas Domingo Hernandez Polledo akimsikiliza Mkurugenzi Mtendaji wa Muhimbili, Profesa Museru leo kabla ya kutembelea maeneo ya kutoa huduma katika hospitali hiyo.

Balozi wa Cuba na baadhi ya wafanyakazi wa hospitali hiyo wakiwa katika chumba cha wagonjwa wanaohitaji uangalizi maalumu (ICU)

Ujumbe kutoka Ubalozi wa Cuba ukiwa katika chumba cha upasuaji Muhimbili leo.

Baadhi ya wakurugenzi wa Muhimbili wakiwa katika picha ya pamoja na ubalozi wa Cuba leo baada ya kuitembelea hospitali hiyo.

--------------------------------------------------------------------------------------------------------------------------------------------------

Wizara ya Afya Malawi Yatembelea Muhimbili , Waipongeza Kwa Kutoa Huduma Bora

Hospitali ya Taifa Muhimbili (MNH) leo imepokea ujumbe wa wataalamu wa Afya kutoka Wizara ya Afya ya nchini Malawi.

Ujumbe huo umeongozwa na Katibu wa Afya nchini humo , Dk. Dan Namarika umehusisha Madaktari , viongozi pamoja na wataalam mbalimbali kutoka katika Wizara hiyo pamoja na taasisi nyingine za afya .

Akizungumza baada ya kupokea ujumbe huo , Mkurugenzi Mtendaji wa Hospitali ya Taifa Muhimbili (MNH), Profesa Lawrence Museru amesema ujio wa watalaamu hao unatoa fursa ya kujifunza na kubadilishana uzoefu katika utendaji kazi.

Naye Mkurugenzi wa Huduma za Upasuaji katika Hospitali ya Taifa Muhimbili, Dk. Juliethi Magandi amesema katika mwaka wa Fedha 2016-2017 Hospitali imehudumia wagonjwa wa nje Laki Nne , Thelathini na Sita Elfu na Miatatu Tisini na Nne wakati wagonjwa wa ndani waliohudumiwa ni Hamsini na Tisa Elfu na Miatano Hamsini na Tano.

Akizungumzia lengo la ujio wao , Katibu wa Afya wa nchi hiyo Dk. Dan Namarika amesema wamekuja kujifunza jinsi ambavyo MNH inafanya kazi na kutekeleza mipango yake .

Lengo la serikali ya Malawi na Wizara ya Afya kwa ujumla ni kuhakikisha inaboresha utoaji wa huduma hususani katika Hospitali za Umma nchini humo.

Ujumbe usema kuwa umefurahishwa jinsi Muhimbili inavyotoa huduma za kibingwa na kusomesha wataalamu wa afya nje ya nchi kwa ajili ya kupatiwa mafunzo.

Mkurugenzi Mtendaji wa Hospitali ya Taifa ya Muhimbili (MNH), Profesa Lawrence Museru akizungumza na ujumbe kutoka Malawi ambao umetembelea hospitali hiyo LEO ili kujifunza jinsi inavyoboresha huduma za afya. Kulia ni Katibu Mkuu wa Wizara ya Afya nchini Malawi, Dk. Dan Namarika.

Ujumbe kutoka Malawi wakimsikiliza Mkurugenzi Mtendaji wa Muhimbili, Profesa Museru.

Mkurugenzi wa Huduma za Upasuaji Muhimbili, Dk Julieth Magandi akieleza muundo wa hospitali kwa ujumbe wa Malawi.

Wakurugenzi wa Muhimbili wakiwamo watalaamu wengine wa afya wakimsikiliza Dk Magandi leo.

Ujumbe wa Malawi ikiongozwa na wenyeji wao wakiwa katika Jengo la Watoto leo.

Mkuu wa Idara ya Magonjwa ya Dharura na Ajali (EMD), Dk Juma Mfinga akitoa ufafanuzi kuhusu huduma zinazotolewa na idara hiyo.

Ujumbe kutoka Malawi ukiwa katika chumba cha wagonjwa wanaohitaji uangalizi maalumu (ICU).

 

 

--------------------------------------------------------------------------------------------------------------------------------------------------

Muhimbili Yazindua Mfumo wa Kulipia Huduma za Afya kwa Kadi Maalumu

31/08/2017

Na John Stephen, Hospitali ya Taifa Muhimbili (MNH)

Hospitali ya Taifa Muhimbili (MNH) leo imezindua mfumo wa kulipia huduma za afya kwa kutumia kadi maalumu.

Huduma hiyo tayari imeanza kutolewa na hospitali hiyo kwa kushirikiana na Kampuni Maxcom Afrika ambayo imepokelewa vizuri na wagonjwa pamoja na dugu wa wagonjwa.

Lengo la kulipia huduma za afya kwa kutumia mfumo huo ni kupunguza muda mwingi ambao wagonjwa wamekuwa wakitumia wakati wa kupatiwa huduma hizo.

Akizungumza na waandishi wa habari leo, Mkurugenzi Mtendaji wa Muhimbili, Profesa Lawrence Museru amesema MNH imekamilisha awamu ya kwanza ya usimikaji wa mfumo wa malipo kwa njia ya kielekroniki kwa kutumia kadi maalumu ya malipo au kwa kutumia simu za mkononi.

“Awamu ya pili wagonjwa au ndugu wa wagonjwa wataanza kulipia huduma za afya kupitia kadi zao za benki aina ya viza au Mastercard. Pia, hospitali itaongeza wigo wa kulipia kwa njia ya simu za mkononi kwa kupitia mitandao ya TTCL Pesa, Halopesa na Easypesa,” amesema Profesa Museru.

Malipo kwa njia ya Kadi Maalumu (Muhimbili Card)

  1. Mgonjwa au jamaa wa mgonjwa atapewa Kadi Maalumu na Wakala wa Muhimbili (Maxcom) ambapo atatakiwa kuijaza fedha.
  2. Baada ya kujaza fedha kwenye Kadi, mgonjwa ataelekea eneo la kutolea huduma na atapewa Hati ya Gharama (Bill Note) na kutakiwa kulipa. Atatumia Kadi yake kwa kuigusisha katika mashine ndogo (POS) na mashine hiyo itakata kiasi kilichooneshwa katika Hati ya Gharama na kutoa risiti ya mashine.
  3. Mgonjwa ataendelea kutumia Kadi yake kulipia gharama na endapo fedha kwenye Kadi zitakwisha atarudi kwenye dirisha la Wakala na kujaza tena fedha. Ikiwa fedha zitabaki kwenye Kadi Mgonjwa atakuwa na hiari ya kuziacha kwenye Kadi kama akiba au kuomba arejeshewe fedha taslimu.

Malipo kwa MPESA, TIGOPESA na Airtel Money

Wakati Mgonjwa atakapopewa Hati ya Gharama (Bill Note) na akiamua kuchagua kulipia kwa kutumia simu yake atafuata utaratibu ufuatao:

  1. Kwa mfano MPESA, mteja ataanza kwa kubonjeza
    *150*00#;
  2. Baada ya hapo atachagua huduma namba 4 ‘’LIPA kwa M-Pesa’’;
  3. Baada ya hapo atachagua huduma namba 4 ‘’Weka namba ya Kampuni ‘’, ambapo mgonjwa atajaza namba 356666 ambayo ni namba ya Hospitali ya Taifa Muhimbili;
  4. Baada ya hapo mgonjwa atatakiwa kuweka namba ya kumbukumbu ya malipo. Hapa mgonjwa atajaza namba iliyopo kwenye Hati ya Gharama (Bill Note) ambayo ni ‘’Mobile Request Number’’;
  5. Mgonjwa atapata ujumbe kupitia simu yake ikimtaarifu kuwa muamala wake umekamilika na fedha zimetumwa katika Hospitali ya Taifa ya Muhimbili.

Kwa mitandao yote ya simu mgonjwa atafuata taratibu zote hapo juu baada ya kubonyeza *150*01# kwa mteja wa Tigopesa na *150*60# kwa mteja wa AirtelMoney.

Mkurugenzi Mkuu wa Kampuni ya Maxcom Africa,Jameson Kasati akimkabidhi KADI ya MALIPO Mkurugenzi Mtendaji wa Hospitali ya Taifa Muhimbili (MNH), Profesa Lawrence Museru. Kushoto ni Mkurugenzi wa Fedha na Mipango, Gerald Jeremiah wa hospitali hiyo. Kadi hiyo itatumika kulipia huduma za afya katika hospitali hiyo.

Mkurugenzi Mtendaji wa Hospitali ya Taifa Muhimbili (MNH), Profesa Lawrence Museru akizungumza na waandishi wa habari Leo kuhusu mfumo wa kulipia huduma za afya kwa kutumia kadi maalamu. Kulia ni Mkurugenzi Mkuu wa Kampuni ya Maxcom Africa,Jameson Kasati na kushoto ni Mkurugenzi wa Fedha na Mipango, Gerald Jeremiah.

Baadhi ya maofisa wa Muhimbili na Maxcom Africa wakifuatilia mkutano huo Leo ambao umefanyika katika hospitali hiyo. Wengine waliokaa nyuma ni waandishi wa habari wakifuatilia mkutano huo leo.

Mkurugenzi wa Fedha na Mipango, Gerald Jeremiah wa Muhimbili akitoa maelezo jinsi ya kulipia huduma za afya kwa kutumia KADI ya Malipo ambayo imetengenezwa MNH kwa kushirikiana na Muhimbili.

Baadhi ya maofisa wa Muhimbili wakifuatilia mkutano huo leo.

Ofisa Masoko wa Kampuni ya Maxcom Afrika, Deogratius Lazari akiwaeleza waandishi wa habari jinsi wagonjwa na ndugu wa wagonjwa wanavyolipia huduma za afya kwa kutumia kadi maalimu.

 

--------------------------------------------------------------------------------------------------------------------------------------------------

MTOTO ALIYEUNGUA MIKONO SASA KUREJEA DARASANI

18/08/2017

Picha na John Stephen, Hospitali ya Taifa Muhimbili (MNH)

Mtoto Mwanahidi Hamisi akiwa na mama yake, Amina Mohamed Mkadengile katika Hospitali ya Taifa Muhimbili

Mtoto aliyeungua na kushindwa kuendelea na masomo mkoani Mtwara ametibiwa katika Hospitali ya Taifa Muhimbili (MNH) na sasa anaweza kuendelea na masomo pamoja na kufanya shughuli zake za kawaida.

Mtoto huyo aliungua moto baada ya kusukumwa na mwenzake shuleni na hivyo kuungua mikono yote miwili na kusababisha vidole kujikunja na kushikamana.

Baada ya kufikishwa Muhimbili madaktari bingwa walifanyia upasuaji na sasa amepona.

Daktari Bingwa wa Upasuaji, Ibrahimu Mkoma amesema mtoto Mwanahidi Hamisi aliungua miaka saba iliyopita na mikono yake kuadhirika na kushindwa kufanya kazi yoyote.

Amesema mwaka 2015 mtoto huyo alifanyiwa upasuaji mkono wake wa kulia katika Hospitali ya CCBRT na kwamba sasa anaendelea vizuri.

Dk Mkoma amesema Juni 7, 2017 Muhimbili ilimpokea mtoto huyo na baada ya kufanyia uchunguzi walimfanyia upasuaji mkono wa kushoto na kunyoosha viungo katika vidole vyake ambavyo vilikuwa vimejikunja.

“Baada ya kuungua moto vidole vyake vilishikana na viungo kujikunja, lakini tumefanikiwa kuvinyoosha viungo hivyo na sasa Mwanahidi anaendelea vizuri na matibabu,” amesema Dk Mkoma.

Amesema mtoto huyo sasa anaweza kufanya kazi mbalimbali kama kufua na kwamba anaweza kundelea na shule tofauti na awali baada ya kuungua.

Mama wa mtoto huyo, Amina Mohamed Mkadengile ameambiwa kwamba anapaswa kumfanyia mazoezi mtoto wake ili aimarike zaidi.

“Daktari amenielekeza jinsi ya kumfanyia mtoto mazoezi, nitakuwa nafanyia mazoezi katika Hospitali ya Mkoa ya Ligula mkoani Mtwara. Nawashukuru sana madaktari wa Muhimbili na wauguzi kwa kunipatia huduma nzuri,” amesema mama wa mtoto huyo.

--------------------------------------------------------------------------------------------------------------------------------------------------

Taasisi ya SUKOS yakabidhi vifaa vya Zimamoto Hospitali ya Muhimbili

28/07/2017

Taasisi ya Maafa, Majanga na Uokoaji -SUKOS, leo ameikabidhi Hospitali ya Taifa Muhimbili (MNH) vifaa vya zimamoto ili kusaidia uokozi mara yanapotokea majanga ya moto.

Mkurugenzi wa taasisi hiyo, Suleiman Kova amesema wameamua kutoa msaada huo katika hospitali hiyo kwa kuwa imekuwa ikitoa huduma nzuri za afya.

“Tulifanya utafiti tukavutiwa na huduma nzuri zinazotolewa Muhimbili hivyo tumeanza na Muhimbili na baadaye tutaenda kutoa msaada kwenye taasisi nyingine. Kama mnavyojua tunafanya kazi ya kijitolea,” amesema Kova.

Naye Mkurugenzi Mtendaji wa hospitali hiyo, Profesa Lawrence Museru ameshukuru Muhimbili kupatiwa msaada huo na kwamba vimetolewa wakati muhafaka.

Mkurugenzi wa Ufundi, Gaudence Aksante amesema vifaa hivyo vitatunzwa ili viweze kutoa huduma iliyokusudiwa.

Picha na John Stephen, Hospitali ya Taifa Muhimbili (MNH)

Mkurugenzi wa Taasisi ya Maafa, Majanga na Uokoaji -SUKOS, Suleiman Kova (kulia) akimkabidhi vifaa vya zima moto Mkurugenzi Mtendaji wa Hospitali ya Taifa Muhimbili (MNH), Profesa Lawrence Museru kwa ajili ya kutoa huduma ya uokoaji endapo itatokea majanga ya moto katika maeneo ya kazi au majumbani. Kulia ni Mkurugenzi wa Ufundi, Gaudence Aksante.

Mkurugenzi Mtendaji wa hospitali hiyo, Profesa Lawrence Museru akishukuru baada ya kupokea msaada huo Leo. Kulia ni Mkurugenzi wa Taasisi hiyo, Suleiman Kova na Mkurugenzi wa Ufundi, Gaudence Aksante akifuatilia tukio hilo.

Meneja wa Masoko na Mauzo wa Kampuni ya Astrade Tanzania, Abdallah Massawe akielezea matumizi ya kifaa maalumu cha kutoa taarifa mara gesi inapokuwa ikivuja kwenye mtungi. Kifaa hicho kinasaidia watumiaji wa gesi kuchukua taadhari mara gesi inapoanza kuvuja.

Mmoja wa wafanyakazi wa Taasisi ya Maafa, Majanga na Uokoaji –SUKOS, Ramadhani KHamisi akionyesha jinsi ya kuzima moto baada ya kutokea mlipuko sehemu za kazi au majumbani.

 

Other Menu
Useful Links
Polls
How do you rate our site?
Visitor Counter

Today 137

Yesterday 126

This Week 1256

This Month 4591

All 60364

Kubik-Rubik Joomla! Extensions